Rüfət Səfərov həbsdən buraxıldı
Siyasi bəyanatla prokurorluq orqanlarından istefa vermiş müstəntiq Rüfət Səfərov həbsdən buraxılıb. Az əvvəl bu barədə Binəqədi rayon Məhkəməsi qərar qəbul edib.
İŞİD "maaşları" kəsir
«İslam Dövləti» (İŞİD) silahlı qruplaşmasının büdcəsi azalır deyə, yaraqlılarının, işçilərinin pulunu 50 faiz kəsir. Bu barədə ABŞ-ın CNN televiziyası İŞİD daxilindəki mənbələrdən məlumat alıb.
İŞİD yaraqlıları ayda 400-1200 dollar alırlar, üstəgəl arvadlarına görə 50, hər uşağa görə 25 dollar təqaüd əldə edirlər. Bunu «Newsweek»də Daniel Bier ABŞ Konqresinin Araşdırmaq Xidmətinə istinadla yazır.
Moody's 6 Azərbaycan bankının reytinqini azaldıb
«Moody's Investors Service» beynəlxalq kredit reytinqi agentliyi Azərbaycanın 6 bankının kredit dərəcələrinə dəyişiklik edib. «Moody's» «VTB Bank»ın, «Bank of Baku» ASC-nin və «Unibank» ASC-nin uzunmüddətli depozit reytinqlərini aşağı salıb və «neqativ» (mənfi) proqnoz verib.
«Moody's» həmçinin «Xalq Bank», «Bank Respublika» və «Kapital Bank»ın uzunmüddətli depozit reytinqlərinin proqnozunu «Stabil»dən «Neqativ»ə dəyişib.
Azərbaycan kimə nə satır və alır?
Ötən il Azərbaycanın əsas ticarət tərəfdaşları İtaliya, Almaniya, Rusiya və Türkiyə olub. Bu barədə Dövlət Gömrük Komitəsinin 2015-ci ilin nəticələri üzrə açıqladığı hesabatda bildirilir.
Qurumun saytında yerləşdirilən məlumata görə, ölkəyə idxal məhsullarının böyük hissəsi təxminən 15 faizlə Rusiyanın payına düşür. İdxal məhsullarının 12 faizi Türkiyədən, 9 faizi ABŞ-dan, 7 faizi Almaniyadan, 6 faizi İtaliyadan daxil olub.
Azərbaycanın mal ixrac etdiyi əsas ölkələr İtaliya, Almaniya, Fransa, İsrail və Çexiya olub.
Ölkə ixracının əsas məhsulu neft, neft məhsulları və təbii qaz olub. Bunlar ixracın 85 faizini təşkil edib.
Meyvə-tərəvəz ixcracın təxminən 3 faizini, çay 0,17, bitki və heyvan mənşəli piylər və yağlar 1,34, şəkər 1,86, spirtli və spirtsiz içkilər 0.23 faizidir.
İdxalın 10 faizini yeyinti məhsulları, 26 faizini maşın, mexanizm, elektrik aparatları, avadanlıqlar və onların hissələri təşkil edib.