-
Azərbaycanlı mühacir, ABŞ vətəndaşı Səid Nuri viza müddətinin bitməsi ilə əlaqədar Dövlət Miqrasiya Xidmətinə müraciət edib.
Bu haqda AzadlıqRadiosuna vəkil Yalçın İmanov məlumat verib:
«Səid Nurinin viza müddəti sentyabrın 12-də bitir. Xidmətə ünvanlandığımız müraciətdə izah etdik ki, onun geri qayıtması öz iradəsindən asılı olmadığından bunu nəzərə alsınlar. Güman edirik ki, nəzərə alacaqlar».
Sentyabrın 4-də Heydər Əliyev Hava Limanından Ukraynaya getmək istəyən Səid Nurini təyyarəyə buraxmayıblar.
Baş Prokurorluq sentyabrın 5-də yaydığı açıqlamada bildirib ki, Səid Nurinin hərəkətinin müvəqqəti məhdudlaşdırılması Baş Prokurorluqda istintaq edilən cinayət işi ilə bağlıdır.
O, daha sonra Baş Prokurorluqda QHT-lərə açılan cinayət işi ilə bağlı şahid qismində ifadə verib.
Səid Nuri «Yeni Fikir» Gənclər Birliyinin üzvü olub. Təşkilatın rəhbəri Ruslan Bəşirli 2005-ci ildə Cinayət Məcəlləsinin 278-ci maddəsi (Hakimiyyəti zorla ələ keçirmə və ya onu zorla saxlama) ilə təqsirləndirilərək həbs olunub. O, Ermənistan xüsusi xidmət orqanları ilə əməkdaşlıqda günahlandırılıb və 7 il həbsə məhkum olunub. Bu işdə adı keçən Səid Nuri şərti azadlıqdan məhrum edilib, az sonra mühacirətə yollanıb.