Prezident tüfəngdən hədəfə bir neçə sərrast atəş açıb

Ötən gün Qəbələdə səfərdə olan prezident İlham Əliyev Bum qəsəbəsində stend və ox atıcılığı kompleksində tikinti işlərinin gedişi ilə tanış olub.

President.az saytının məlumatına görə, kompleksin 25 hektarlıq sahəsi dağlıq ərazini əhatə edir. Ərazidə inzibati bina, silah-sursat anbarı və mağazası, 45 atıcılıq yeri üçün 50 və 25 metrlik, 30 atıcılıq yeri üçün 10 metrlik tirlər, 8 dairəvi səngər, 7 meydança, 25-50 metr məsafələrdə ox atmaq üçün sahə, 120 yerlik yeməkxana binası, elektromobilləri yükləmək və saxlamaq üçün otaq və sahə, yarışları seyr etmək üçün tribuna, bayraq meydançası, nəzarət-buraxılış məntəqəsi, istirahət məkanları yaradılacaq.

Bundan başqa, ərazidə içməli su və yanğından mühafizə çənləri, müxtəlif mühəndis qurğuları, transformator yarımstansiyası da qurulacaq.

Prezident İlham Əliyev tüfəngdən hədəfə bir neçə sərrast atəş açıb. Dövlət başçısı müvafiq tapşırıq və tövsiyələrini verib.



QƏBƏLƏDƏ QOLF MEYDANÇASI, KLUBU İNŞA OLUNACAQ

Ötən gün – sentyabrın 10-da İlham Əliyev Qəbələdə tikilməkdə olan «Tufan» dağ-xizək yay-qış istirahət kompleksində olub. Həmçinin inşası planlaşdırılan «Aquapark» və «Golf Resort» turizm obyektlərinin layihələri ilə tanış olub. Layihəyə əsasən, Qəbələ rayonu ərazisindən keçən Dəmiraparan çayı ilə ətrafdakı dağ massivinin arasındakı 80 hektarlıq ərazidə qolf meydançasının, qolf klubun, otel binasının, villaların və müvafiq infrastruktur obyektlərinin inşası nəzərdə tutulur. Mövsümi yağıntıların və dağlarda qar örtüyünün əriməsi nəticəsində Dəmiraparan çayında baş verə biləcək daşqın hallarının qarşısını almaq, bununla da qolf meydançasının mühafizəsini təmin etmək məqsədilə çayın sahilində istinad divarları tikiləcək.