Ağdamda yaralılar var
Ağdam rayonun Baharlı qəsəbəsində atəşkəsin pozulması nəticəsində iki nəfərin yaralandığı bildirilir.
Bu barədə bu gün, oktyabrın 15-də Azərbaycan Baş Prokurorluğunun mətbuat xidməti məlumat yayıb. Xidmətdən verilən məlumata görə, oktyabrın 15-i, səhər saatlarından başlayaraq qarşı tərəfin silahlı birləşmələri Ağdam rayonunu müxtəlif istiqamətlərdən intensiv raket və ağır artilleriyadan atəşə tutublar: "Saat 09 radələrində Ağdam rayonu, Birinci Baharlı qəsəbəsində fərdi yaşayış evlərinə mərmi düşməsi nəticəsində 1969-cu il təvəllüdlü Vəliyev Şahsuvar Millət oğlu və 1979-cu il təvəllüdlü Musayev Loğman Yusif oğlu müxtəlif dərəcəli bədən xəsarətləri alaraq xəstəxanaya yerləşdirilib, yaşayış evlərinə isə ciddi ziyan dəyib".
Baş Prokurorluq oktyabrın 14-də isə bildirmişdi ki, sentyabrın 27-dən bəri (cəbhədə döyüşlər başlayandan) Ermənistan silahlı qüvvələrinin açdığı atəşlər nəticəsində Azərbaycan tərəfdən 43 mülki insan həlak olub, təqribən 215-i isə yaralanıb.
Atəş davam edir
"Humanitar atəşkəs rejimini kobudcasına pozan Ermənistan silahlı qüvvələri Goranboy, Tərtər, Ağdam və Ağcabədi rayonlarının ərazilərini atəşə tutur".
Bu məlumatı oktyabrın 15-i səhər saat 8:44-də Azərbaycan Müdafiə Nazirliyi (MN) yayıb.
Nazirlik həmin məlumatdan təqribən 10 dəqiqə öncə isə bunları bildirmişdi: "Oktyabrın 14-dən 15-ə keçən gecə cəbhənin Ağdərə-Ağdam və Füzuli-Hadrut-Cəbrayıl istiqamətlərində əvvəlki günlərdə olduğu kimi, vəziyyət gərgin olaraq qalıb. Ermənistan silahlı qüvvələrinin bölmələri gecə ərzində cəbhənin bəzi istiqamətlərində Azərbaycan Ordusunun mövqelərinə basqın etməyə cəhd göstərib".
"Qarşı tərəf geri çəkilməyə məcbur edilib"
AMN bildirib ki, qarşı tərəf cəbhənin müxtəlif istiqamətlərində geri çəkilməyə məcbur edilib: "Humanitar atəşkəs rejiminə əməl edən qoşunlarımız bütün cəbhə boyu əməliyyat üstünlüyünü saxlayır".
Halbuki, Rusiyanın vasitəçiliyi ilə Azərbaycan və Ermənistan Xarici İşlər nazirləri oktyabrın 9-u və 10-da Moskvada danışıqlar apararaq atəşkəs barədə sənəd imzalamışdılar. Həmin sənədə görə, oktyabrın 10-u saat 12-dən cəbhədə tərəflər arasında atəşkəs əldə edilməliydi.