-
Dilqəm
U hərfinin tənhalığı
sizə u hərfinin tənhalığından yazıram,
üşüyürəm yazdıqca da..
əlimdə ə hərfindən qırıqlarla
rəqs etməyə alışqın bir görüntüm var,
nə qalın geyinmək olur bu havada,
nə də qollarını çirmələmək..
gəlin rəqs eləyək səhərə qədər,
u hərfinin tənhalığında..
gəlin günəşə qədər özümüz işıq saçmağı öyrənək
öz kölgəmizdən şəkil çəkib, yad planetlərə göndərək,
salam deyək u hərfinin tənhalığından..
gəlin ölənlərin xatirinə yaşamağı öyrənək
əgər uçmağı bilmiriksə, bu cür darıxmaq da niyə?
üşüyürüksə əgər, öz içimizdə gizlənək..
gəlin birgə ulduzlara çıxaq
u hərfindən uzaq, lap çox uzaq
soruşaq ki, necə görünür ordan u hərfinin tənhalığı..
sizə u hərfinin adından yazıram,
deyir gücüm qalmayıb artıq, yorulmuşam
bu ölkənin payızından..
yorulmuşam deyir, bacarmıram daha
xarabada nə qədər insan var, utanıram hamınızdan
utanıram sizin adınızdan, soyadınızdan,
torpağınızdan, bayrağınızdan, sağınızdan, solunuzdan,
utanıram əlinizdəki rəngli kağızlarınızdan..
darıxanda bir barrel, iki funt darıxıram,
ən çox da buna görə utanıram..
u hərfinin sol yanından yazıram sizə
yazdıqca da soyuq olur,
nə rəqs eləyə bilirsən, nə də mürgüləmək səhərə qədər,
gəlin ölməyi əzbərləyək..
sonrası asandı, əvvəlidi çətin olan
biz əvvəlindəyik hələ,
yaşamaq da asandı hər şeyə rəğmən,
gəlin ölməyi əzbərləyək..
****
qırx yerimdən qırıq kimiyəm, ana
oxşama saçımı,
ondansa öldür məni..
qırx günə keçib gedərəm,
xəbərin olmaz..
qırx gecədir buz kimiyəm, ana
örtmə üstümü,
ondansa qapını aç,
çıxıb gedirəm..
görürsən, buz kimi ağlayıram özü də..
qırx qaşıq suda boğuluram, ana
burax başımı,
onsuz da ölü kimiyəm
adam balası kimi yaşaya da bilmirəm..
həm ölü, həm diri kimiyəm
gah o yana, gah bu yana dönürəm
burax məni, ana, burax
adam balası kimi ölə də bilmirəm..