Keçid linkləri

2024, 16 Aprel, çərşənbə axşamı, Bakı vaxtı 06:20

Yazıçılar haqqında 3 yeni lətifə


Azadlıq Radiosunun "250Plyus" satirik proqramından "Oxu zalı"na hədiyyə



Baş nazirin müavini, xalq yazıçısı Elçin Əfəndiyevdən müsahibə alan jurnalist soruşur:

- Elçin müəllim, mümkünsə, öz gündəlik iş qrafikiniz barədə məlumat verərdiniz..

- Səhər saat 8-də oyanıram, 9-da səhər yeməyi yeyirəm. Sonra xidməti maşınım məni iş yerimə çatdırır. Saat 11-də qəzetləri nəzərdən keçirirəm. Sonra iclas, iclasdan sonra nahar, nahardan sonra prezidentin yanında müşavirə. Axşam saat 9-də evə qayıdıram Şam edirəm, yatmamışdan əvvəl bir az televizora baxıram.

- Bəs yaradıcılıqla nə vaxt məşğul olursunuz?

- Necə yəni nə vaxt? Ertəsi gün!


***


Romanı "Ən yeni ədəbiyyat" seriyasında çap edilmiş gənc yazıçı qəfil dünyasını dəyişir. Və ona seçim eləmək imkanı verirlər: ya cənnət. ya da cəhənnəm.

Yazıçı qərara gəlir ki, bu yerlərin hər ikisinə baş çəkib hansının daha yaxşı olduğunu yoxlasın.

O əvvəlcə cəhənnəmə enir. Görür ki cərgə-cərgə yazı masalarına zəncirlə bağlanmış yazıçılar cəhənnəm istisində nəfəs dərmədən yazır, dayanan kimi şeytanlar öz tikanlı qırmancları ilə onların kürəklərinə təkrar-təkrar zərbələr endirirlər.

"Aman Allah" - deyə yazıçı dəhşətə gəlir - "İndi də mənə cənnəti göstərin!"

Bu dəfə onu cənnətə aparırlar. Görür ki, burda da cərgə-cərgə yazı masalarına zəncirlə bağlanmış yazıçılar nəfəs dərmədən yazır, dayanan kimi şeytanlar öz tikanlı qırmancları ilə onların kürəklərinə təkrar-təkrar zərbələr endirirlər.

"Bir dəqiqə" - deyə yazıçı təəccübünü gizlətmir - "Daha burayla cəhənnəmin fərqi nə oldu ki?"

"Səhvin var" - qeybdən səs gəlir - "Fərqi odur ki, burda yazılanları nəşriyyat öz hesabına çap edir".


***


Sevgi şeirləri ilə Facebook əhlinin qəlbini ovsunlamış gənc şair Elmar Şahmar dağlarda gəzişərkən böyük bir qoyun sürüsünə rast gəlir.

O, çobana yaxınlaşıb soruşur:

- Əgər saymadan sənin neçə qoyunun olduğunu desəm, birini mənə verərsən?

Çoban düşünür ki, bu, onsuz da mümkün olan iş deyil. Razılaşır.

- 6295

Çoban şoka düşür. Çünki sürüsündə məhz bu qədər qoyunun olduğunu bilir.

Çar-naçar şairin sürüdən bir qoyun seçməsinə razılıq verir.

Elmar Şahmar birini seçib belinə atır. Uzaqlaşmaq istəyəndə arxadan çobanın səsi gəlir:

- İstəyirsən sənin nə peşənin sahibi olduğunu deyim? Təsadüfən şair deyilsən?

- Hardan bildin?

- Əvvəlcə, iti yerə qoy. sonra danışaq.

Həmçinin oxu
Anar, Əkrəm Əylisli, Seymur Baycan və bir uşaq

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG