Azərbaycanın cənubunda yalnız 56 ruhani dini mərasimləri apara bilər. Bu haqda Qafqaz Müsəlmanları İdarəsinin (QMİ) fətva şöbəsinin müdiri Hacı Mirəziz Seyidzadə jurnalistlərə məlumat verib.
QMİ nümayəndəsinin sözlərinə görə, ümumilikdə cənub bölgəsində keçirilən attestasiyada 135 ruhani iştirak etsə də, yalnız 56 ruhaniyə status verilib. Onlar arasında müxtəlif kateqoriyalı ruhanilər var. Belə ki, Biləsuvarda 7, Cəlilabadda 20 nəfərə dini ayinlərin icraçısı, Masallıda 1 nəfərə axund, 12 nəfərə dini ayinlərin icraçısı, Lənkəranda 5 nəfərə axund, 7 nəfərə dini ayinlərin icraçısı, Astarada 1 nəfərə imam, 2 nəfərə dini ayinlərin icraçısı, Lerikdə isə 1 nəfərə axund vəsiqəsi təqdim olunub.
Hacı Mirəziz Seyidzadənin sözlərinə görə, attestasiyadan keçməyən ruhanilər dini mərasimlərdə iştirak edə bilməzlər. Əgər belə bir hal aşkarlanarsa, bu adamlar inzibati qaydada cəzalandırılacaqlar.
Növbəti attestasiya Şirvan, Hacıqabul, Salyan, Neftçala rayonlarında gözlənilir. Artıq bir aydan sonra sözügedən bölgədə imtahanlara başlanılacaq.
Attestasiya 3 kateqoriya üzrə (molla, axund və imam) aparılır. Ən böyük dərəcəli ruhanilər – axundlardır ki, onlar kəbin-talaqdan tutmuş dinlə bağlı bir çox mərasimləri icra edə bilər. İkinci növ vəsiqə daşıyıcıları yalnız ölümlə bağlı mərasimləri - meyit namazı, dəfn, şəri məsələlər və mürəbbiliyi icra edəcək. Üçüncü kateqoriya mollalar isə yalnız Quran oxuyanlardır.
QMİ rəsmisi bildirib ki, attestasiyanın aparılmasında əsas məqsəd Bakı İslam Universitetinin məzunlarını bu sahəyə cəlb etməkdir. Çünki onlar bu prosedurların aparılmasında təcrübəyə və təhsilə sahibdirlər.
