«Bakı-Xəbər» qəzeti xəbər verir ki, ötən bazar Çernoqoriyada keçirilən referendumdan sonra onun müstəqilliyi barədə qərar qəbul edilməsinin, indi Ermənistanın bir çox dairələri Dağlıq Qarabağa da şamil edilməsini istəyirlər. Ermənistanın «Panarmenian» agentliyi bununla əlaqədar yazır ki, indi Yerevan sözügedən Balkan dövlətində hadisələrin inkişafını diqqətlə izləyir. Əsas səbəb isə Ermənistanın perspektivdə Çernoqoriya modelindən Qarabağ münaqişəsinin həllində istinad nöqtəsi kimi istifadə etmək niyyəti güdməsidir. Bu məsələdə Ermənistan hakimiyyəti Rusiyanın dəstəyinə arxalandığını də gizlətmir.
«Üç nöqtə» qəzetindəki «Hündürmərtəbəli binalarda yaşamaq təhlükəli deyil» başlıqlı məqalədə bildirilir ki, yeni tikilən hündürmərtəbəli binaların təhlükəsizlik standartlarına cavab vermədiyi barədə məlumatlar olsa da, Bakı Şəhər İcra Hakimiyyəti həmişə bu ittihamları təkzib edib. Fövqəladə Hallar naziri Kəmaləddin Heydərov isə bir çox hündürmərtəbəli binaların təhlükəsizlik qaydalarına cavab vermədiyini qeyd edib. Onun sözlərinə görə, nazirlik həmin binalarla bağlı araşdırmalar aparmağa başlayıb. Nazir deyir ki, bundan sonra hündürmərtəbəli binalar tikmək istəyənlər təhlükəsizlik tələblərinə ciddi əməl etməli olacaqlar.
İranda yerli azərbaycanlılarla hökümət qüvvələri arasındakı qalmaqalı şərh edən «Şərq» qəzetinin müxbiri yazır ki, Amerikanın İrandakı rejimi dəyişmək, demokratik rejimlə əvəzləmək planı bu hərəkatın belə alovlanmasına stimul verən başlıca amildir. Müəllifin fikrincə, ABŞ-ın İranla qarşıdurmada məhz udan tərəf olacağına qəti inam bu ölkədə yaşayan azərbaycanlıların fəallaşma, mübarizəni sonadək aparma mənbəyinə çevrilib. Odur ki, yaxın vaxtlarda bu hərəkatda hansısa enmə mərhələsinin olacağını düşünmək mənasızdır. Əksinə, hadisələrin zəncirvari getməsi, dinamik şəkildə davam etməsi gözləniləndir.