Ukraynanın Odessa şəhərində terrorçu qrupun üzvləri olmaqda şübhəli bilinən 40-dan çox adam həbs olunub.
Ukrayna Təhlükəsizlik Xidmətinin sözçüsü Olena Hitlyanska aprelin 10-da bildirib ki, onlar aprelin 12-də provaslavların Pasxa bayramında terror aktları törətməyi planlaşdırırmışlar.
Olenanın sözlərinə görə, onlardan xeyli silah və sursat müsadirə edilib.
O axtarış-əməliyyat tədbirlərinin davam etdiriləcəyini deyir.
Həmçinin ötən həftə şəhərdə terror aktları törətməkdə şübhəli bilinən 3 nəfər həbs olunub.
Qeyd edək ki, bu yaxınlarda Odessa və Xarkovda bir sıra partlayışlar törədilib.
Ukrayna hakimiyyəti hesab edir ki, onların arxasında Moskva və rusiyapərəst separatçılar durur.