Avropa Şurasının (AŞ) ekspertləri Azərbaycanın cəzaçəkmə yerlərindəki saxlanma şəraitini Avropa standartlarına uyğunlaşdırmaq üçün layihələrini davam etdirir. Avropa standartlarına görə, məhbusa tək qalmaq imkanı verilməli, otağının sahəsi işıqlandırılmalı, istilik və ventilyasiya şərtləri nəzərə alınmalıdır. Yemək sanitar-gigiyenik qaydalara uyğun hazırlanmalı, gündə 3 dəfə verilməlidir. Məhkumların hüquqi yardım almaları təmin olunmalıdır. Bura bütün məhbuslara hörmətlə yanaşma, onların insan hüquqlarının təmin olunması, həbsdə olduğu müddətdə azadlığa çıxmaları üçün reabilitasiya olunmaları da daxildir.
AŞ Ekspertlər Qrupunun rəhbəri Roman Xuna bildirir ki, layihənin işlənməsi 2006-cı ilin yanvar ayından başlanıb və gələn ilin iyununa qədər davam edəcək.