Gəncənin raket atəşinə tutulması ilə bağlı cinayət işi başlanıb

Gəncə şəhərinin raket atəşinə tutulması ilə bağlı cinayət işi başlanıb.

Bu barədə bu gün, oktyabrın 17-də Baş Prokurorluq məlumat yayıb.

Məlumatda qeyd edilib ki, Ermənistan silahlı qüvvələrinin oktyabrın 17-i, gecə saat 1 radələrində Gəncənin mərkəzi hissəsini raket atəşinə tutması nəticəsində 13 nəfər həlak olub:

“ 45-dən artıq şəxs yaralanıb, çoxsaylı mülki infrastruktur obyektlərinə, nəqliyyat vasitələrinə külli miqdarda ziyan dəyib.”

Qurum bildirib ki, faktla bağlı Azərbaycan Cinayət Məcəlləsinin uygun maddələri ilə cinayət işi açılıb:

“Hazırda hadisə yerində olan prokurorluq əməkdaşları həlak olan və zərərçəkmiş şəxslərin, həmçinin mülki infrastruktur obyektlərinin, nəqliyyat vasitələrinin siyahısının dəqiqləşdirilməsi ilə bağlı istintaq-əməliyyat tədbirlərini davam etdirirlər”

Azərbaycan Fövqəladə Hallar Nazirliyi isə Gəncə şəhərinin raket zərbələrinə tutulması nəticəsində azı 13 nəfərin həlak olduğunu, 52 nəfərin xəsarət aldığını açıqlayıb.

“Biz heç vaxt mülki əhaliyə qarşı müharibə aparmamışıq”

“Bu gün (oktyabrın 17-i) Ermənistanın faşist rəhbərliyi növbəti hərbi cinayət törədib. Gəncə və Mingəçevir şəhərləri raket atəşinə məruz qalıb…”

AZƏRTAC-ın xəbərinə görə, prezident İlham Əliyev bunu xalqa müraciətində bildirib.

Prezidentin əlavə etməsinə görə, birinci dəfə deyil ki, Azərbaycan şəhərləri atəşə məruz qalır:

“Demək olar ki, hər gün Tərtər, Ağdam, Goranboy, Ağcabədi və digər şəhərlərə Ermənistan atəş açır və bu atəş nəticəsində vətəndaşlarımız həlak olur, yaralanır. 2 mindən çox ev dağıdılıb, ya da bu evlərə çox böyük ziyan vurulub”

Prezidentin vurğulamasına görə, ancaq bu hərəkətlər Azərbaycan xalqının iradəsini qıra bilməz.

“Biz heç vaxt mülki əhaliyə qarşı mübarizə, müharibə aparmamışıq, bundan sonra da aparmayacağıq.”, deyə o əlavə edib.

Prezident deyib ki, Azərbaycan xalqı birləşib və həmrəylik, vətənpərvərlik göstərir.

FHN: “Dağıntılar altından xəsarət almış 52 nəfər və 13 cəsəd çıxarılıb”

Fövqəladə Hallar Nazirliyi (FHN) Gəncədə axtarış-xilasetmə işləri ilə bağlı məlumat açıqlayıb. Məlumatda qeyd edilib ki, Ermənistan ordusu oktyabrın 17-də gecə saat 01:00 radələrində döyüş bölgəsindən tamamilə kənarda yerləşən, Azərbaycanın ikinci böyük şəhəri olan Gəncəyə yenidən raket zərbələri endirib, böyük dağıntı və insan tələfatı törədib.

“Bu vaxta qədər dağıntılar altından xəsarət almış 52 nəfər və 13 nəfərin cəsədi çıxarılıb.”, məlumatda vurğulanıb.

Prezident : Füzuli işğaldan azad edilib

Füzuli şəhərinin işğaldan azad edildiyi bildirilir.

Bu barədə oktyabrın 17-i prezident İlham Əliyev xalqa müraciətində bildirib.

Onun deməsinə görə, rayonun 7 kəndi də işğaldan azad edilib.

Prezidentin sözlərinə görə, bunlar Qoçəhmədli, Çimən, Cuvarlı, Pirəhmədli, Musabəyli, İşıqlı və Dədəli kəndləridir.