Daxili İşlər NazirliyiMəlumatda bildirilir ki, üzərində müxtəlif dərəcəli bədən xəsarətləri olan 45-50 yaşlı Xanlar Mustafayev Kliniki Tibbi Mərkəzə yerləşdirilib.
DİN-in araşdırmaları zamanı həmin şəxsin «Tac-Mahal» Kooperativi tərəfindən inşa edilmiş 20 mərtəbəli binanın liftinin şaxtasına yıxılması və sonradan kooperativin sədri Ruslan Əkbərovun orda işləyən digər şəxslərlə birgə onu şaxtadan çıxarmaları və izi itirmək məqsədi ilə yaxınlıqdakı məişət tullantıları olan yerə atmaları müəyyən edilib.
Məsələ ilə bağlı aprelin 10-u Nəsimi rayon Polis İdarəsində araşdırmalara başlanıb.
Nəsimi rayon Polis İdarəsinin məsul növbətçisi Rafət Feyziyev «Azadlıq» radiosuna əlavə məlumat verə bilməyəcəklərini bildirib. Onun söözlərinə görə, bu haqda yalnız DİN məlumat verə bilər.
DİN-in mətbuat xidmətinin əməkdaşı Ehsan Zahidov isə «Azadlıq» radiosuna deyib ki, araşdırma yeni başladığından hələlik hər hansı yeni məlumat yoxdur.
Kliniki Tibbi Mərkəzdə olan «Azadlıq» radiosunun əməkdaşına Xanlar Mustafayevin reanimasiya şöbəsinə yerləşdirildiyini bildiriblər. Reanimasiya şöbəsindən növbətçi həkimin verdiyi məlumata görə, onun vəziyyəti ağırdır. Beyin travması alıb və danışa bilmir.
Xanlar Mustafayevə baş çəkməyə indiyə qədər heç kim gəlməyib.
Kliniki Tibbi Mərkəzdə o da məlum olub ki, X.Mustafayev orda naməlum şəxs kimi qeydiyyata alınıb. Yalnız onun liftin şaxtasından yıxıldığını izah edəndən sonra bu xəstənin Nəsimi rayon Polis İdarəsinin əməkdaşları tərəfindən xəstəxanaya gətirildiyini bildiriblər.
