Keçid linkləri

2017, 18 Oktyabr, çərşənbə, Bakı vaxtı 22:44

Prezidentliyə namizədin vəkili həm də alma satır


Prezidentliyə namizəd Fuad Əliyevin vəkili Mirzəyev Fəxrəddin
Dinlə

Azərbaycan Liberal-Demokrat Partiyasının (ALDP) prezidentliyə namizədi Fuad Əliyevin prezident seçkisinə necə hazırlaşdığını öyrənmək üçün onun seçki qərargahına yollandıq. ALDP-dən qərargahın yerini soruşanda dedilər ki, Bayıl qəsəbəsində Nemanzadə küçəsi - 48 ünvanında yerləşir.

Ancaq Bayılı ələk-vələk etsək də, Nemanzadə-48 ünvanını tapa bilmədik. Bizə polis bələdçilik etdi. Bəlli oldu ki, deyilən ünvan Bayılda yox, 20-ci sahədədir. Qəsəbənin köhnə, uçuq-sökük, palçıqlı yollarında xeyli gəzsək də, qərargahı tapa bilmədik. Axır ki, qəsəbə sakinlərindən biri bizə ipucu verdi:

- Mən burada yaşayanam. Elə bir yer tanımıram. Ancaq burada bir alma satan var, onun vəkilidir. «Moskviç»də alma satır. Sizi onun yanına apara bilərəm.

20-ci sahənin köhnə məhəllə yeməkxanalarından birinin birinci mərtəbəsindəki nimdaş dükanında bir nəfər bizi qarşıladı. Dükanın qabağında yeşiklərdə meyvə-tərəvəz düzülüb. «Qazel» maşınında isə Quba almaları müştərilərini gözləyir:

- Mən «Azadlıq» radiosunun müxbiriyəm. Fuad Əliyevin seçki qərargahını axtarırıq, tapa bilmirik.

- Bir dəqiqə gözləyin…Biz qərargaha təzə köçmüşük, nə məsələ lazımdır, mən kömək etməyə hazıram.

Cibindən MSK-nın vəsiqəsini çıxarıb özünü təqdim edir. Prezidentliyə namizəd Fuad Əliyevin vəkili Mirzəyev Fəxrəddin. Yenə qərargahı soruşuruq. Yuxarıdakı yeməkxananı göstərib sözünə davam edir:

- Biz buranı götürmək istəyirik. Yuxarı tərəfi, ancaq onun yiyəsi burada yoxdur. Gərək danışaq, oranı götürək.

- Deməli, hələ qərargahınız yoxdur?

- Bir dəqiqə gözləyin.

Telefonla kiməsə zəng vurur:

- Qardaş «Azadlıq» radiosundan gəliblər sizi axtarırlar.
Qərargahı hələ ki, tam götürməmisiz də. Varınızdır? Hə, yaxşı, oldu. Qərargah deyir, götürmüşük ikimərtəbəli. Deyir, indi yoldayıq, özümüz gəlib söhbət edərik.

- Olarmı biz ora gedək?

- Buyurun, gedə bilərsiniz.

- Siz bizi müşayiət edə bilərsiniz?

- Bəli, mən sizi müşahidə edə bilərəm, gəlin. Ancaq Vahid müəllim o işlərə baxır. O da Qobustanda seçicilərlə görüşdədir.

- Vahid müəllimə ehtiyac yoxdur, biz ora gedə bilərik?

- Gedəyin.

Bu arada bayaqdan təəccüblə mer-meyvə satıcısının siyasi söhbətlərinə qulaq asan müştərilərdən birinin səbri daralır:

- Biz gözləyək, yoxsa gedək?

Üzrxahlıq edirəm:

- Deyəsən, sizin də alverinizə mane olduq.

- Bunun mənim alverimə heç bir maneçiliyi yoxdur.

Müştəriləri yola salıb yenə seçki söhbətinə qayıdır:

- Siz indi necə fikirləşirsiniz, Fuad Əliyevin seçkidə rəqibi kimdir?

- Əlbəttə ki, İlham Əliyev. İlham Əliyevin ümumiyyətlə rəqibi yoxdur. Azərbaycanda onun alternativini görmürəm.

- Bəs onda seçkiyə niyə gedirsiniz?

- Ona görə gedirik ki…yəni Azərbaycanda gedən ictimai-siyasi işlər, iqtisadiyyatla bağlı şəffaflıq, beynəlxalq siyasətlə bağlı hər şey göz qarşısındadır. Bütün ölkələrdə olduğu kimi, Azərbaycan da seçkiyə getməlidir.

- Deməli, siz seçkiyə yalnız seçki xatirinə gedirsiniz?

- Seçkiyə seçki xatirinə getmirik. Bizim özümüzün milli mentalitetimiz var.

Namizədin vəkili İlham Əliyevin uğurlu siyasətindən danışır və yenə bizi əmin etməyə çalışır ki, Fuad Əliyevin seçki qərargahı var:

- Yaxşı qardaş, seçkiyə çox qısa müddət qalıb, rəsmən vəkili olduğunuz Fuad Əliyevin seçki qərargahı varmı?

- Özünüz dediz də, Nemanzadə - 48.

İki saata yaxın Bayılın və 20-ci sahənin çala-çuxurlu küçələrində maşın sürməkdən bezən taksi sürücüsünün
səbrinin tükəndiyini görüb siyasi söhbətimizə son verirəm. Elə müsahibimi də xeyli müştəri gözləyir.

Sənin fikrin

Şərhləri göstər

Günün bütün mövzuları

XS
SM
MD
LG