M.Çavuşoğlu C.Bayramovla da görüşüb
Azərbaycanda səfərdə olan Türkiyə Xarici İşlər naziri Mövlud Çavuşoğlu oktyabrın 6-da həmkarı Ceyhun Bayramovla da görüşüb.
Görüşdən sonra onlar mətbuat konfransı keçiriblər.
AZƏRTAC-ın xəbərinə görə, C.Bayramov deyib ki, Azərbaycan daim Türkiyənin dəstəyini hiss edib.
M.Çavuşoğlu da deyib ki, Dağlıq Qarabağ Azərbaycanındır.
"İşğal olunmuş ərazilər azad edilməyib və bu günədək qəbul edilmiş qətnamələr yerinə yetirilməyib. Bir milyondan çox azərbaycanlı qardaşımız öz evlərinə dönməyi gözləyirlər. Ermənistan bir sıra yaşayış məntəqələrinə hücum edib. Küncə sıxılan Ermənistan yaşayış yerlərinə atəş açır, hətta Abşerona belə atəş açıb. Bu, müharibə cinayətidir...", - o qeyd edib.
Mövlud Çavuşoğlu Bakıdadır
Türkiyə Xarici İşlər naziri Mövlud Çavuşoğlu bu gün, oktyabrın 6-da Azərbaycana gəlib.
Azərbaycan prezidenti İlham Əliyev oktyabrın 6-da M.Çavuşoğlunun başçılıq etdiyi nümayəndə heyətini qəbul edib.
AZƏRTAC-ın xəbərinə görə, İ.Əliyev deyib ki, Azərbaycan üçün o qədər də asan olmayan bir dönəmdə bu səfər xüsusi önəm daşıyır: "Bu, qardaş ölkənin açıq dəstəyinin təzahürüdür".
Azərbaycan prezidenti əlavə edib ki, Türkiyə bölgədə sabitləşdirici rol oynayır: "Türkiyənin bölgədə və dünyada yalnız sülhə hesablanmış siyasəti artıq öz nəticələrini verməkdədir, həm Yaxın Şərq bölgəsində, eyni zamanda, Qafqaz bölgəsində. Ona görə Ermənistanın növbəti hücumu ilə əlaqədar bu gün yaranmış vəziyyət bir daha onu göstərir ki, Türkiyə həm regionda, həm dünyada söz sahibidir. Əlbəttə ki, bu, bizi gücləndirir, ruhlandırır".
M.Çavuşoğlu deyib ki, "Türkiyənin Can Azərbaycana olan dəstəyini bir daha bütün dünyaya göstərmək üçün buraya gəldim".
O, daha sonra da qeyd edib ki, Azərbaycanın işğal edilmiş torpaqları artıq azad olunmalıdır: "Azərbaycan hüquqi və mənəvi cəhətdən də haqlıdır və bu haqlı mübarizəsini hər yerdə izah edərkən bu mübarizəni də meydanda və masada birlikdə aparmağa, inşallah, davam edəcəyik. Bu gün sizin qəbulunuzdan sonra qardaşım Ceyhunla (Azərbaycan Xarici İşlər naziri Ceyhun Bayramov) bu məsələlərdə necə birlikdə hərəkət edəcəyimizi dəyərləndirəcəyik...".
27 mülki şəxs həlak olub
Baş Prokurorluğun mətbuat xidməti cəbhə bölgəsində mülki şəxslərin itkisi ilə bağlı növbəti açıqlama yayıb.
Oktyabrın 6-sı səhər saatlarında yayılan məlumata görə, cəbhədə vəziyyətin yenidən gərginləşdiyi sentyabrın 27-dən hazırkı vaxtadək qarşı tərəfin yaşayış məntəqələrini atəşə tutması nəticəsində Azərbaycan tərəfdən 27 mülki şəxs həlak olub, 141 nəfər yaralanıb.
ABŞ, Rusiya və Fransa bir daha atəşkəsə çağırırlar
Oktyabrın 5-də Birləşmiş Ştatların, Rusiya Federasiyasının və Fransa Respublikasının hökumətləri Dağlıq Qarabağda atəşkəsə çağıran birgə bəyanatla çıxış ediblər.
ABŞ Dövlət Departamentinin saytında dərc edilmiş məlumatda deyilir ki, Rusiya xarici işlər naziri Sergey Lavrov, Fransa xarici işlər naziri Jean-Yves Le Drian və Birləşmiş Ştatların dövlət katibi Michael Pompeo ATƏT-in Minsk qrupu həmsədr ölkələrinin təmsilçisi olaraq Dağlıq Qarabağ zonasında və onun ətrafında davam edən zorakılığın misli görünməmiş və təhlükəli eskalasiyasını ən sərt bir şəkildə pisləyirlər.
Nazirlər vurğulayıblar ki, Təmas Xətti boyunca, Dağlıq Qarabağdan kənarda, Ermənistan və Azərbaycan ərazisində mülki obyektlərin iddia edilən hədəflənməsi regionun stabilliyinə qeyri-məqbul təhlükə təşkil edir.
Nazirlər həmsədr ölkələrin liderləri tərəfindən oktyabrın 1-də verilmiş birgə bəyanatı xatırladaraq münaqişə tərəflərini dərhal və qeyd-şərtsiz atəşkəsə çağırıblar.
Bəyanatda deyilir ki, həmsədr ölkələr onlara ATƏT və beynəlxal icma tərəfindən verilmiş mandatın gücündən tam istifadə etmək əzmindədirlər.
Nazirlər bildiriblər ki, həmsədrlər tərəflərlə danışıqları davam etdirəcəklər və onları təməl prinsiplər və müvafiq beynəlxalq sənədlər əsasında nizamlama prosesini bərpa etməyə çağırırlar.
Dövlət katibinin müavini Bayramov və Mnatsakanyanla danışıb
Bundan əvvəl ABŞ dövlət katibinin müavini Stephen E. Biegun ayrı-ayrılıqda Azərbaycan və Ermənistan xarici işlər nazirləri Ceyhun Bayramov və Zohrab Mnatsakanyanla telefon söhbəti etmişdi.
Bu barədə məlumatı ABŞ Dövlət Departamentinin sözçüsü Morgan Ortagus verib.
O bildirib ki, cənab Biegun nazirlərə Dağlıq Qarabağ və onun ətrafında gərginliyin eskalasiyasından narahatlığını bildirib və tərəfləri Minsk qrupu həmsədrlərinin vasitəçilyi ilə dərhal atəşkəsə və danışıqların bərpasına çağırıb.
Dövlət katibinin müavini bəyan edib ki, Dağlıq Qarabağ münaqişəsinin hərbi yolla həlli yoxdur.