| Bu il olduğu kimi, gələn il də Azərbaycanın dövlət büdcəsinin təqribən yarısı neft pulları hesabına formalaşacaq. 2010-cu il üçün büdcə layihəsində deyilir ki, Neft Fondundan dövlət büdcəsinə 4 milyard 915 milyon manat yönəldiləcək. İqtisadi Tədqiqatlar Mərkəzinin sədri Qubad İbadoğlu bildirir ki, gələn il də büdcənin xərclər hissəsinin prioritetləri bu cür olacaq - investisiya, təhsil və müdafiə. Şəffaflığı tez-tez sual altına alınan investisiya xərcləri gələn il azaldılacaq, 3.5 milyard manat olacaq. Bu il həmin rəqəm 4.7 milyard manat idi. MÜDAFİƏ XƏRCLƏRİ ARTMAYIB Gələn ilin dövlət büdcəsində hüquq-mühafizə orqanlarının saxlanması üçün nəzərdə tutulan vəsait bu illə müqayisədə 108 milyon manat artırılıb və 707 milyon manata çatdırılıb. Təhsil və səhiyyə xərcləri isə qismən azalıb. 2010-cu ildə təhsil xərci 1 milyard 276 milyon (2009-cu ildə 1 milyard 353 milyon manat idi), səhiyyə xərci isə 479 milyon manat (2009-cu ildə 508 milyon manat idi) olacaq. Gələn il müdafiə xərclərində ciddi artım olmayacaq, hökumət bu sahəyə 1 milyard 205 milyon manat ayırır. GƏLƏN İL PENSİYA ARTIMI GÖZLƏNİLMİR İqtisadi Tədqiqatlar Mərkəzinin sədri Qubad İbadoğlu hesab edir ki, gələn il pensiyaların artımı gözlənilmir, çünki sosial müdafiə xərcləri artırılmayıb: «Prezidentin Ehtiyat Fondu (2010-cu ildə 160 milyon manat) və büdcənin ehtiyat fondu (2010-cu ildə 100 milyon manat) azaldılıb və bu da yaxşı haldır». BÜDCƏ KƏSİRİ TARİX YAZIB «İqtisadi Forum» jurnalı İqtisadi Təşəbbüslərə Yardım Mərkəzinin ekspertlərinə istinadla yazır ki, 2010-cu ildə büdcə kəsiri də əvvəlki illə müqayisədə 7 dəfə artaraq tarixində ilk dəfə 1 milyard 249 milyon manata çatacaq. 2009-cu ildə büdcə kəsiri 178 milyon manat olub. Büdcə xərcləri növbəti ildə 11 milyard 264 milyon manat proqnozlaşdırılıb. 2009-cu illə müqayisədə büdcə xərcləri 8.8 faiz və ya təqribən 1 milyard manat azalıb. 2010-cu ilin büdcə gəlirləri 10.015 milyard manat proqnozlaşdırılıb ki, bu da 2009-cu illə müqayisədə 18 faiz və ya 2.162 milyard manat azdır. Gələn ilin dövlət büdcəsi müzakirə üçün parlamentə təqdim olunub. Rəsmi dövlət qəzeti «Azərbaycan» oktyabrın 16-da 2010-cu ilin dövlət büdcəsi haqqında qanun layihəsini dərc edib. |
Gələn ilin pulları necə bölüşdürüldü?
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.
Azadlıq Trend
1