Keçid linkləri

Təcili xəbərlər
2021, 17 Aprel, şənbə, Bakı vaxtı 05:34

Milli Tarix Muzeyində «1-ci Dünya müharibəsi» başlayıb


Yenilənmiş daimi ekspozisiya seyrçilərin yolunu gözləyir.
-
Bu il I Dünya Müharibəsinin başlanmasının 100 illiyi qeyd edilir.

Azərbaycanın bu savaşda iştirakı və müharibənin Azərbaycana təsiri ilə bağlı yeni tarixi araşdırmalar, eksponat və fotoşəkillər Milli Tarix Muzeyinin daimi ekspozisiyasında «Azərbaycan I Dünya müharibəsi illərində» bölməsinin yenidən qurulması ehtiyacını doğurub.

Muzeydən AzadlıqRadiosuna verilən xəbərə görə, bölmənin yeni görünüşü 13 divar informasiya paneli, 2 vitrin daxili informasiya paneli, 4 vitrin, 1 sensorlu kompüterdən ibarətdir.

Burada ümumilikdə 197 eksponat və fotoşəkil, 1 tam ölçülü fiqur, 1 rəsm əsəri nümayiş olunur.

DAİMİ EKSPOZİSİYADA NƏLƏR VAR?

Daimi ekspozisiyada «Azərbaycan I Dünya müharibəsi illərində» bölməsinin «I Dünya müharibəsinin başlanması və Azərbaycan» informasiya panelində «Üçlər ittifaqı» və «Antanta» hərbi-siyasi blokları iştirakçılarının Azərbaycanla bağlı planları, cəmiyyətin müxtəlif təbəqələrinin müharibənin başlanmasına reaksiyası, Azərbaycanda yaradılmış hərbi-sənaye komitələrinin fəaliyyəti, Azərbaycan neft sənayesinin fəaliyyəti (Rusiyada çıxarılan neftin 80%-i Azərbaycanın payına düşürdü), müharibənin sosial-iqtisadi vəziyyətə təsiri, Qafqaz cəbhəsinin yaranması ilə İran Azərbaycanında döyüşlərin başlanması, Bakı Dəniz Aviasiyası zabit məktəbinin yaradılması, azərbaycanlılardan ibarət yeganə hərbi hissə - Tatar (Azərbaycan) atlı alayının yaradılması, 1914-1917-ci illərdə Rusiya ordusunda 200-ə yaxın azərbaycanlı zabitin xidmət etməsi, Bakıda çoxsaylı hərbi hissələr və hərbi hospitalların yerləşdirilməsi hesabına əhalinin sayının kəskin artması barədə bilgilər verilir.

İLK HƏRBİ MƏKTƏB-- BAKI DƏNİZ AVİASİYASI MƏKTƏBİ

1915-ci il noyabrın 22-də Azərbaycanda ilk hərbi məktəb – Dəniz aviasiyası zabit məktəbinin Bakı filialının təntənəli açılışı olub.

1916-cı il fevralın 25-də məktəb müstəqil statuslu «Bakı dəniz aviasiyası məktəbi» adını alıb.

Sahil qurğuları, hidroplanların suya buraxılması üçün aşırımların, anqarların və s. binaların tikinti xərcləri Bakı şəhər Upravası tərəfindən ödənilib.

UPRAVA RƏHBƏRİ--MƏMMƏD HƏSƏN HACINSKİ

Məktəbin açılışında Peterburq Texnologiya İnstitutunun məzunu, Uprava rəhbəri Məmməd Həsən Hacınski böyük rol oynayıb.

1915-ci ilin noyabrından 1917-ci ilin noyabrınadək məktəbdə 40 zabit və 17 aşağı çin, o cümlədən 20 dəniz təyyarəçisi hazırlanıb.

Təyyarələrin orta sayı – 20-25 ədəd olub.

Kadrlarının hazırlığından başqa məktəbdə ilk dəfə D.Qriqoroviçin M-9, M-7 hidroplanları, İ.Qolenişev-Kutuzovun aeroqlisseri, A.Sedelnikovun M-10, M-15 hidroplanları, E.Engelsin qayıq-qırıcı təyyarəsi sınaqdan keçirilib.

1918-ci ilin iyulunda Bakı dəniz aviasiyası məktəbi Bakı Soveti bolşevikləri tərəfindən bağlanıb.

Bölmədə həm yazılı məlumatlar, həm də, fotoşəkillər yer alıb.

Yenilənmiş daimi ekspozisiya seyrçilərin yolunu gözləyir.
XS
SM
MD
LG