Ildə 9 milyard
ABŞ-ın «Global Financial Integrity» Tədqiqat Təşkilatı xaricə qeyri-qanuni kapital axını həyata keçirilən ölkələrin siyahısını açıqlayıb. Tədqiqat 2004-2013-cü illər arasında aparılıb. Bu illər ərzində hər il Azərbaycandan 9 milyard dollar dəyərində qeyri –leqal yollarla pul çıxarılıb.
Siyahını «Azadlıq» qəzetinə şərh edən iqtisadçı Məhəmməd Talıblı deyib ki, həmin araşdırmanın nəticələrinə inansaq, az qala, Azərbaycanın neft gəlirlərindən xərclədiyi qədər ölkədən xaricə vəsait çıxarılıb: «Bu isə o deməkdir ki, investisiyanın kənara axması eyni zamanda həm istehsalın, həm də istehlakın itirilməsi riski ilə üzləşmişik və həmin əlavə dəyəri formalaşdıran ÜDM «piroqundan» əhəmiyyətli bir payı itirmişik. Nəzərə alsaq ki, ölkəmizin neft-qaz gəlirləri 118 milyard dollarının 83 milyardını xərcləmişik, bu o deməkdir ki, həmin məbləğdən də bir az artıq vəsaitin xarici ölkə iqtisadiyyatlarına xidmət etməsinə şərait yaratmışıq».
BMT Azərbaycanı işgəncələrə görə tənqid edir
Azərbaycan hökuməti son bir neçə ildə təcridxanalarda yüzlərlə işgəncə iddiasına baxmayaraq, bircə işgəncə halını belə araşdırmayıb. «Human Rights Watch» insan haqları təşkilatının dekabrın 11-də yaydığı bəyanatda BMT-nin bu barədə yeni hesabatından bəhs olunur.
Hesabatda Azərbaycanın İşgəncəyə qarşı Konvensiyaya necə əməl etməsi araşdırılıb və üzə çıxıb ki, hökumət işgəncələrə dair etibarlı və davamlı iddiaları yoxlamayıb. Hesabat Azərbaycan hökumətini ədalətsizcəsinə həbs olunmuş insan haqları müdafiəçilərini azadlığa buraxmağa çağırır.
Təbrizdə etiraz aksiyası
İrandan alınan xəbərlərdə deyilir ki, dekabrın 10-da Təbrizdə Azərbaycan Respublikasının konsulluğu qarşısında “Nardaranda şiələrin öldürülməsinə” etiraz olaraq aksiya keçirilib.
Onlarca etirazçı əllərində “Nardaran şəhidləri” kimi plakatlarla Azərbaycan hökumətini ittiham edib.
Cahangir Hacıyev 400 milyondan 200 milyonu qaytarıb
"Cahangir Hacıyevin içəridə olması bu məsələnin həllinə maneə yaradacaq. O, azadlıqda ikən 400 milyonluq vəsaitin 200 milyondan artığının banka qaytarılmasına nail olub. Öz əlaqələri, kanalları vasitəsilə bunu edib, bəzi sübutlar xaricdədir, indi istintaq təcridxanasında saxlanması onun bu işi başa çatdırmasına imkan vermir. O, həbs ediləndən sonra bir manat da olsun geri qayıtmayıb."- bunu Beynəlxalq Bankın keçmiş sədri, hazırda DİN-in Baş Mütəşəkkil Cinayətkarlıqla Mübarizə İdarəsində saxlanan Cahangir Hacıyevin vəkili Aqil Layıcov AzadlıqRadiosuna deyir