Sentyabrın 22-də Azərbaycan və Türkiyənin xarici işlər nazirləri Elmar Məmmədyarovla Əli Babacan Nyu-Yorkda görüşüblər.
Görüş nazirlərin BMT Baş Assambleyasının 63 - cü sessiyasında iştirakı çərçivəsində qeyri - rəsmi formatda baş tutub. Xarici siyasət idarələrinin rəhbərləri ikitərəfli münasibətləri, regiondakı vəziyyət, o cümlədən Ermənistan - Azərbaycan münaqişəsinin nizamlanması üzrə məsələləri müzakirə ediblər.
Görüşdən sonra jurnalistlərə açıqlama verən Əli Babacan bəyan edib ki, Dağlıq Qarabağ münaqişəsinin həlli Türkiyə-Ermənistan ikitərəfli münasibətlərinə müsbət təsir göstərə bilər. Onun sözlərinə görə, Türkiyə-Ermənistan münasibətlərində müsbət yanaşmalar müşahidə olunmaqdadır. 1915-ci il hadisələrini araşdıracaq ortaq tarixi komissiyanın yaradılması təklifinə Ermənistanın müsbət yanaşdığını söyləyən Babacan onu da qeyd edib ki, regionda sabitliyin bərqərar olması üçün, Dağlıq Qarabağ münaqişəsinin nizamlanması vacibdir. ANS
