Azərbaycanın qadınlardan ibarət futbol yığması tarixində ilk dəfə Avropa çempionatının seçmə turnirinə qatılmaq üçün Rumıniyaya yollanıb. Əsas mərhələyə vəsiqə verən 5 yer uğrunda mübarizə aparacaq 20 komandadan biri olan Azərbaycan yığması, seçmə turnir ərəfəsində yoldaşlıq görüşü keçirməyə imkan tapmayıb. Daha doğrusu, yığmanın noyabrın 7-10-da Türkiyədə toplanış keçməsi nəzərdə tutulsa da, AFFA rəhbərliyi viza problemlərini vaxtında həll edə bilmədiyinə görə səfər reallaşmayıb.
Ötən ay komandanın «sükanı arxasına» keçən Şamil Heydərov artıq seçmə turnirə qatılacaq 18 onuncunun adını da açıqlayıb. Maraqlıdır ki, AFFA rəhbərliyi tarixində heç bir oyuna da çıxmayan komandanın qarşısına ilk mərhələni adlamaq vəzifəsi qoyub. Yığmanın rəisi Telman Abdullayevin fikrincə, bu vəzifənin öhdəsindən gəlmək olar: «Komandanın hazırlığı dövründə hansısa vəzifədən söhbət getməmişdi. Dünən isə mərhələ keçmək vəzifəsini qarşımıza qoydular. Məncə, buna gücümüz çatar. Rəqiblər haqda olan bilgilərimiz belə düşünməyə əsas verir».
Söz rəqiblərdən düşmüşkən, azərbaycanlı xanımlar Rumıniya, Bolqarıstan və Estoniya futbolçuları ilə qarşılaşacaq. Yığma debüt matçını noyabrın 18-də meydan sahibi rumınlara qarşı keçirəcək. Noyabrın 20-də Azərbaycan komandasının rəqibi estonlar, 23-də isə bolqarlar olacaq.
