Günel Mövludun qardaşları saxlanılıb
Onlar narkotik vasitələrin qanunsuz dövriyyəsində təqsirləndirilirlər.
Daxili İşlər Nazirliyi yazar Günel Mövludun qardaşlarının həbsini təsdiqləyib.
Nazirliyin mətbuat xidmətinin rəis müavini Ehsan Zahidov APA-ya bildirib ki, oktyabrın 13-də polis orqanlarına əməliyyat məlumatı daxil olub. Keçirilən tədbirlər nəticəsində Vəkil İmanov Biləsuvar rayonunda, onun qardaşı Raci İmanov isə Sumqayıt şəhərində saxlanılıblar:
«Hal şahidlərinin iştirakı ilə üzərilərinə keçirilən baxış zamanı onlardan narkotik vasitə olan marixuana götürülüb. Hazırda hər iki faktla bağlı araşdırmalar aparılır».
Şair kimə lazımdır?
Lənkəranda yaşayan satirik şair Tofiq Həsənlini oktyabrın 13-də, axşam saat 21:00 radələrində Bakının Qala kəndində naməlum şəxslər oğurlayıb.
Onun hara aparıldığı bəlli deyil.
Bu haqda Tofiq Həsənlinin dostları sosial şəbəkələrdə məlumat yayıb.
Şairin dostları onun anasının videomüraciətini yayıblar.
Türkiyə öz içində özü ilə savaşda
«1993-cü ildə «Foreign Affairs» jurnalında dərc olunmuş «Sivilizasiyaların toqquşması» başlıqlı məqaləsində mərhum Samuel Huntington Türkiyəni «parçalanmış ölkə» kimi təsvir edirdi. Huntington-un fikrincə, Türkiyənin Qərb üslublu siyasi qurumları ilə cəmiyyətinin islamçı mədəni və sivil əsasları arasında barışmaz ziddiyyətlər mövcuddur. Bu, xeyli mübahisəli fikir olsa da, Türkiyənin indiki baş naziri Ahmet Davutoğlu da 1984-cü il dissertasiyasında oxşar iddia ilə çıxış edib. Professorların heç biriylə razı deyiləm. Türkiyə, onların dediyi kimi, «parçalana» bilməz, bu ölkə öz-özünü elə özüylə savaşda parçalayır».
«The Atlantic» portalında Steven A.Cook belə yazır.
Pambığı kola yapışdırdılar(?!)
Özbəkistanda Fərqanə vilayətinin icra hakimiyyəti baş nazirin mümkün gəlişinə hazırlıq olaraq adamlara yığılmış pambığı yenidən kollara yapışdırmaq göstərişi verib.
Xəbər verilir ki, yerli hakimiyyət bununla tarlalardakı “pambığın bolluğu” ilə öyünmək istəyib.
AzadlıqRadiosunun Özbək xidməti xəbər verir ki, pambıq yapışdırılmağına yapışdırılıb, amma hörmətli qonaq gəlməyib.