Nazir: «İran Azərbaycanın razılığını istəyirsə...»
Urmiya gölü
Nazir: «İran Azərbaycanın razılığını istəyirsə...»
-
«İran Arazın suyunun Urmiya gölünə axıdılması üçün Azərbaycanın razılığını istəyirsə, mövzunu Azərbaycanla birgə müzakirə etməlidir».
APA-nın xəbərinə görə, bu açıqlamanı jurnalistlərə Ekologiya və Təbii Sərvətlər naziri Hüseyn Bağırov verib.
Nazir bildirib ki, ölkələrlə aparılan müzakirə nəticəsində yekdil qərar qəbul edilə bilər. Hüseyn Bağırovun sözlərinə görə, Azərbaycanın bununla bağlı İranla müqaviləsi var:
«Müqavilədə bir qayda olaraq ekoloji norma saxlanılır. Suyun çayda öz bioloji həyatı var və hər bir ölkə ordan hansı ehtiyaclar üçün su götürə biləcəyini müəyyənləşdirib. Bundan əlavə, müqavilədə gələcəkdə çayın üzərində hansı qurğuların qurula bilməsi, bu prosesin hansı prinsiplərə əsaslanmalı olduğu, ölkələrlə hansı prinsiplərin razılaşdırılması öz əksini tapıb».
URMİYA GÖLÜNÜN 70 FAİZİ QURUYUB
Hüseyn Bağırov deyib ki, Azərbaycan hökumətinə rəsmi müraciət edilərsə, məsələnin ekoloji cəhətləri ilə yanaşı, siyasi, iqtisadi tərəfləri də kompleks şəkildə təhlil oluna bilər. Nazirin fikrincə, yalnız bundan sonra hər kəsi qane edən yekun nəticəyə gəlmək olar.
Urmiya gölünün 70 faizi quruyub və hektarlarla ərazi şoranlaşıb. Bu yaxınlarda İran hökuməti Urmiyanın qurumasının qarşısını almaq üçün Araz çayının suyunun gölə yönləndirilməsini nəzərdə tutduğunu bildirib.
BMT oktyabrda bu gölün bərpası üçün 135 milyon dollar ayırıb.
İranda yaşayan azərbaycanlılar dəfələrlə gölün qurumasına etiraz olaraq aksiyalar keçiriblər, həbs edilənlər olub. Onlar iddia edirlər ki, hökumət gölün qurumasına bu bölgədə yaşayan azərbaycanlıları pərən-pərən salmaq üçün göz yumur.
Fotoqalereya
Urmiya gölündən son fotolar
AzadlıqRadiosunun fars redaksiyası getdikcə qurumaqda olan Urmiya gölünün son durumundan fotolar təqdim edir. Azərbaycanlı fəallar hökuməti bu gölün qurumasının qarşısını qəsdən almamaqda ittiham edirlər. Onlar bildirirlər ki, gölün quruması onun ətrafında azərbaycanlıların iri yaşayış məskənlərində ekoloji sistemi korlayacaq, duz fırtınalarına səbəb olacaq.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
