ABŞ-ın Mərkəzi Kəşfiyyat Agentliyinin keçmiş direktoru David Petraeus Liviyada ABŞ konsulluğuna hücumla bağlı Konqresdə sorğu-suala çəkilib. Petraeus bağlı qapılar arxasında Nümayəndələr Palatası və Senatın kəşfiyyat komitələrində suallara cavab verib. Həmin komitə 2012-ci il sentyabrın 11-də Liviyanın Benqazi şəhərində ABŞ-ın bu ölkədəki səfiri Chris Stevens və daha 3 amerikalının ölümü ilə bağlı hadisəni araşdırır.
Bu hadisədən sonra konsulluğun təhlükəsizliyinin təmin edilməsi ilə bağlı Obama administrasiyasının hansı addımlar atdığı ilə bağlı suallar meydana çıxıb.
Noyabrın 16-də keçirilən sorğu-sualda həmçinin konsulluğa hücum zamanı çəkilmiş videokadrlar izlənib.
David Petraeus noyabrın 9-da həyat yoldaşından başqa bir qadınla nigahdankənar münasibətlərini etiraf edərək istefa verib. Amma Konqresdə belə söhbətlər də dolaşır ki, Petraeus əslində Benqazidə konsulluğa hücumun məsuliyyətindən yaxa qurtarmaq üçün vəzifədən gedib.