-
Dilqəm Carçalov
Timeline şəkilləri
Gecələr evlərinə qonaq gedirdim sevgilimgilin
mətbəxdə necə yemək yediyini,
çay dəmlədiyini,
otağında paltar dəyişdiyi yeri,
dəhlizdə güzgünün qabağında var-gəl eləməyini seyr edirdim
timeline şəkillərində.
Onda hələ sevib qurtarmamışdım mən,
hələ təzə başlayırdım baxmağa bağda çəkdirdiyi şəkillərinə.
Onda bilmirdim heç ailədə neçə nəfərdilər,
bilmirdim anasını nə qədər çox istəyir,
bilmirdim ki, tez-tez bacısının paltarlarını geyinir gizlicə.
Onda hələ təzə başlayırdım sevməyə
timeline şəkillərində sevgilimi.
Bir şəkili var idi hələ, əli belində
ən çox ona baxırdım
Elə bilirdim o da o şəkli mənə baxmaq üçün çəkdirib.
Gecələr qonaq gedirdim sevgilimgilə
ən çox mətbəxlərini bəyənirdim,
oturub atasının çəkdiyi siqaretdən çəkirdim,
hansı stəkandan çay içdiyini təxmin edirdim sevgilimin
Onda hələ bilmirdim heç çayı sevib, sevmədiyini,
məni sevib, sevmədiyi kimi.
Tutulub qalırdım elə mətbəxdəki o şəkildəcə
elə bilirdim indicə gəlib mənə çay dəmləyəcək,
elə bilirdim o şəkildən baxıb, səni sevirəm deyəcək.
Onda hələ sevib qurtarmamışdım mən
Təzə başlayırdım ki, sevim
Olmadı,
timeline şəkillərində qaldı mənim sevgim.
Üçün ikisi
Oyun oynamağı heç sevməmişdim mən,
ürəyim cığallıq edirdi tez-tez,
ya üçün ikisini gizlədirdi məndən, ya da top ‘ştanq’ın üstündən keçirdi
qışqırırdı üstümə ki, sən oynaya bilmirsən, keç qıraqda dur!
mən də ağlayaraq topu götürüb gedirdim
Elə o vaxtdan üçün ikisini də sevmirdim heç.
Sonra böyüdüm yavaş-yavaş
İlk dəfə həyatdan texniki timeout istədim, mənə qırmızı kart göstərdi
Bir əlimlə köynəyimin ətəyini qaldırıb,
tərimi silə-silə tərk etməyi öyrənirdim sevdiklərimi bir-bir
Hər tərk edişimdə də qayıdıb özümə gəlirdim bumeranq kimi.
Ürəyimsə həmişə cığallıq edirdi
Elə ilk sevdiyim qıza da yalan demişdi,
guya atam başqa bir məktəbdə müəllim işləyirdi.
Sonra böyüdüm yavaş-yavaş
Sevmədiyimi bilə-bilə həyat mənlə oyun oynayırdı yenə
Hamı dərsə tələsəndə, mən siqaret çəkirdim evdə,
dünən axşam filankəs məni niyə sevməmişdi deyə.
Həyatım bəlkələrlə dolmuşdu ağzına qədər,
çıxıb getməklərdəydi bir-biri ilə qaçdı-tutdu oynayan arzularım,
gecələrdən gecələrə gizlənirdi bir-birindən xəyallarım
və hamı dərsə tələsirdi, məndən savayı
mən isə evdə oturub həyatla oyun oynayırdım,
üçün ikisi və timeout!
