Azərbaycan Xarici İşlər Nazirliyi oktyabrın 23-də bu qurumun rəhbəri Ceyhun Bayramovun ABŞ Dövlət katibi Mayk Pompeo ilə görüşü barədə məlumat yayıb.
Məlumata görə, nazir Ermənistan-Azərbaycan Dağlıq-Qarabağ münaqişəsində son vəziyyətlə bağlı müzakirə aparıb.
Habelə vurğulandığına görə, o, Ermənistan tərəfinin destruktriv siyasəti, dinc əhalinin məqsədyönlü şəkildə atəşə tutulması, xaricdən muzdluların və terrorçuların kütləvi cəlb olunması barədə ətraflı məlumat verib.
Bayramov və Mnatsakanyan üçtərəfli danışıqlardan imtina ediblər
ABŞ Dövlət katibi Mike Pompeo oktyabrın 23-də Azərbaycan və Ermənistan xarici işlər nazirləri ilə danışıqlara başlayıb.
AFP xəbər verir ki, Pompeo Dövlət Departamentində əvvəlcə azərbaycanlı həmkarı Ceyhun Bayramovla görüşür.
Pompeo bu danışıqlardan sonra Ermənistanın xarici işlər naziri Zohrab Mnatsakanyanla görüşməli idi.
AFP xəbər verir ki, həm Azərbaycan, həm də Ermənistan xarici işlər nazirləri üçtərəfli görüşü istəmədiklərini bildiriblər.
Pompeo bildirib ki, “diplomatik vəziyyət gərgindir”:
"Bizim mövqeyimiz az qala hər bir Avropa ölkəsinin tutduğu mövqe kimidir. Biz onlara demişik ki, deeskalasiya olmalıdır və bütün ölkələr bu münaqişədən aralı durmalı, münaqişəni qızışdırmamalı, tərəflərə silah sistemləri və dəstək verməməlidir”.
Pompeo deyib ki, yalnız belə mövqe şəraitində gərginliyin azaldılmasına nail olmaq olar.
Rusiya prezidenti Vladimir Putin oktyabrın 22-də hər iki tərəfdən 5 min nəfərin həlak olduğunu bildirmişdi.
Pompeo bu yaxınlarda Ermənistanın hazırda müdafiə mövqeyində olduğunu demiş və Azərbaycanın müttəfiqi olan Türkiyənin münaqişəyə müdaxiləsini pisləmişdi.
AFP bildirib ki, Birləşmiş Ştatlarda böyük və siyasi baxımdan fəal erməni diasporası var.
Lakin o əlavə etmişdi ki, ABŞ və Azərbaycvanı strateji maraqlar bağlayır.
HRW hökumətdən cavab gözləyir
"Human Rights Watch" təşkilatı bildirir ki, Azərbaycan hökumətinə müraciət olunub, amma hələ ki, cavab ala bilməyiblər.
Qurumun Avropa və Orta Asiya üzrə direktor köməkçisi Giorgi Gogia AzadlıqRadiosuna deyib ki, hətta ölkəyə gələ bilməyəcəkləri halda belə Azərbaycan tərəfi ilə bağlı da hesabat hazırlayacaqlar, amma bu, daha çox vaxt alacaq və hazırkı hesabat qədər effektiv olmaya bilər: "Bəli, biz hesabatla bağlı narahatıq, çünki bizim hər iki tərəfdə olmaq imkanımız olmayıb. Təbii ki, biz uzaqdan olsa da, araşdırma aparırıq, amma tərəflərdən birinə getmək imkanı olmadığı halda peyk görüntüləri, fotoları təhlil edirik, bütün bunlar kifayət qədər vaxt alır. Bizim ehtiyacımız var ki, şəxsən olay yerində olaq, qurbanlarla şəxsən danışaq, hansı bombanın və məhz hansı istiqamətdən gəldiyini araşdıraq. Bizim hələ ki, bu vacıb sənədləşməni yalnız tərəflərdən birində etmək imkanımız yaranıb".
O, sonda da deyib: "Biz hələ də ümid edirik ki, Azərbaycan hökuməti də bizim üçün belə bir imkanı yaradacaq, çünki bu vacibdir".
13 kəndin işğaldan azad olunduğu bildirilir
Azərbaycan ordusunun bu gün, oktyabrın 23-də Qubadlı, Xocavənd, Cəbrayıl və Zəngilan rayonunun bəzi kəndlərini də işğaldan azad etdiyi bildirilir.
Bu barədə Azərbaycan Prezidenti İlham Əliyev özünün rəsmi Twitter səhifəsində qeyd edib.
"Müzəffər Azərbaycan Ordusu Qubadlı rayonunun Zilanlı, Kürd Mahrızlı, Muğanlı və Alaqurşaq kəndlərini işğaldan azad etmişdir...", - o qeyd edib.
Dövlət başçısı başqa bir paylaşımında da vurğulayıb ki, Xocavənd rayonunun Dolanlar, Bünyadlı, Cəbrayıl rayonunun Dağ Tumas, Nüsüs, Xələfli, Minbaşılı, Veysəlli, Zəngilan rayonunun isə Vənədli və Mirzəhəsənli kəndləri də işğaldan azad edilib.
XİN sözçüsü: ""Human Rights Watch" istəsəydi,..."
"Ermənistan silahlı qüvvələrinin Azərbaycanın mülki əhalisini məqsədyönlü şəkildə atəşə tutması, Gəncəyə raketlərin atılması nəticəsində əhali arasında ciddi itkilərin olması ilə bağlı faktlar, dəlillər toplanıb, hazırlanıb və müvafiq beynəlxalq təşkilatların diqqətinə çatdırılıb".
Bunu Xarici İşlər Nazirliyi mətbuat xidmətinin rəhbəri Leyla Abdullayeva "Human Rights Watch" təşkilatının hesabatı ilə bağlı bildirib.
Beynəlxalq hüquq müdafiə təşkilatı "Human Rights Watch" oktyabrın 23-də hesabat dərc edib. Həmin hesabatda Azərbaycanın Dağlıq Qarabağda yaşayış məskənlərinə qadağan olunmuş kasetli bomba atması ilə bağlı fikirlər yer alıb. Kasetli bombalar qadağan olunub.
Qurum bildirib ki, Azərbaycan hökumətinə yerində araşdırma aparmaq üçün dəfələrlə müraciət etsələr də, onlara, hələlik, müsbət cavab verilməyib.
L.Abdullayeva AzadlıqRadiosunun "niyə "Human Rights Watch"un ölkəyə nümayəndələrini yollamasına müsbət cavab verilmir" sualına isə belə cavab verib: "İstər şəhərlərin, istərsə də mülki əhalinin hədəfə alınması ilə bağlı faktlar, dəlillər ətraflı şəkildə toplanıb və müvafiq beynəlxalq təşkilatların diqqətinə çatdırılıb. Bütün bu faktlar bəllidir, beynəlxalq jurnalistlər tərəfindən də qeydə alınıb. "Human Rights Watch" istəsəydi, həmin o beynəlxalq təşkilatların, beynəlxalq media nümayəndələrinin hesabatlarına, məlumatlarına istinad edə bilərdi".