Avropa Şurası Venesiya Komissiyası (VK) Azərbaycan hökumətinin Seçki Məcəlləsinə (SM) dəyişikliklə bağlı təkliflərini bu həftə alıb. Komissiyanın Seçki və Referendum Bölməsinin rəhbəri Pyer Karrone deyir ki, təklifləri yaxın günlərdə açıqlaya bilməyəcəklər, çünki onların təhlili bir neçə ay çəkəcək: «Təkliflərin nədən ibarət olduğunu deyə bilmərəm. Çünki sənəd öyrənilir, biz iclas keçirməli, yazılı münasibətləri gözləməliyik. Sənəd barədə fikir bildirmək çox tezdir. Onu yenicə almışıq».
Ötən həftə VK bildirmişdi ki, təkliflər bir həftəyə gəlməsə, Bakıya müraciət edəcək.
Seçki Məcəlləsinə dəyişiklik 2003-cü il prezident, 2005-ci il parlament seçkisindən sonra tövsiyə olunub. Prezidentin İcra Aparatının rəhbəri Ramiz Mehdiyev deyir ki, SM-ə dəyişikliyə ehtiyac yoxdur.
