-
Arazın o tayından
Məhəmməd Rza Ləvayi
Bu adam oğlu saxsılara şeir əkək deyirsən
Payız yavaş-yavaş ev qadını olur
Açır pəncərəni üzümüzə
Fəsillərini eyvana çıxarıbsan səhər yeməyinə
Qartal qayğısıdır qaşların dağlara
Əl atırsan yaxana, məmləkət calanır küçəyə!
Həmin məmləkətdə
hər gün bir Məhəmməd Rıza qoparıb sürgün edirlər
məndən!
Yapışmır anamın dodağına məmləkət mənsiz
Atamın Allahu Əkbərində kürtaj* olan tarixin sancısı var
Bu adam oğlu saxsılara şeir əkək deyirsən
Olmaz, bir az çox xalam evidir ayrılıq
Saçlarına taxılıb qalır sorunlar, sorular
Hansı gözün tülküsüdür pəncərəndə günəş?
Hansı köynəyin cırılan vaxtıdır bu soyuq səhər?
Cuma axşamına dırmaşan mömünlərin beyni deyilmi bu
meydan?
Sənə çarpıb səkkiz milyard nəfər oldu sevgi
Ölkə-ölkə paylaşır yalnızlığını yer kürəsi
Dodağından qonur bayraqlara milli qürur!
Ağaclar sən ola bilməyən qadınlar
Daşlar şerində gəzməyən ərkəklər
Yollar, insanın insandan qaçış yetənəyi!..
Bir şeir yaz quş olsun sümüklərimiz
Təqvimlərdə çürüdüyümüz sərhədlərə hayıf !
__________
*abort
Sən mavi ayı içibsən heç?
Sən mavi ayı içibsən heç?
Ya yaşıl günəşi yarın köynəyinə
duymə tikibsən heç?
Bir gün gələr istikanımdaki Batının uçağı
qonar şəhərinizə
Bir ağ balıq uçar ağzından
- Mən ağını dişlədiyim balıq -
Bütün kəlmələrin dadı qaçar ağzından
Mənə fərq etməz
Filorida yollarından keçirərəm
Urmu - Təbriz yolunu
Bəlkə də Nyu-Yorkda Təbriz dərvazası
daha gənişdir
Mənə fərq etməz
Yaşayaram acığının acığına
Qara dəridən ulduz toplayaram,
ağ dəridən kişmiş
Sonunda həyatın rəngi üzündən qaçıb
başqasına getmiyəcəkmi?..
Dostun adında bir günəş var, batırdın
Səninlə olmaq mina üstünə ayaq qoymaqdır
Tərpənsəm partlayacağam
Gözlərini çək üstümdən, yoruldum
Bəzən mübarizə bir bucağa sığan pişik olur,
yatmaq istəyir yumuşaq yalnızlıqlarda
Bəzən mübarizə bir istikan şarabdır hər şeyi unutmaq üçün
Artıq gözün məndə qalmasın
Gözün qalsın daşın beynini qazan güzgüdə
Gözün qalsın dibindən keçən payızın oxunda
Gözlərindən düşdüyüm gün almadır
dişləyib tulladım zibil qabına
Gövdənin məçidindəki günbəzlərə bayraq taxmadan enirəm
Sən də düşmənlərim qədər ağrı yüklədin fəsillərimə
Sən də düşmənlərim qədər daşladın mübarizəmin rəngini
Dostun adında bir günəş var, batırdın
Bədənin - işğal olunmuş xəritəmizin özgür iradəsi!
Bədəninin dərə-təpəsi - günbəzləri,
Təbrizi - Yanaqlarındaki almalıqlarda
oynayan uşaqlar
Kipriklərin - küçə başında
qara çərşablı qadınlar pıçıltısı
Budların - Ağ Dəniz balıqları
Məndə balıqçılar səbri hardaydı?
Göbək atarsan bu qəribə
Köynəyin - səkkiz rixter deprəm
Səni o qədər bir tansu yapar ki
Atlantik Nuhun gəmisi Qafqaz dağlarında sökülər!
Qoltuğundaki xal - hansı demokratdır?
Hansı zindanda?
Dodağın - hansı şairdir?
Hansı ölkədə?
Saçlarında - neçə peyğəmbər,
neçə tanrı vəhyə girişib?
Bu məhzun öpüş - ölülərimizin hankısıdır,
hansı məzarda?
Bədənin - işğal olunmuş xəritəmizin özgür iradəsi!
Sevgi əsarətdir bəzən
Bir cüt yaşıl gözün arxasında qaldı fəlsəfəm
Matematikdən öyrəndiyim yalnız sevginin boyudur,
bir metrə səksan santimetrə boyunda
O günlər inqilab romantikası idi
yağmur altında sıçrayan qaşlarımız
O qədər də canlı deyildir ışığım
Bulud hopdu ətəyinə, söndüm
İndi sənsiz bir şeylər yazır oxuyuram
siyasal
bilimsəl
fəlsəfi
Anımın önündə yenilir inadım
Anılarımın dərisi soyulur
və yataq odası islanmış kitabdır, oxunmur
Pəncərəmdəki cada cırır canımdaki kərvanı
Cada cadı, cada cin
Sonra cayar cada
Sonra dodaqlarını çarparam göyə,
sonucu bəlli
Yuxularımda tutuqlanan kişini
buraxaram əllərinin adasına
Yol yürüməz bilirəm yalandan
ilandan yolunmaz yol
Ağaclar pənçər hələlik
Orman yürüyür amma
Bir xəstə qanadın quşu salamdan qonur sağlığıma
Mən amma əlvidalardayam həmişə
Durnalar səritinə sərilən baxışlar düşür ayaqlar altına
Sevgi uçurum, düşüş
Sevgi uşaq qorxunun medyaya işəməsi
Sevgi əsarətdir bəzən
Ah, bu məmləkətin əsarəti
sığmadı canıma bir tür
O səbəbdən qat qat geydim bütün ölkələri
Xəzər tişörtüm, Atlantik cəketim...
Nəcə, nasıl anlamzsan məni?...
