Keçid linkləri

2024, 29 Mart, Cümə, Bakı vaxtı 03:53

Murad Köhnəqala. Arzuma bax sevgilim, Milli mentalitet, Səbət və gilas

















GİLAS VƏ SƏBƏT

Mən hansı bir meymuna
bənzədim ki insanı
meymun onun yanında toya getməli olsun

Mən hansı bir anaya
bənzədim ki tumsatan qadını
doğrudan da onun gələcəyi
perspektivli və parlaq olsun

Mən hansı bir kişiyə
bənzədim ki bizdən yazan qələm dostumuzu
hamımızı dirigözlü güllələtməmiş olsun

Mən hansı bir quşa
bənzədim ki sülhsevər göyərçini
sülhsevərlik ucundan
dimdiyi nura boyanmış olsun

Mən hansı müsəlmana
bənzədim ki xristianı
əlindəki aftafadan
sular çağlamış olsun

Mən hansı bir səbətə
bənzədim ki gilası
arxasından bu qədər
gilas tökülmüş olsun


MİLLİ MENTALİTET

Allah islamı sənə göndərib
ona görə nöyütü sənə verib
özünə sərf etsən öz nöyütünü
pulsuz tualetlər aça bilərsən
ağacların dibi sidik qoxumaz
özünə xərcləsən
öz zərbəçi əməyinlə
aradan qaldıra bilərsən
kişi kimi
yaltaqlığını
sonra paxıllığını
sonra ədabazlığını
neçə ki bu üç milli xislətini
qumar kimi
siqar kimi
araq kimi
atmayacaqsan
sən heç vaxt damkaya çıxmayacaqsan
altındakı sərvətini «fuk» götürəcəklər


ARZUMA BAX SEVGİLİM

Öz səfilliyim haqqında
bəlkə də əfəlliyim haqqında
alman səfirliyinə bəyan edirəm:
mən bir Azərbaycan şairiyəm
çox şerlər yazmışam
Vətənimin zənginliyindən
və cəngəllik qanunlarının ənginliyində bezib azmışam
icazə versəydiniz lütfən
kiçik şəhərlərinizin birində
süpürgəçi işləyərdim gənc ehtirasla
əynimdə al yaşıl yolçu forması
üstündə emblem – alman firması…
alman səhərinin şəfəqlərində
tutardım əlimdə
süpürgəmi, maşamı,
layiqli maaşımı…
icazə verin lütfən
burda ucuz axan şair ömrümü
orda başa vurum şərəf içində…
nə olar lütfən…

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG