-
İyunun 6-da Bakıda bəzi sərnişin avtobuslarının hərəkət istiqamətində dəyişiklik edilib.
Bu barədə Nəqliyyat Nazirliyinin mətbuat xidmətinin rəhbəri Namiq Həsənov ANS-ə məlumat verib. Onun dediyinə görə, bu dəyişiklik müvəqqətidir.
«Bu gün paytaxtda I Avropa Oyunlarının baş məşqi keçirilir. Bu səbəbdən yollarda avtomobil sıxlığının qarşısını almaq üçün sərnişin avtobusları bəzi ərazilərə buraxılmır. Ona görə də, bir neçə sərnişin avtobusunun hərəkət istiqaməti dəyişdirilib», - deyə Namiq Həsənov bildirib.
Nazirlik rəsmisi deyir ki, bu dəyişiklik iyunun 12-də də baş verəcək. Bundan əlavə, oyun zamanı da bəzi avtobus xətlərinin hərəkət istiqaməti uzadıla, yaxud qısaldıla bilər.
İyunun 5-dən Bakıda 5, 6, 13, 18 saylı avtobus xətlərinin hərəkət istiqaməti dəyişdirilib.