Çavuşoğlu və Lavrov Qarabağı müzakirə ediblər
Türkiyə və Rusiyanın xarici işlər nazirləri Mevlut Çavuşoğlu və Sergey Lavrov oktyabrın 15-də telefonla danışıblar.
Rusiyanın dövlət TASS xəbər agentliyi Türkiyə Xarici İşlər Nazirliyinə istinadən məlumat yayıb.
Türkiyə XİN-in sözçüsü bildirib:
"Nazirimiz Mevlut Çavuşoğlu Rusiya xarici işlər naziri Sergey Lavrovla danışıqlar aparıb. Bu danışıqlarda Dağlıq Qarabağ, atəşkəsin Ermənistan tərəfindən pozulması, dinc əhaliyə hücumlar, o cümlədən bugün (oktyabrın 15-də) Azərbaycanın Tərtər şəhərində dəfn mərasiminə hücum müzakirə olunub”.
Rusiya XİN-dən verilən məlumatda isə bildirlir ki, tərəflər “problemin dinc yolla çözümünə alternativ olmadığını” vurğulayıbıar.
RT yazır ki, tərəflər oktyabrın 10-da Moskvada atəşkəsə dair əldə olunmuş razılaşmaya əməl olunmasının zəruriliyini təsdiqləyiblər.
Separatçılar ermənilərin Qarabağdan çıxmasına məhdudiyyət qoyur
AzadlıqRadiosunun Erməni xidmətinin verdiyi xəbərə görə Qarabağın separatçı rejiminin başçısı Araik Arutyunyan Dağlıq Qarabağ ərazisində adamların sərbəst hərəkətinə məhdudiyyət qoyub.
Arutyunyan özünün Facebook səhifəsində yazıb ki, onun imzaladığı “fərman” əsasən Dağlıq Qarabağdakı əhalinin oradan çıxmasının qarşısını almaq üçün verilib.
“Fərmanda” bu şəxslər “Artsax Respublikasının vətəndaşları” adlandırılır.
Separtaçıların lideri bildirir ki, adamların Dağlıq Qarabağdan çıxmasının qarşısının alınması üçün xüsusi kommendantlıq yaradılıb.
Sözü gedən “fərmanda” deyilir ki, bu məhdudiyyət separatçı ərazidə səfərbərlik yaşında olanlara şamil edilir.
Prezident 6 kəndin də işğaldan azad olunduğunu açıqladı
Azərbaycan prezidenti İlham Əliyev bu gün, oktyabrın 15-də 6 kəndin işğaldan azad edildiyini açıqlayıb.
"Rəşadətli Azərbaycan Ordusu tərəfindən Füzuli rayonunun Arış, Cəbrayıl rayonunun Doşulu, Xocavənd rayonunun Edişə, Düdükçü, Edilli, Çiraquz kəndləri işğaldan azad edilib...", - o, Twitter səhifəsində yazıb.