"Azad edilən ərazilərin bir qarışı belə itirilməyib"
"Ermənistan tərəfi təxribat xarakterli məlumatlar yaymaqda davam edir".
Bunu Azərbaycan Müdafiə Nazirliyinin mətbuat xidmətinin rəisi Vaqif Dərgahlı bildirib. Onun deməsinə görə, Azərbaycan Ordusunun azad etdiyi ərazilərinin bir qisminin Ermənistan ordusu tərəfindən geri qaytarılması barədə yayılan xəbər dezinformasiyadır.
"Bildiririk ki, azad etdiyimiz ərazilərin bir qarışı belə itirilməyib", - mətbuat xidmətinin rəisi vurğulayıb.
Azərbaycan ordusu son günlər 7 kəndi və bir sıra strateji yüksəklikləri işğaldan azad etdiyini açıqlayıb.
Qarşı tərəf isə həmin ərazilərin əsas hissəsinin geri qaytarıldığını açıqlamışdı.
"Gecə bütün cəbhə boyu gərgin döyüşlər davam edib"
"Sentyabrın 28-dən 29-na keçən gecə bütün cəbhə boyu gərgin döyüşlər davam edib".
Bu barədə Azərbaycan Müdafiə Nazirliyi sentyabrın 29-də səhər saat 7:56-da məlumat yayıb.
Məlumatda yazılıb ki, Ermənistan silahlı qüvvələri cəbhənin Füzuli-Cəbrayıl və Ağdərə-Tərtər istiqamətlərində itirdikləri mövqeləri geri qaytarmaq üçün bir neçə dəfə əks-hücuma cəhdi göstərib. Amma açıqlamaya görə, Azərbaycan Ordusunun həmin istiqamətlərdə yerləşən bölmələri uğurla müdafiə olunublar.
Ermənistan ərazisindən Daşkəsən rayonu atəşə tutulur
Sentyabrın 29-da səhər saat 07:30-dan etibarən Ermənistanın Vardenis rayonu ərazisindən Azərbaycanın Daşkəsən rayonunun artilleriya atəşinə tutulduğu bildirilir.
Bu barədə Azərbaycan Müdafiə Nazirliyi (AMN) sentyabrın 28-də səhər saat 7:58-də məlumat yayıb.
"Azərbaycan Ordusu tərəfindən adekvat tədbirlər görüləcək", - nazirlik açıqlayıb.
Füzuli uğurunda döyüşlər getdiyi bildirilir
Sentyabrın 29-u səhər saatlarından etibarən Füzuli şəhərinin işğaldan azad olunması uğrunda Azərbaycan Ordusunun hücumunun davam etdiyi bildirilir.
Bu barədə Azərbaycan Müdafiə Nazirliyi sentyabrın 29-da səhər saat 8-52-də məlumat yayıb.
"Hazırda döyüşlər davam edir", - məlumatda qeyd edilir.