Keçid linkləri

2024, 28 Mart, Cümə axşamı, Bakı vaxtı 22:17

«Bloqqerlər azadlığa çıxacaq»


Mikloş Haraşti Bakıya sentyabrın 7-də gəlib. Səfər çərçivəsində o, ombudsman Elmira Süleymanova ilə də görüşüb
Mikloş Haraşti Bakıya sentyabrın 7-də gəlib. Səfər çərçivəsində o, ombudsman Elmira Süleymanova ilə də görüşüb
ATƏT-in media azadlığı üzrə nümayəndəsi Mikloş Haraşti Bakıda bu dəfəki səfərində əsasən onu vurğuladı ki, medianın vəziyyətini yaxşılaşdırmaq üçün birinci növbədə həbsdəki jurnalistlər və bloqqerlər azadlığa buraxılmalıdır.

CAVAB ALA BİLMƏDİM Kİ, REDAKTORLAR NƏ VAXT AZADLIĞA ÇIXACAQLAR
Sentyabrın 10-da keçirdiyi mətbuat konfransında Haraşti dedi ki, Prezident Administrasiyasının şöbə müdiri Əli Həsənov və xarici işlər nazirinin müavini Mahmud Məmmədquliyev qarşısında həbsdəki redaktorlar Eynulla Fətullayev və Qənimət Zahidin azadlığa çıxması məsələsini qaldırıb:

“Dedim ki, birinci növbədə hüquq mühafizə orqanları jurnalistlərin cinayət təqibini dayandırmalıdır. İkinci uğurlu addım həbsdəkiləri azadlığa buraxmaqdır. Amma mən buna cavab ala bilmədim, nə rəsmilərin bu haqda gözləntiləri, nə də ki, jurnalistlərin həbsdən buraxılacaqlarının vaxtı barədə. Amma məsələ gündəmdə qalır və biz redaktorların azadlığını tələb etməkdə davam edirik”.

“ƏLİ HƏSƏNOVDAN İKİ XOŞ XƏBƏR VAR “
Mikloş Haraşti bloqqerlər Emin Milli və Adnan Hacızadə barədə də danışıb, dediyinə görə, Əli Həsənovla söhbət onda belə bir təəssürat yaradıb ki, bloqqerlərin işi müsbət sona yetəcək:

«Prezident Administrasiyasının şöbə müdiri Əli Həsənov mənə dedi ki, administrasiya mənim bu işlə bağlı narahatlığımı bölüşür. Həsənov güman edir ki, hüquqi prosedurun sonunda məsələ müsbət həll olunacaq. Məndə belə bir güclü təəssürat yarandı ki, onun fikrincə, bloqqerlər azadlıqdan məhrum edilməyəcəklər”.

Amma Haraşti deyir ki, Əli Həsənov nikbin danışsa da hər halda o, bir prosesə kənardan baxan müşahidəçidir, son qərarı verən deyil.

HARAŞTİ EMİN MİLLİ VƏ ADNAN HACIZADƏYLƏ GÖRÜŞƏ BURAXILMAYIB
Haraşti bildirib ki, həbsdəki bloqqerlə görüşmək istəyib, amma ona deyiblər ki, hüquqi baxımdan bu, mümkün deyil. Amma ATƏT-in nümayəndəsi həbsdəki redaktorlar Qənimət Zahid və Eynulla Fətullayevin yanına gedib.

Mikloş Haraşti deyir ki, hüquq-mühafizə orqanlarına qəti təlimat verilməlidir ki, onların işi jurnalistlərə qarşı işlərin saxtalaşdırılması yox, media azadlığının qorunmasıdır.

“RADİOLAR FM-Ə QAYITMASA, FİKİR PLÜRALİZMİ BƏRPA OLUNA BİLMƏZ”
ATƏT-in nümayəndəsi bildirib ki, o, xarici radioların FM tezliyinə qaytarılması məsələsini də Əli Həsənovun diqqətinə çatdırıb. AzadlıqRadiosunun «Əli Həsənovun xarici radiolarla bağlı sizə cavabı nə oldu?» sualına cavabında Haraşti deyib:

“Bizim Əli Həsənovla müzakirələrimiz əsasən həbsdəki jurnalistlər və bloqqerlər barədə idi. Qalan məsələləri sadəcə ona sadaladım. Xarici radiolar barədə məsələsi də bu problemlərdən biri idi və Əli Həsənov mənə işarə verdi ki, mənim davamlı olaraq bu məsələni qaldırmağımı qeydə aldı. Mən ona dedim ki, xarici radiolar fm tezliyinə qayıtmadan ölkədə fikir prülarizm bərpa olunmayacaq. Bu o deməkdir ki, o bilir ki, xarici təşkilatlar bu sualı qapanmış saymırlar və hesab edirlər ki, xarici radioların fm-dən getməsi plüralizmə zərbəsir”.

“PREZİDENLƏ GÖRÜŞƏ BİLSƏYDİM, ÇOX ŞAD OLARDIM
AzadlıqRadiosunun «siz prezidentlə görüşmək üçün müraciət etmişdinizmi?» sualına cavabında Mikloş Haraşti deyib ki, o, görüşlər üçün Prezident Administrasiyasına və Xarici İşlər Nazirliyinə müraciət edib, amma administrasiyanın şöbə müdiri Əli Həsənovla görüş mümkün olub:

“Əlbəttə prezidentlə və nazirlə görüşməyimə şad olardım, amma bizə dedilər ki, amma onlarla görüş alınmadı”.

“BÖHTANA GÖRƏ CİNAYƏT MƏSULİYYƏTİ ARADAN QALDIRILA BİLƏR”
Mikloş Haraşti deyib ki, çoxdandır ki, gözlənilən və müzakirə edilən böhtana görə cinayət məsuliyyətinin qaldırılması məsələsi hüquqi həllə yaxındır: “Ən azından Əli Həsənov mənə dedi ki, bu məsələ yaxın zamanlarda həll oluna bilər. Bu çox yaxşı xəbərdir ki, çünki bu ilin əvvəlində media qanunvericiliyi mənfi tərəfə dəyişmişdi, hökumətin mediaya müdaxilə imkanları genişlənmişdi”.

Haraşti əlavə edir ki, bu qanunvericiliyin işlək olması üçün digər qanunlar da dəyişməlidir, “İstəmirik ki, mətbuat orqanları güclü pul cərimələri ilə öldürsünlər”, - deyə Haraşti bildirib.

“BU ÖLKƏDƏ YEGANƏ PLÜRALİST MƏNBƏ İNTERNETDİR, ONU TƏNZİMLƏMƏK DÜZGÜ DEYİL”
M.Haraşti Azərbaycanda internetin tənzimləməsi ilə bağlı qaldırılan məsələyə öz münasibətini bildirib. O, məsələni görüşdüyü rəsmilərin diqqətinə çatdırdığını da deyib. Xüsusi nümayəndə hesab edir ki, internetin tənzimlənməsi mənfi nəticələrə səbəb ola bilər:

“ Bu ölkədə internet yeganə plüralist məlumat mənbəyidir ki, xoşagəlməz tədbirlərə məruz qalmayıb. Bizim mövqeyimiz çox qətidir. Qeydiyyat rejimi internetə şamil edilməməlidir. Başqa halda klassik mediada sözə qoyulan mexaniki şəkildə internetə qədər genişlənməməlidir. Çünki internet sonsuzdur və çap və ya televiziya kimi milli deyil”.

Mikloş Haraşti Bakıya sentyabrın 7-də gəlib. Səfər çərçivəsində o, ombudsman Elmira Süleymanova ilə də görüşüb.
XS
SM
MD
LG