51 faiz ildə 30 mindən az qazanır
Amerikalıların 51 faizi ilə 30 min dollardan az qazanır. Michael Snyder «WashingtonsBlog»da yazır ki, ABŞ-da orta sinif ölmək üzrədir.
Sosial Təhlükəsizlik Administrasiyası yeni statistika açıqlayıb. Statistikaya görə, ABŞ-da işçilərin 51 faizi ildə 30 min dollardan da az qazanır. «Bu gün Amerikada orta sinfə məxsus ailəni ayda 2500 dollarla saxlamaq mümkün deyil, özəlliklə də həmin məbləğdən vergilər tutulandan sonra. Ancaq təsəvvür edin ki, ölkədəki işçilərin yarıdan çoxu ondan da az qazanır».
Həmin statistikada digər rəqəmlər də diqqət çəkir: bütün amerikalı işçilərin 38 faizi ötən il 20 min dollardan; 62 faizi 40 min dollardan; 71 faizi 50 min dollardan az qazanıb.
İlqar Məmmədovun dişi sındırılıb
Həbsxanada döyülən zaman REAL Hərəkatının sədri İlqar Məmmədovun dişi sındırılıb. Hazırda başağrıları azalıb, durumu yaxşıdır.
Bu barədə AzadlıqRadiosuna oktyabrın 25-də onunla görüşən həyat yoldaşı Vəfa Məmmədova məlumat verib.
Saatın geri çəkilməsi və seçkilər
Bazar günü yay vaxtının ləğvi Türkiyədə əməlli-başlı çaşqınlıq yaradıb. Belə ki, Türkiyə də digər ölkələr kimi saat əqrəblərini bir saat geri çəkməliydi. Ancaq hökumət qərar verib ki, bu dəyişiklik 1 noyabr seçkilərindən sonra həyata keçirilsin.
Bakıda silahlı insident olub
Xətai rayon Polis İdarəsinin əməliyyatçısı güllələnib. Polis zabiti xəstəxanaya yerləşdirilib.
Polis əməkdaşları R.Məmmədov küçəsində şübhəli hesab etdikləri şəxsi, əvvəllər məhkum olunmuş Yevgeny Antonov-u saxlamaq istəyiblər. Bu zaman Y.Antonov «Naqan» tipli tapançadan polislərə 4 dəfə atəş açıb.