-
«Azerspace-1» peykinin resurslarının 66 faizi kommersiya yönümlü istifadədədir. 2013-cü ildən kommersiya fəaliyyətinə başlayan peyk tutumlarından istifadəyə görə «Azərkosmos» ASC-yə 27 milyon ABŞ dolları həcmində vəsait daxil olub.
«Azərkosmos»un mətbuat xidmətinin rəhbəri Fidan Behbudova AZƏRTAC-a belə deyib.
Qeyd edilib ki, əlverişli orbital mövqedə (46˚ şərq uzunluğu) yerləşən «Azerspace-1» telekommunikasiya peyki vasitəsilə dünyada milyonlarla insan informasiya və rabitə xidmətlərindən geniş istifadə imkanları əldə edir. Fəaliyyət göstərdiyi bu illərdə ilk Azərbaycan peyki Mərkəzi Asiya, Avropa və Afrikanın 50-dən artıq ölkəsini birləşdirən kosmik məkanda mühüm rol oynayır.
«Azərkosmos» 2017-ci ildə ikinci telekommunikasiya peyki «Azerspace-2»ni 45° şərq uzunluğu orbital mövqeyinə çıxarmağı və çox yüksək ayırdetməli Yer səthinin məsafədən müşahidə peyki əldə etməyi planlaşdırır.
Azərbaycanın ilk telekommunikasiya peyki – «Azerspace-1» 2013-cü il fevralın 8-də Fransız Qvianasındakı (Cənubi Amerika) Kuru kosmodromundan orbitə buraxılıb.
İlk peykin hazırlanma və orbitə qaldırılmasının Azərbaycana neçəyə başa gəldiyi barədə dəqiq rəqəmlər açıqlanmır. Yalnız o bildirilir ki, peyk 120 milyon ABŞ dollarına hazırlanıb.
Peykin istismar müddəti 15 il, qoyulan vəsaitin götürülmə müddətinin 5 il olduğu deyilir.