Azərbaycanda dini dövlət qurmaqda günahlandırılan 17 nəfərin mühakiməsi başa çatıb. Avqustun 1-də Bakı Ağır Cinayətlər Məhkəməsində onlara hökm oxunub. Hökmə görə, onlardan biri - Nurəddin Xəlilov azadlıqdan ömürlük məhrum edilib. Təqsirləndirilən digər şəxslərdən Müşfiq Mikayılov, Rəşad Həşimli, Əhməd Kərimov, Coşqun Kərimbəyli, Bahadur Məmmədov və Fəxri Şirinzadə - 20 il, Zaur Əliyev və Rufis Bəyimov - 18 il, Pərviz Şıxalıyev, Rəşad Səfərəliyev, Samir Məmmədovvə Niyaməddin Xəlilov - 16 il, Xəlil Məmmədov - 15 il, Ceyhun Abdullayev və Anar Rzayev - 14 il, İlqar Musayev - 13 il 6 ay azadlıqdan məhrum ediliblər.
«UMAR ABİ MUCAİD»?
Adıçəkilən şəxslər silahlı qrup qurmaqda, dövlət quruluşuna qarşı çalışmaqda, dini düşmənçilik salmaqda, qəsdən adam öldürməkdə, oğurluq, quldurluq və terrorçuluqda, eləcə də bir sıra başqa cinayətlərdə ittiham olunurlar. Cinayət işinin materiallarında yazılıb ki, Nurəddin Xəlilov başına sələfiləri toplayıb və «Umar abi Mucaid» ləqəbi götürərək, özünü «əmir» elan edib.
Buna da bax - Müttəhimlər hakimə: 'Biz Allahın hüzurunda mühakimə olunacağıq'
ƏKSƏRİYYƏTİ İFADƏ VERMƏKDƏN BOYUN QAÇIRIB
Təqsirləndirilənlər ittihamlarla razılaşmayaraq, suç işləmədiklərini bildiriblər. Məhkəməyə çıxarılan 17 nəfərin böyük əksəriyyəti ifadə verməkdən boyun qaçıraraq, yalnız «Allahın məhkəməsi»ni əsas saydıqları deyiblər.
Onlar hökm oxunanda da, «Allahu Əkbər» qışqıraraq, Qurandan surələr oxuyub və davranışlarını əsaslandırıblar: «Biz sizin məhkəməni qəbul eləmirik».
