-
Oktyabrın 25-dən Rusiya aviaşirkətlərinə məxsus təyyarələrin Ukraynaya uçuş qadağası qüvvəyə minib. İki ölkə arasındakı avia əlaqənin ləğv olunduğu bildirilir.
BBC-nın məlumatına görə, sözgedən aviaəlaqənin kəsilməsindən hər ay 70 min sərnişin əziyyət çəkəcək.
Ukrayna hakimiyyəti bu ilin sentyabrında qərar qəbul edib ki, oktyabrın 25-dən Rusiya aviaşirkətlərinə Ukraynaya uçuş etməyi qadağan etsin. Buna cavab olaraq Rusiya da Ukraynaya uçuş qadağası tətbiq edib.
Sentyabrın 16-da Ukrayna prezidenti Petr Poroshenko Rusiyaya qarşı yeni sanksiya paketinə imza atıb. Yeni sanksiya siyahısına 100-ə yaxın hüquqi şəxs, o cümlədən 20 rus aviaşirkəti salınıb. Sanksiyaya səbəb Donetsk və Luqanskın Ukraynadan ayrı yerli idarəetmə orqanlarına seçki keçirmək qərarı olub. Poroshenko belə bir qərarın Rusiyanın təsiri altında verildiyini iddia edir.