Ukrayna ordusu ölkənin şərqindəki rusiyapərəst separatçıların tanklar, silah və sursatla cəbhə xəttinə doğru yaxınlaşdığını xəbər verir.
Daxili işlər nazirliyinin sözçüsü Zoryan Shkiryakın sözlərinə görə, martın 23-i gecə saatlarında cəbhə xətti yaxınlığındakı Horlivka şəhərinə 10-12 tank daxil olub.
O həmçinin separatçıların Donetsk və Luqansk vilayətlərində cəmləşməkdə davam etdiklərini bildirir.
Ukrayna ordusu son 24 saat ərzində 6 əsgərinin yaralandığını xəbər verir.
Ötən ilin aprelindən bu yana Ukraynanın şərqində separatçılarla Ukrayna ordusu arasında gedən toqquşmalarda 6 mindən çox adam ölüb.
Martın 15-də atəşkəs elan edilsə də vaxtaşırı tərəflər arasında silahlı toqquşmalar müşahidə olunur.
Amma ümumilikdə gərginlik xeyli səngiyib.