"Atlantis Armenian Airlines” aviaşirkətinin mülki təyyarələrlə Ermənistana raket daşıdığı bildirilir
Humanitar yardım adı altında “Atlantis Armenian Airlines” aviaşirkətinin mülki təyyarələrlə Ermənistana raket və raket sistemləri daşıdığı bildirilir.
AZƏRTAC-ın xəbərinə görə, bu barədə Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “Twitter”dəki hesabında paylaşım edib.
“Bu, açıq şəkildə Çikaqo Konvensiyası və Beynəlxalq Mülki Aviasiya Təşkilatı qaydalarının pozulması deməkdir”, - deyə Hikmət Hacıyev bildirib.
Amma, hələlik, sözü gedən aviaşirkətdən bu açıqlamaya münasibət almaq mümkün olmayıb.
“Tərtər şəhəri atəşə tutulur”
“Humanitar atəşkəs rejimini kobud şəkildə pozan Ermənistan silahlı qüvvələri oktyabrın 10-u saat 22.30-dan başlayaraq Tərtər şəhərini artilleriya atəşinə tutur.”
Bu məlumatı isə Azərbaycan Müdafiə Nazirliyi (AMN) oktyabrın 10-u saat 22-58-də yayıb.
Azərbaycan və Ermənistan silahlı qüvvələrinin təmas xəttində sentyabrın 27-dən ağır döyüşlərin getdiyi bildirilir. Hər iki tərəfdən itkilər olduğu deyilir. Azərbaycan açıqlayıb ki, son günlər 30-dan çox kəndi, Cəbrayıl şəhərini və Hadrut qəsəbəsini işğaldan azad edib.
“Ermənistan silahlı qüvvələri Ağdam rayonu ərazisini atəşə tutur”
“Atəşkəs rejimini kobud şəkildə pozan Ermənistan silahlı qüvvələri Ağdam rayonu ərazisini atəşə tutur”.
Bu açıqlamanı Azərbaycan Müdafiə Nazirliyi (AMN) oktyabrın 10-u saat 19-50-də yayıb.
Həmin vaxtdan 15 dəqiqə əvvəl isə AMN bildirirdi ki, humanitar atəşkəs rejiminə əməl etməyən Ermənistan silahlı qüvvələrinin bölmələri qüvvə və vasitələri cəmləşdirərək cəbhənin müxtəlif istiqamətlərində hücum etməyə cəhd göstərib.
Qeyd edildiyinə görə, oktyabrın 10-u günorta saatlarında Tuğ kəndi istiqamətindən Hadrut istiqamətində, Aragül və Banazur istiqamətlərindən isə Cəbrayıl istiqamətində hücum etməyə cəhd göstərilib.
Açıqlamaya görə, Azərbaycan silahlı bölmələrinin gördüyü qabaqlayıcı tədbirlər nəticəsində xeyli canlı qüvvə və döyüş texnikasını itirən qarşı tərəf geri çəkilməyə məcbur edilib