Azərbaycan xəbərləri
Manat yenə azacıq möhkəmləndi
![](https://gdb.rferl.org/13A92CB9-389F-40A1-A9F9-EE869C24CC98_w250_r1_s.jpg)
-
Mərkəzi Bank manatın aprelin 14-nə olan rəsmi məzənnəsini açıqlayıb.
Bankın məlumatına görə, aprelin 14-də bir dollar 1,5218 manata bərabər götürülüb.
Aprelin 13-də bir dollar 1,5264 manat olmuşdu.
Bu həftənin əvvəlindən etibarən manta az da olsa möhkəmlənir.
Bütün xəbərləri izləyin
Məhkəmə 'AbzasMedia işi' üzrə üç jurnalisti həbsdə saxladı
Mayın 9-da Bakının Xətai rayon Məhkəməsində "AbzasMedia" nəşrinin direktoru Ülvi Həsənli, baş redaktoru Sevinc Vaqifqızı və meclis.info onlayn platformasının rəhbəri İmran Əliyevin ev dustaqlığına buraxılması barədə vəsatətlərə ayrıca baxılıb. Prosesə Fuad Axundov sədrlik edib.
Məhkəmə vəsatətləri təmin etməyərək jurnalistləri həbsdə saxlayıb.
Vəkillər bildiriblər ki, jurnalistləri həbsdə saxlamaq üçün maddi, prosessual əsaslar yoxdur və onlar siyasi motivlərlə həbs olunublar.
Məhkəmə qərarlarından apellyasiya instansiyasına şikayət veriləcək.
2023-cü ilin noyabrından 2024-cü ilin yanvarına qədər Azərbaycanda "AbzasMedia işi" ilə əlaqəli səkkiz jurnalist və media əməkdaşı həbs olunub. Onlar qaçaqmalçılıqda ittiham edilirlər. Ümumilikdə isə son aylar ölkədə qaçaqmalçılıq ittihamı ilə 20-yə qədər jurnalist, ictimai fəal həbs edilib. Onların hamısı ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə basqılara məruz qalmır.
Yerli hüquq-müdafiə təşkilatlarının hazırladığı siyahılara görə, hazırda Azərbaycanda ümumilikdə 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri də qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.
Anar Məmmədli evə buraxılmadı
![Anar Məmmədli](https://gdb.rferl.org/AA700AA1-25E2-4F70-8105-B10EF140A3E7_cx0_cy4_cw86_w250_r1_s.png)
Seçkilərin Monitorinqi və Demokratiyanın Tədrisi Mərkəzinin həbsdə olan rəhbəri Anar Məmmədli ev dustaqlığına buraxılmayıb.
Vəkil Elmar Süleymanov "Turan"a bildirib ki, mayın 8-də Xətai rayon Məhkəməsində Məmmədli barəsində seçilmiş həbs-qətimkan tədbirinin ev dustaqlığı ilə əvəz olunması barədə vəsatətə baxılıb, amma təmin edilməyib.
Vəkil qeyd edib ki, müdafiə tərəfi Məmmədlinin həbsi üçün heç bir əsas görmür: "Biz Anar Məmmədli barəsində həbs-qətimkan tədbirinin seçilməsi ilə razı deyilik. Amma madam ki, məhkəmə onun barəsində həbs-qətimkan tədbirini seçib və apellyasiya şikayətimiz da təmin olunmadı, biz Anar Məmmədlinin ev dustaqlığına buraxılması üçün müraciət etmişik".
Süleymanov bildirib ki, Məmmədlinin himayəsində azyaşlı uşağı, səhhəti zəif olan yaşlı anası və atası var: "Eyni zamanda, o, tanınmış hüquq müdafiəçisidir və onun istintaqdan yayınmaq niyyəti yoxdur. Amma, təəssüf ki, məhkəmə bizim əsaslarımızı eşitmədi və vəsatətimizi təmin etmədi".
Vəkilin sözlərinə görə, məhkəmə qərarından apellyasiya şikayəti veriləcək.
Müdafiə tərəfinin açıqlamasına, hələlik, rəsmi qurumlardan münasibət almaq mümkün olmayıb.
Britaniya səfiri Anar Məmmədlinin həbsindən yazdı
Böyük Britaniyanın Azərbaycandakı səfiri Ferqus Old Anar Məmmədlinin həbsi ilə bağlı narahatlığını bildirib.
"Biz Azərbaycanda vətəndaş cəmiyyəti fəallarının, o cümlədən Anar Məmmədlinin həbsindən narahatıq. Biz Azərbaycanı insan hüquqlarının müdafiəsi ilə bağlı beynəlxalq öhdəliklərinə əməl etməyə çağırırıq. Vətəndaş cəmiyyətinə dəstəyimiz Britaniya-Azərbaycan münasibətlərinin əsas sütunudur", - səfir X sosial platformasında yazıb.
Vəkil Anar Məmmədli ilə görüşüb
Vəkil Elmar Süleymanov mayın 1-də 1 saylı Bakı İstintaq Təcridxanasında Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli ilə görüşüb.
Vəkilin sözlərinə görə, Məmmədli özünü normal hiss edir.
Eyni zamanda, Məmmədli ona qarşı irəli sürülən ittihamı rədd edir.
Məmmədlinin başına torba keçirilərək məhkəməyə gətirilməsinə dair sosial şəbəkələrdə yayılan məlumatlara münasibət bildirən vəkil bildirib ki, hüquq müdafiəçisi bu məlumatı təsdiqləməyib: "Anar Məmmədli bildirdi ki, o, məhkəməyə əllərinə arxadan qandal vurulmuş, başı aşağı əyilmiş halda gətirib-aparıblar. Lakin başına torba taxılmayıb".
Məmmədli istintaq təcridxanasında rəftardan şikayəti olmasa da, karantində antisanitar şəraitin olduğunu qeyd edib.
Hələlik, vəkilin bu açıqlamasına rəsmi qurumlardan münasibət almaq mümkün olmayıb.
Anar Məmmədli barəsində 3 ay 28 günlük həbs qərarı verilib
Aprelin 30-da Seçkilərin Monitorinqi və Demokratiyanın Tədrisi (SMDT) mərkəzinin rəhbəri Anar Məmmədli barəsində Xətai rayon Məhkəməsində 3 ay 28 gün müddətinə həbs qətimkan tədbiri seçilib.
Bu barədə vəkil Ramil Süleymanov məlumat verib.
Vəkil qərarı qanunsuz hesab etdiklərini və qərardan apellyasiya şikayəti veriləcəyini bildirib.
Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur, amma ittihamı qurama sayır.
Anar Məmmədlinin həbsinə AŞPA-dan reaksiya: 'Nə indi, nə də yanvarda...'
Almaniyanın Avropa Şurası Parlament Assambleyasındakı (AŞPA) nümayəndə heyətinin sədri Frank Şvabe Anar Məmmədlinin həbsindən sonra Azərbaycanın bu quruma qayıtmasını qeyri-mümkün hesab edir.
"Azərbaycanın Parlament Assambleyasına geriyə yolu yoxdur. Nə indi, nə də yanvarda", - o, X platformasında öz hesabında yazıb.
Şvabe ölkə vətəndaşlarının hüquq və azadlıqlarının pozulmasını səbəb göstərərək Azərbaycan nümayəndə heyətinin AŞPA-da səs hüququndan məhrum edilməsinin təşəbbüskarı olub.
2024-cü ilin yanvarında qış sessiyasında AŞPA üzvləri bu barədə qətnamə qəbul edərək Azərbaycan nümayəndə heyətinin mandatını bir illiyinə dondurub. Qətnamədə deyilir ki, Azərbaycan hakimiyyəti siyasi məhbusları azad etsə və insan hüquqlarının pozuntularına son qoysa, səs hüququ qaytarıla bilər.
Azərbaycan hökuməti təmsilçiləri isə bununla bağlı tənqidləri qərəzli və əsassız sayır.
Anar Məmmədlinin də qaçaqmalçılıqda günahlandırıldığı deyilir
Seçkilərin Monitorinqi və Demokratiyanın Tədrisi (SMDT) Mərkəzinin rəhbəri Anar Məmmədliyə qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürüldüyü bildirilir.
Bu barədə onun yaxınları məlumat verir.
Məmmədlinin ailə üzvləri həmçinin onun "AbzasMedia işi" üzrə prosesə cəlb edildiyini vurğulayıblar.
Onların sözlərinə görə, Məmmədlinin vəkili, hələlik, onunla görüşə bilməyib: "Anar Məmmədli gecəni Xətai rayon Polis İdarəsinin Müvəqqəti Saxlanma Təcridxanasında keçirib. İstintaqı Bakı şəhər Baş Polis İdarəsi aparır".
Hələlik, bütün bu deyilənlərə Daxili İşlər Nazirliyi və başqa rəsmi qurumlardan münasibət almaq mümkün olmayıb.
+++
Birləşmiş Ştatların Azərbaycandakı səfirliyi Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədlinin saxlanmasına münasibət bildirib.
"Azərbaycan vətəndaş cəmiyyəti üzvlərinin - ən son isə Anar Məmmədlinin, - həbslərinin davam etməsi bizi çox narahat edir. Biz Azərbaycan hökumətini haqsız yerə həbs olunan bütün şəxsləri dərhal azad etməyə çağırırıq", - ABŞ səfirliyinin mətbuat katibi Vanessa Zenci "Amerikanın Səsi"nin sorğusuna cavabda bildirib.
Məmmədlinin atasının evində də axtarış aparılıb
Aprelin 29-da Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin öz evi ilə yanaşı, atasının evində də axtarış aparıldığı bildirilir. (O da Bakı şəhərindədir)
Məmmədlinin bacısı Şəfa Məmmədli "Amerikanın Səsi" radiosuna deyib ki, atasının evindən köhnədən qalan sənədlər aparılıb: "Həmçinin, guya Anarın köynəyinin cibindən çıxan qəbzləri, mənim kompüterimi, fleş-kartımı götürüblər. Axtarışdan sonra Anarın evində də oldum. Onun kompüterini, telefonunu aparıblar. Bir də biz hesab edirik ki, pul qoyublar. Anarın evində pulun bağlandığı iplər qalıb".
***
Seçkilərin Monitorinqi və Demokratiyanın Tədrisi Mərkəzinin sədri Anar Məmmədlinin "AbzasMedia işi" çərçivəsində istintaqa şahid qismində cəlb edildiyi bildirilir.
Bunu vəkil Elçin Sadıqov deyib. Amma, hələlik, bu məlumatı rəsmi qurumlar təsdiqləməyiblər.
Son aylar Azərbaycanda aralarında AbzasMedia nəşrinin rəhbərliyi və bir neçə əməkdaşı da daxil 20-yə qədər jurnalist, ictimai fəal qaçaqmalçılıq ittihamı ilə həbs edilib. Onlar ittiham ilə razılaşmır, bunu peşə fəaliyyətləri və siyasi sifarişlə izah edirlər. Amma rəsmilər də bildirir ki, ölkədə heç kim sırf peşə fəaliyyətinə görə siyasi sifarişlə həbs edilmir.
+++
Anar Məmmədlinin saxlanması ilə yanaşı, onun Bakı şəhərində evində axtarış başladığı bildirilir.
Bu barədə onun yaxınları məlumat verib.
+++
Vəkil Anar Məmmədli ilə görüşə bilmir.
Vəkil Elçin Sadıqovun bildirməsinə görə, orderi və vəsiqəsi ilə birlikdə Məmmədlinin evinə yaxınlaşsa da, polis görüşə, habelə axtarış götürmədə iştirakına icazə vermir.
Vəkilin dediklərinə Azərbaycan Daxili İşlər Nazirliyindən, hələlik, münasibət almaq mümkün olmayıb.
DİN təsdiqləyir
Seçkilərin Monitorinqi və Demokratiyanın Tədrisi Mərkəzinin sədri Anar Məmmədlinin saxlanmasını Daxili İşlər Nazirliyi (DİN) Mətbuat xidmətinin əməkdaşı İbrahim Əmiraslanlı da təsdiqləyib. O, "Turan"a bildirib ki, Məmmədli barəsində araşdırma aparılır, əlavə məlumat veriləcək
Anar Məmmədli saxlanıb
Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli saxlanıb.
Bu barədə onun yaxınları məlumat verib.
Onların sözlərinə görə, Məmmədlini aprelin 29-da saat 15 radələrində Bakı şəhəri, Teymur Əliyev küçəsində mülki geyimli şəxslər saxlayaraq naməlum istiqamətə aparıblar.
Xatırlatma
Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədli bundan əvvəl 2013-cü ilin sonlarında saxlanıb. O, vergidən yayınma və başqa ittihamlar ilə 5 il 6 ay müddətə həbs edilib. Amma ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar.
Məmmədli 2016-cı il martın 17-də əfv sərəncamı ilə azadlığa buraxılıb.
SMDT o azadlığa çıxdıqdan sonra da fəaliyyət göstərib. Azərbaycanda bir çox seçkilərin monitorinqini aparan bu təşkilatın hesabatları, bir qayda olaraq, tənqidi xarakter daşıyıb.
Azərbaycan rəsmiləri isə ölkədə seçkilərin azad və ədalətli keçirilmədiyinə aid tənqidləri qəbul etmir.
Məhkəmə Qubad İbadoğlunun üzərindən elektron qolbağı çıxarmaqdan imtina edib
![Qubad İbadoğlu ev dustaqlığına buraxıldıqdan sonra](https://gdb.rferl.org/01000000-0aff-0242-69a3-08dc645380e7_w250_r1_s.jpg)
Mayın 7-də Bakının Nərimanov rayon Məhkəməsində Azərbaycan Demokratiya və Rifah Partiyasının (ADR) sədri Qubad İbadoğlunun üzərindən elektron qolbağın çıxarılması barədə vəsatətə baxılıb.
"Xahiş etdik ki, Qubad İbadoğlunun üzərindən elektron bilərziyi çıxarsınlar. Buna ehtiyac yoxdur. O, Kompüter Tomoqrafiyası (KT) və Maqnetik Rezonans Tomoqrafiya (MRT) müayinəsindən keçməlidir, elektron cihaz isə maneə yaradır. Bundan əlavə, Qubadda şəkərli diabet var və qan dövranının pisləşməsi səbəbindən uzun müddət cihaz taxmaq toxuma nekrozuna səbəb ola bilər",- qardaşı Qalib Bayramov deyib.
Onun sözlərinə görə, məhkəmə vəsatəti təmin etməyib, bu qərardan apellyasiya şikayəti veriləcək.
Məsələ ilə bağlı rəsmi qurumlarla danışmaq mümkün olmayıb.
Qubad İbadoğlunun ayağına elektron qolbaq taxılıb
Mayın 4-də Sumqayıtda polis əməkdaşları məhkəmənin qərarını icra edərək ötən ay ev dustaqlığına buraxılan Azərbaycan Demokratiya və Rifah Partiyasının (ADR) sədri Qubad İbadoğlunun ayağına onun hərəkətlərinə məsafədən nəzarət etməyə imkan verən elektron qolbaq bağlayıblar.
Q.İbadoğlunun qanuni təmsilçiləri deyirlər ki, Azərbaycanda elektron nəzarət hətta məhkəmə qərarı ilə də nisbətən az hallarda tətbiq olunur. Onun qardaşı Qalib Toğrul məsələ ilə bağlı bunları deyib: "Gördüyünüz kimi, qardaşıma xüsusi münasibət göstərilir. Polis Qubadoğlunun istintaq təcridxanasında 9 ay saxlandığı zaman zədələnmiş ayağını bu cür "müalicə" edir".
Bu arada 50-dək beynəlxalq təşkilat, habelə Oksford, Kembric, Ekseter, Susseks, Nottinqem, Lankaster, Nyukasl, Dublin universitetlərin professorları London İqtisadiyyat Məktəbinin baş elmi işçisi, doktor Q.İbadoğlu ilə əlaqədar Böyük Britaniyanın xarici işlər naziri Devid Kemerona məktub göndəriblər. Həmin məktubda nazirdən İbadoğlunun işinə dəstək verilməsi istənilir.
Qubad İbadoğlu: 'Heç bir cinayət törətməmişəm'
Qubad İbadoğlu ona qarşı irəli sürülən ittihamlar üzrə özünü təqsirli bilmədiyini söyləyib. Onun sözlərinə görə, həbsi siyasi sifariş idi: "Mən həmişə fəaliyyətimi qanun və Konstitusiya çərçivəsində göstərmişəm. Heç bir cinayət törətməmişəm".
İbadoğlu bildirib ki, səhhətində problemlər var: "Mən həbs olunanda şəkərli diabet, onurğada, ürək-damar sistemində problem var idi. Həbsdə o problemlər daha da dərinləşdi, çünki qapalı şəraitdə saxlanırdım. Ev dustaqlığına buraxılmağımın səbəbi, yəqin ki, elə də budur".
O, eyni zamanda yerli və beynəlxalq ictimaiyyətin, medianın onun ev dustaqlığına buraxılmasında böyük rolu olduğunu deyib.
Q.İbadoğlunun bu dediklərinə, hələlik, rəsmilərin münasibətini almaq mümkün olmayıb. Amma rəsmilər, bir qayda olaraq, ölkədə siyasi həbslərlə bağlı deyilənləri qəbul etmirlər.
Qubad İbadoğlu ev dustaqlığına buraxılıb
Bundan əvvəl verilən xəbərdə deyilirdi ki, Azərbaycan Demokratiya və Rifah Partiyasının (ADR) sədri Qubad İbadoğlunun həbsi ev dustaqlığı ilə əvəz olunub. İstintaq müddətində o, ev dustaqlığında olacaq.
Bu barədə vəkil Bəhruz Bayramov məlumat verib.
Onun sözlərinə görə, vəsatətə bu gün, aprelin 22-də Nərimanov rayon Məhkəməsində baxılıb.
Vəkil vurğulayıb ki, məhkəmə müdafiə tərəfinin arqumentləri ilə razılaşaraq vəsatəti təmin edib.
Q.İbadoğlu məhkəmədən sonra evinə gedə biləcək.
B.Bayramov AzadlıqRadiosuna açıqlamasında deyib ki, müdafiə tərəfi vəsatətdə Q.İbadoğlunun səhhətinə diqqət çəkib. Vəkillər hesab edir ki, həm ittihamlar əsassızdır, həm də onun səhhəti həbsdə saxlanmasına imkan vermir.
Xatırlatma
Q.İbadoğlu ötən il iyulun 23-də həbs olunub. O, Cinayət Məcəlləsinin (CM) 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma) və həmin maddənin əlavə olaraq 3.1-ci (eyni əməllər mütəşəkkil dəstə tərəfindən törədildikdə) bəndi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.
Siyasətçi irəli sürülən bütün ittihamları saxta adlandırıb. Bir sıra beynəlxalq təşkilatlar da Azərbaycan hökumətini Q.İbadoğlunun işinə obyektiv baxmağa, onun hüquqlarının qorunmasına çağırıblar.
ADR dövlət qeydiyyatından keçməyib.
Zaqatalada kütləvi zəhərlənmə...
![Ambulans](https://gdb.rferl.org/7085EA51-8798-4985-8A1A-288E48153DE8_cx0_cy7_cw0_w250_r1_s.jpg)
Dünən, mayın 7-də Zaqatala rayonunda aralarında uşaqlar da olmaqla bir çox şəxslərin səhhətində pisləşmə qeydə alınıb.
"Turan"ın məlumatına görə, yerli xəstəxanaya qısa zaman kəsiyində 40 nəfərə yaxın sakin tibbi yardım üçün müraciət edib.
Mayın 8-də Tibbi Ərazi Bölmələrini İdarəetmə Birliyindən (TƏBİB) də agentliyə deyilib ki, dünən saat 17:40-dan başlayaraq zəhərlənmə şübhəsi ilə 34 nəfər Zaqatala rayon Mərkəzi Xəstəxanasının Təcili yardım şöbəsinə daxil olub: "Onlardan 15-i uşaqdır. Hər birinə zəruri tibbi xidmət göstərilib, 16 nəfər artıq evə buraxılıb. Digərlərinin vəziyyəti stabil olaraq qiymətləndirilir və gün ərzində evə buraxılmaları nəzərdə tutulur".
Azərbaycan Qida Təhlükəsizliyi Agentliyindən isə bildirilib ki, Zaqatalada baş verən hadisənin səbəbləri, həmçinin qida zəhərlənməsi olub-olmaması ilə bağlı araşdırmalar başlanılıb.
Baş Prokurorluğun Mətbuat xidmətindən də verilən məlumata görə, artıq bu məsələ ilə bağlı Zaqatala rayon Prokurorluğunda araşdırma aparılır.
Səhhətləri pisləşən şəxslər və ya onların yaxınları ilə danışmaq mümkün olmayıb.
ToplumTV-nin əməkdaşı Elmir Abbasov polisdə ifadə verib
![Elmir Abbasov](https://gdb.rferl.org/01000000-c0a8-0242-7811-08dc6ea518b0_cx0_cy16_cw0_w250_r1_s.jpg)
“Toplum” internet televiziyasının əməkdaşı Elmir Abbasovun mayın 7-də Bakı Şəhər Baş Polis İdarəsində "Abzas Media" işi üzrə ifadə verdiyi bildirilir.
Bu barədə onun özü məlumat verib.
Abbasovun sözlərinə görə, ona verilən müəyyən sualları cavablandırıb. O, iltizam sənədinə imza atdığına görə, sualların nə ilə bağlı verildiyini açıqlaya bilməyəcəyini qeyd edib. Dindirmə onun dediyinə görə, təxminən saat yarım çəkib.
O, hər hansı təzyiqlə üzləşmədiyini bildirir.
Məsələ ilə bağlı Daxili İşlər Nazirliyi ilə isə danışmaq mümkün olmayıb.
Elmir Abbasov "Toplum TV işi” üzrə təqsirləndirilən şəxs qismində tanınıb. Onun barəsndə polis nəzarəti qətimkan tədbiri seçilib
Son aylar Azərbaycanda aralarında “Toplum” internet televiziyası, habelə “Abzas Media” nəşrinin əməkdaşları da olmaqla müəyyən qruplar halında 20-yə qədər jurnalist, ictimai fəal qaçaqmalçılıq ittihamı ilə həbs edilib.
Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə, siyasi sifarişlə basqılara məruz qalmır.
Yerli hüquq-müdafiə təşkilatlarının hazırladığı siyahılara görə, hazırda Azərbaycanda ümumilikdə 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə, mühakimə ediliblər.
ABŞ səfiri: 'Mən Şuşada olmaqdan xoşbəxtəm'
![Səfir Mark Libbi və xanımı Şuşada](https://gdb.rferl.org/01000000-c0a8-0242-a6a5-08dc6dcecf9b_cx0_cy1_cw0_w250_r1_s.jpg)
Amerika Birləşmiş Ştatlarının (ABŞ) Azərbaycandakı səfiri Mark Libbi bu gün, mayın 6-da Şuşa şəhərinə səfər edib.
"Mən bu gün Şuşada olmaqdan xoşbəxtəm", - bu barədə Libbi Cıdır düzündən yayımladığı videomüraciətində bildirib.
"Biz iki aya yaxındır ki bu səfərə hazırlaşırdıq və mən şadam ki, bu səfər, nəhayət ki, baş tutdu… Qonaqpərvərliyinizə görə təşəkkür edirəm… Azərbaycanın bütün bölgələrinə səfərlərimi davam etdirməyi səbirsizliklə gözləyirəm", - səfir qeyd edib.
Mayın 3-də ABŞ-ın Azərbaycandakı səfiri Libbiyə jurnalistlərlə keçirilən dəyirmi masada Şuşa şəhəri işğaldan azad olunandan (2020) sonra niyə bir çox səfirlərdən fərqli olaraq oranı ziyarət etməməsi ilə bağlı sual ünvanlanmışdı. Səfir zamanı çatanda Şuşanı ziyarət edəcəyini bildirmişdi. Bununla bağlı hökumətyönlü mediada səfirə qarşı genişmiqyaslı kampaniya başlamışdı...
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycan ərazilərinin təqribən 20 faizinə nəzarəti itirmişdi. Amma 2020-ci ildə 44 günlük müharibə və ötən il Qarabağda birgünlük hərbi əməliyyatlar nəticəsində rəsmi Bakı bütün ölkə ərazisində suverenliyinin bərpa olunduğunu açıqlayıb.
Ötənilki birgünlük hərbi əməliyyatı Bakı "lokal antiterror tədbirləri", Yerevan isə "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü başlayıb.
Almatı görüşünün tarixi açıqlanıb
![Ceyhun Bayramov və Ararat Mirzoyan](https://gdb.rferl.org/01000000-0a00-0242-e979-08dc383efac4_w250_r1_s.jpg)
Azərbaycan və Ermənistan xarici işlər nazirlərinin Qazaxıstanın Almatı şəhərində gözlənilən görüşünün tarixi açıqlanıb.
Bu barədə Azərbaycan Xarici İşlər Nazirliyinin (XİN) sözçüsü Ayxan Hacızadə məlumat yayıb.
Onun sözlərinə görə, görüş mayın 10-da Almatıda baş tutacaq.
Amma, hələlik, görüşün dəqiq gündəliyi açıqlanmır.
Bir müddət öncə Azərbaycan və Ermənistan rəsmiləri belə bir görüşün keçirilməsinə razılıq verildiyini bildirmiş, lakin onun tarixinin, hələlik, bəlli olmadığı vurğulanmışdı.
Son illər bu iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb. Üstəlik, ötən ildən başlayaraq iki ölkə arasında birbaşa danışıqlar da gerçəkləşib. Hazırda iki ölkə arasında sərhədlər müəyyənləşdirilməkdədir.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilmişdi. Amma 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib.
Bakı, üstəlik, ötən il sentyabrın 19-20-də Qarabağda "lokal antiterror tədbirlər" elan edib. Yerevan bunu "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü olub.
İsa Qəmbər yenidən başqan seçilib
![İsa Qəmbər](https://gdb.rferl.org/01000000-0aff-0242-2a8a-08dc6c2e04d7_cx0_cy9_cw0_w250_r1_s.jpg)
Mayın 4-də Müsavatın XI qurultayında 10 ildən sonra İsa Qəmbər yenidən bu partiyanın başqanı seçilib. 289 nümayəndədən 275-i onun lehinə səs verib.
İ.Qəmbər çıxışı zamanı dinc demokratik keçid üçün iqtidarla ictimai saziş təklifi ilə çıxış edib: "Vəziyyət kifayət qədər ağırdır... Hakimiyyətlə cəmiyyət arasında, hakimiyyətlə müxalifət arasında ictimai saziş olmalıdır".
Xatırlatma
Müsavat Partiyası 1911-ci ildə yaradılıb. Azərbaycan Xalq Cümhuriyyəti (1918-1920) parlamentində çoxluqda olub. Rusiya işğalından sonra mühacirətdə fəaliyyətini davam etdirib.
1992-ci ildə Müsavat Partiyasının Azərbaycanda Bərpa mərkəzi yaradılıb. Milli Məclisin ovaxtkı sədri İ.Qəmbər partiyanın başqanı seçilib. 1993-cü ildən Müsavat müxalifətdədir. 2014-cü ilə kimi partiyaya İ.Qəmbər rəhbərlik edib.
Azərbaycanda media azadlığı 13 pillə geriləyib
![2024 Dünya Mətbuat Azadlığı İndeksi](https://gdb.rferl.org/01000000-0aff-0242-1d8b-08dc6b3500cc_cx5_cy0_cw87_w250_r1_s.png)
"Sərhədsiz Reportyorlar"ın illik media azadlığı reytinqinə əsasən, rekord sayda ölkədə vəziyyət xeyli pisləşib.
Həmin ölkələr sırasında Azərbaycan və Gürcüstan da var.
Azərbaycan 180 ölkə arasında 164-cü yerdə qərarlaşıb. Ötən illə müqayisədə ölkə 13 pillə geriləyib. Ermənistan, əksinə, göstəricisini 6 pillə yaxşılaşdıraraq 43-cü yerə yüksəlib.
"Şərqi Avropa və Mərkəzi Asiyada, xüsusən də Belarusda (167), Gürcüstanda (103), Qırğızıstanda (120), Azərbaycanda (164) Rusiyanın repressiv üsullarının effektiv yamsılaması ilə media senzurası güclənib", - hesabatda bildirilir.
Mətbuat azadlığı ilə bağlı ən yaxşı vəziyyət Norveç, Danimarka və İsveçdədir. Siyahını Eritreya bağlayır.
"Sərhədsiz Reportyorlar"ın müşahidələrinə görə, bütün dünyada media azadlığı ilə bağlı durum sürətlə pisləşməkdə davam edir. Jurnalistlərə qarşı hücumların, iş şəraitinin "fəlakətli" kimi dəyərləndirildiyi ölkələrin sayı artmaqdadır.
Hesablamalara görə, ötən il 36 ölkə müstəqil jurnalistikanın əməli cəhətdən qeyri-mümkün olduğu ölkələr kateqoriyasına düşüb. Bu, son 10 ilin rekordu sayılır.
Xatırlatma
Son aylar Azərbaycanda 10-a yaxın jurnalist, əsasən, qaçaqmalçılıq ittihamı ilə həbsə atılıb. Onlar ittihamları qəbul etmir, onu peşə fəaliyyətləri ilə izah edirlər.
Azərbaycan hakimiyyəti isə ölkədə jurnalistlərə təzyiqlə bağlı deyilənləri rədd edir, onların konkret cinayətlərə görə həbs olunduğunu vurğulayır.
'Hökumətlə dialoqlarda jurnalist həbslərindən narahatlığımızı, gözləntilərimizi çatdırırıq’
![Peter Mixalko](https://gdb.rferl.org/01000000-0aff-0242-f321-08dc6a9ecc9f_cx0_cy9_cw0_w250_r1_s.jpeg)
Avropa İttifaqının (Aİ) Bakıdakı nümayəndəliyinin rəhbəri Peter Mixalko deyir ki, Azərbaycanda jurnalistlərin həbsilə bağlı narahatlıqlarını hökumətlə dialoqda mütləq çatdırırlar.
O, Ümumdünya Mətbuat Azadlığı Günü münasibətilə mayın 2-də jurnalistlərlə görüşüb.
"Üçüncü ildir ki, Ümumdünya Mətbuat Azadlığı Günü münasibətilə jurnalistlərlə görüşmək fürsətim olur. Təəssüf ki, ötən il bizimlə olan jurnalistlərin bəzilərini bu dəfə burada görə bilmirik, axı həbs olunublar. Biz həmin jurnalistləri yaddan çıxarmamaqla bu görüşü keçiririk", - yenə P.Mixalkonun dilə gətirdiyi sözlərdir.
Səfir onu da deyib ki, Avropa Ittifaqı Azərbaycanın ən fəal tərəfdaşlarındandır və bu tərəfdaşlıq dəyərlərə, ortaq prioritetlərə əsaslanır.
"Biz… gözləntilərimizi çatdırırıq"
Müstəqil medianın, azad jurnalistlərin istənilən cəmiyyət üçün vacibliyini vurğulayan diplomat Azərbaycanın bu sahədə üzərinə götürdüyü öhdəliyi də yada salıb. Jurnalistlərin son həbslərinin narahatlıq doğurduğunu söyləyən P.Mixalko hökumət qurumları ilə dialoqlarında da bu öhdəliyi xatırlatdıqlarını bildirib: "Azərbaycan üzərinə öhdəliklər götürüb və biz də tərəfdaş olaraq, gözləntilərimizi çatdırırıq. Bu problemlər aktual olduğu müddətdə Avropa Birliyi o məsələləri qaldıracaq. Hazırda bu məsələlər özəlliklə vacibdir, axı Azərbaycan COP29-a ev sahibliyi edəcək, bütün dünyanın diqqəti burada baş verənlərə yönələcək".
Səfir Azərbaycanla Ermənistan arasındakı münasibətlər haqda sualı cavablandırarkən deyib ki, Avropa Birliyi Cənubi Qafqazda sülh və rifah olmasını istəyir. O, delimitasiya ilə bağlı tərəflər arasındakı razılaşmanı alqışladıqlarını vurğulayıb.
P.Mixalko əlavə edib ki, minatəmizləmə prosesində Azərbaycana dəstək verən əsas tərəfdaşı Avropa İttifaqıdır.
Onun sözlərinə görə, müstəqilliyin ilk illərindən başlanan dəstək bu gün də davam edir: "Minatəmizləmə prosesi ilə bağlı Azərbaycana dəstəyimiz üç istiqamətdədir: minaların təmizlənməsi, proseslə bağlı maarifləndirmə kampaniyaları və qurbanlara dəstək".
Məzahir Pənahovdan erkən seçki anonsu...
![Məzahir Pənahov prezidentliyə namizədlik vəsiqəsini İlham Əliyevə təqdim edir (Foto arxiv)](https://gdb.rferl.org/986D46D7-38A9-480F-B169-1615FED1108E_cx0_cy15_cw0_w250_r1_s.jpg)
"Qanunvericiliyə əsasən, bu ilin noyabrında parlament seçkiləri olmalıdır, ancaq seçkilərin müddəti önə də çəkilə bilər".
"Turan"ın xəbərinə görə, bunu bu gün, mayın 2-də Mərkəzi Seçki Komissiyasının (MSK) iclasında qurumun sədri Məzahir Pənahov bildirib.
Pənahov bunu seçkilərin noyabrda Azərbaycanda keçiriləcək COP29-la (BMT-nin İqlim Dəyişikliyi Konfransı) eyni vaxta təsadüf etməsi ilə əlaqələndirib: "Bu səbəbdən seçkilərin önə çəkilməsi barədə qərar verilə bilər".
Müxalifətdə olan Müsavat Partiyasının başqanı Arif Hacılı xatırladır ki, parlament seçkilərinin erkən keçirilməsi barədə məlumatlar ölkədə çoxdandır dolaşır: "Görünür ki, seçkilər iyul-avqust aylarında keçiriləcək. Bu, COP29 beynəlxalq tədbirin noyabrda keçirilməsi ilə izah edilir. Məhz ona görə də seçkilərlə bağlı hazırlıq işləri artıq başlayır".
AXCP: "Sovet vaxtında keçirilən seçkilərə bənzəyir"
Azərbaycan Xalq Cəbhəsi Partiyasının (AXCP) sədr müavini Seymur Həzi isə bildirib ki, seçkilərlə bağlı tələbləri onların keçirilmə müddəti ilə bağlı deyil: "Mövcud seçki qanunvericiliyinin beynəlxalq standartlara cavab verməməsi ilə bağlıdır. Mövcud seçki qanunvericiliyi ilə demokratik seçkiləri keçirmək mümkün deyil. Ona görə də həm qanunvericilik, həm də seçkiqabağı və seçki zamanı insan haqları ilə bağlı vəziyyət dəyişməlidir. Hazırda seçkilərə hakim Yeni Azərbaycan Partiyası nəzarət edir və bu, faktiki olaraq birpartiyalı, sovet vaxtında keçirilən seçkilərə bənzəyir".
Xatırlatma
Azərbaycanda son parlament seçkiləri 2020-ci il fevralın 9-da olub. Onda MSK dörd dairədə pozuntular olduğunu bildirərək nəticələri ləğv etmişdi. Həmin dairələrdə indiyə kimi seçkilər keçirilməyib. Azərbaycanda həm sonuncu parlament, həm də prezident seçkiləri növbədənkənar keçirilib. Parlament seçkilərinin 2020-ci ildə təqribən altı ay önə çəkilməsi "islahatların sürətləndirilməsi" ilə izah edildi.
Gələn il keçirilməsi nəzərdə tutulan prezident seçkisinin bu il fevralın 7-nə təyin edilməsinə isə ölkənin bütün ərazilərində suverenliyin bərpası səbəb göstərilmişdi. Rəsmilər deyirdilər ki, bu tarixi prosesdən sonra ölkədə ilk seçkilərin prezident seçkisi olmasını vacib sayırlar.
Bu il Azərbaycanda, qanunvericiliyə əsasən, bələdiyyə seçkiləri də keçirilməlidir.
Müxalifət partiyaları isə həm parlament, həm də prezident seçkilərinin önə çəkilməsini hakimiyyətin azad, ədalətli yarışa hazır olmaması və bu üzdən seçkiləri tez-tələsik keçirmək istəməsi ilə izah edib.
ATƏT-in Demokratik Təsisatlar və İnsan Haqları Bürosunun müşahidə missiyası da Azərbaycanda son seçkilərdə bir çox pozuntuların baş verdiyini açıqlayıb. Amma rəsmilər tənqidləri qəbul etmir.
Jurnalist müalicə müəssisəsinə köçürülüb
![Əziz Orucov](https://gdb.rferl.org/96C674CF-E809-4784-8195-CC712B8F8993_w250_r1_s.jpg)
"Kanal 13" internet televiziyasının həbsdə olan rəhbəri Əziz Orucovun səhhətində problemlər yarandığı bildirilir.
Bu barədə vəkil Bəhruz Bayramov məlumat verib. Onun sözlərinə görə, jurnalistin əsəbləri pozulub: "Əlləri əsir, əsəbləri pozulub. Əziz qapalı şəraitdə qala bilmir, dərhal vəziyyəti pisləşir".
Vəkil qeyd edib ki, Ə.Orucov Ədliyyə Nazirliyinin Baş Tibb İdarəsinin müalicə müəssisəsinə köçürülüb, hazırda müalicə alır.
Vəkilin bu açıqlamasını, hələlik, Ədliyyə Nazirliyinin Baş Tibb İdarəsindən dəqiqləşdirmək mümkün olmayıb.
1 aprel
Əziz Orucovun apellyasiya şikayəti təmin edilmədi
"Kanal 13" internet televiziyasının rəhbəri Əziz Orucovun həbs-qətimkan tədbirinin uzadılması ilə bağlı Səbail rayon Məhkəməsinin qərarından verilən apellyasiya şikayəti təmin edilməyib.
Bu barədə jurnalistin həyat yoldaşı Lamiyə Orucova məlumat verib.
Səbail rayon Məhkəməsinin həmin qərarı martın 19-da qəbul edilmişdi. Onda həm Ə.Orucovun, həm də bu televiziyanın əməkdaşı Şamo Eminovun ilkin həbs müddəti uzadılmışdı.
L.Orucova Ə.Orucov ilə bağlı Səbail və Bakı Apellyasiya məhkəmələrinin qərarlarını əsassız sayır: "Noyabrdan bir dənə də olsun istintaq hərəkəti aparılmayıb".
Bu açıqlamaya, hələlik, istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.
Ə.Orucov ötən il noyabrın 27-də saxlanıb və qanunsuz tikinti aparmaqda ittiham olunub, məhkəmə onu ilkin olaraq üç ay müddətinə həbs edib. Sonra həbs müddəti uzadılıb. Dekabrın 19-da ona qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə yeni ittiham irəli sürülüb.
"Kanal-13" ilə əməkdaşlıq edən jurnalist Ş.Eminov isə dekabrın 22-də saxlanıb və qaçaqmalçılıq ittihamı ilə həbs edilib.
Azərbaycanda son aylar 10-a qədər jurnalist tutulub. Onların çoxuna qaçaqmalçılıq ittihamı verilib. Onlar ittiham ilə razılaşmırlar və onu peşə fəaliyyətləri ilə izah edirlər. Amma rəsmilər də ölkədə jurnalistlərin sırf peşə fəaliyyətlərinə görə həbs olunmaları ilə bağlı deyilənləri qəbul etmirlər.
Veteranlara 2 min manat ödəniləcək
Prezident İlham Əliyev İkinci Dünya müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden, habelə medallarla təltif edilmiş şəxslərə birdəfəlik maddi yardım verilməsi haqqında sərəncam imzalayıb.
Yardımın məbləği 2 min manat nəzərdə tutulub. Bundan ötrü Prezidentinin ehtiyat fondundan 3 milyon manat ayrılacaq.
1939-1945-ci illəri əhatə edən İkinci Dünya müharibəsində SSRİ-nin tərkibində olan Azərbaycan SSR-dən ümumilikdə cəbhəyə 600 min insanın yola salındığı, onlardan təqribən yarısının həlak olduğu bildirilir.
ABŞ Rusiyaya köməyə görə Azərbaycan şirkətlərinə sanksiyalar qoydu
![ABŞ Maliyyə Nazirliyi](https://gdb.rferl.org/f8aeaed6-a800-4c06-884a-4be4fe55ec0f_w250_r1_s.jpg)
ABŞ Maliyyə Nazirliyi mayın 1-də Rusiyanın hərbi maşınını və ona sanksiyalardan aşmaqda kömək edən vahid və fərdləri hədəfləyən sanksiyalar elan edib.
Məlumatda deyilir ki, bugünkü sanksiyalar Rusiyanın hərbi sənaye bazasını və onun kimyəvi-bioloji silahlarını, üçüncü ölkələrdə Rusiyaya kömək edən şirkət və fərdləri hədəfləyir.
Bu da vurğulanır ki, bu hədəflərdən 60-ı Azərbaycanda, Belçikada, Slovakiyada, Türkiyədə və Birləşmiş Ərəb Əmirliklərində (BƏƏ) yerləşir.
Qeyd edilir ki, bu şirkətlər Rusiyanı çox ehtiyacı olduğu texnologiya və avadanlıqla xaricdən təchiz ediblər.
Əliyev təchizat şəbəkəsi
ABŞ Maliyyə Nazirliyinin məlumatında deyilir ki, Yevgeni Əliyev Rusiya hərbi sənayesi ilə bağlı şirkətlərin koordinasiya şəbəkəsinin təchizat agentidir.
Sənəddə vurğulanır ki, Əliyevin təchizat şəbəkəsinə Lahıc Energy MMC, GMM FZE və GMM Management şirkətləri daxildir.
Sanksiya məlumatına görə Azərbaycanda mənzillənmiş Lahıc Energy şirkəti 2023-cü ildə Rusiyanın ABŞ tərəfindən sanksiyalanmış texnologiya istehsalçıları üçün işlər görüb.
GMM FZE və GMM Management şirkətləri BƏƏ-də mənzillənirlər və sanksiyalanmış Rusiya şirkətləri adından iş aparıblar.
Cahangir Yevgenyeviç Əliyev (Cahangir Əliyev) Lahıc Energy şirkətinin direktoru və Yevgeni Əliyevin oğludur.
Sözü gedən şirkət və şəxslər sanksiya xəbəri ilə bağlı hələ ki, heç bir şərh verməyiblər.
BŞİH Milli Şuranın mitinqini yenə 'məqsədəuyğun' saymadı
![Cəmil Həsənli](https://gdb.rferl.org/C1AF9645-3918-4FB3-B125-01CE9B98D347_cx0_cy5_cw0_w250_r1_s.jpg)
Bakı Şəhər İcra Hakimiyyəti (BŞİH) Milli Şuranın mayın 5-də keçirmək istədiyi mitinqlə bağlı müraciətinə də müsbət cavab verməyib.
Bu barədə Demokratik Qüvvələrin Milli Şurasının rəhbəri Cəmil Həsənli bildirib.
Onun vurğuladığına görə, cavabda qeyd edilib ki, göstərilən ərazilərin birində təmir işləri aparılır, qalan iki yerdə isə nəqliyyat intensiv hərəkət etdiyindən toplantıların keçirilməsi tıxacların yaranmasına səbəb olacaq.
Cəmil Həsənli cavabı vətəndaşların Konstitusiya hüququnun və sərbəst toplaşmaq azadlığının pozulması sayır.
Milli Şura sədrinin bu dediklərinə BŞİH-dən əlavə münasibət almaq mümkün olmayıb.
Bundan əvvəl
Bundan əvvəl BŞİH Milli Şuranın aprelin 21-də mitinq keçirmək istəyini də eyni amillərdən bəhs edərək ( aksiya üçün təklif edilən yerlər dəyişməyib) “məqsədəuygun” saymamışdı.
Milli Şura isə bunu sərbəst toplaşmaq azadlığının pozulması kimi dəyərləndirərək eyni tələblərlə təkrar müraciət göndərmişdi.
Milli Şura müraciətində şəhərin, əsasən, mərkəzi ərazilərində üç yer təklif edərək onların birində aksiya keçirmək niyyətini bildirmişdi. Aksiyada azad, ədalətli seçkilərin keçirilməsi, siyasi məhbusların azadlığa buraxılması və korrupsiya ilə mübarizəyə aid tələblərin səslənəcəyi açıqlanmışdı.
Azərbaycan rəsmiləri isə ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus siyahılarında yer alan şəxslər sırf törətdikləri əmələ görə məsuliyyətə cəlb ediliblər.
Üstəlik, onların vurğulamasına görə, ölkədə korrupsiya ilə mübarizədə siyasi iradə mövcuddur.
Xatırlatma
Milli Şura Azərbaycanda sonuncu kütləvi aksiyasını 2019-cu ilin yanvarında keçirib.
Ondan sonra BŞİH Milli Şuraya təklif etdiyi yerlərdə yenə tıxacların yaranacağını və başqa oxşar amilləri səbəb göstərərək aksiya keçirməyi “məqsədəuyğun” saymamışdı.
Əvəzində Milli Şuraya Lökbatan qəsəbəsindəki stadion təklif edilmişdi. Amma Milli Şura da həmin stadionun şəhərdən kənarda olduğunu əsas gətirərək orada aksiya keçirməkdən imtina etmişdi.
2020-ci ilin əvvəllərindən isə koronovirus pandemiyası ilə bağlı ölkədə karantin rejimi tətbiq edilib.
Artıq kütləvi tədbirlərin keçirilməsi ilə bağlı məhdudiyyətlər aradan qaldırılsa da, karantin rejimi tam götürülməyib.
Mərkəzin üç vəzifəli şəxsi rüşvətdə şübhəli sayılır
![Baş Prokurorluq](https://gdb.rferl.org/01160000-0aff-0242-8b63-08da747a8a7f_cx0_cy0_cw98_w250_r1_s.jpeg)
Baş Prokurorluq və Səhiyyə Nazirliyinin mayın 1-də yayılan birgə məlumatında Respublika Sanitariya-Karantin Mərkəzinin baş direktoru Saleh Novruzi, direktor müavini Yadulla Balışov və Laboratoriya şöbəsinin müdiri Tahir Vəliyevin istintaqa cəlb edildiyi bildirilir. Həmin şəxslərin nümunələr götürülmədən məhsulların gigiyenik sertifikatlaşdırılması əvəzində ayrı-ayrı vətəndaşlardan külli miqdarda rüşvət almalarına əsaslı şübhələr yarandığı iddia olunur.
Onlar Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrar və külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə təqsirləndirilirlər: "Hər üç şəxsin yaşı, səhhəti nəzərə alınmaqla barələrində... məhkəmənin qərarı ilə ev dustaqlığı (əsas) və vəzifədən kənarlaşdırma (əlavə) növündə qətimkan tədbirləri seçilib".
Hələlik, birgə açıqlamaya sözügedən şəxslər və onların vəkillərindən münasibət almaq mümkün olmayıb.
Həmin ittihamlar üzrə 12 ilə qədər həbs cəzası nəzərdə tutulur.
Aprelin 30-da Baş Prokuror yanında Korrupsiyaya qarşı Mübarizə Baş İdarəsi Səhiyyə Nazirliyinin tabeliyində fəaliyyət göstərən Respublika Sanitariya-Karantin Mərkəzində əməliyyat keçirib.
400 miqrant Rusiya vətəndaşlığından məhrum edilib
![Rusiya pasportu](https://gdb.rferl.org/01000000-0a00-0242-a437-08db549e0d61_cx0_cy2_cw0_w250_r1_s.jpg)
Son altı ayda Rusiya hakimiyyət orqanları müxtəlif cinayətlərə görə 398 vətəndaşlıq almış şəxsi vətəndaşlıqdan məhrum edib. Bu barədə TASS Daxili İşlər Nazirliyinə istinadən xəbər verir.
2023-cü ilin oktyabrında qüvvəyə minmiş qanuna görə, şəxs Rusiya ordusunu nüfuzdan salma, saxta məlumat yayma, təxribat, fərarilik, ölkəyə qarşı sanksiyalara çağırışlar, casusluq, dövlətə xəyanət, "xarici agentlər" haqqında qanunun pozuntusu və arzuolunmaz təşkilatlarda iştirak kimi hallar üzrə hökm əsasında vətəndaşlıqdan məhrum edilə bilər.
Vətəndaşlıq banditizm, cinsi istismar, saxta pul hazırlamaq, cinayətkar birlik təşkil etməyə görə də ləğv oluna bilər.
2024-cü ilin martında bildirildi ki, Rusiya ordusu haqqında "saxta" məlumatlar yaydığına görə 6 il azadlıqdan məhrum edilən Krasnodar sakini Aleksandr Somryakov vətəndaşlıqdan məhrum olunub. Bu, sözügedən maddə ilə vətəndaşlıqdan məhrumetmə ilə bağlı ilk hal idi.
Ümumilikdə Rusiya vətəndaşlığından çıxarılma ilə bağlı ilk hadisə isə 2023-cü ilin dekabrında baş verib. Moskva Daxili İşlər Nazirliyi iki nəfərin narkotik maddə olan bağlamalarla saxlanıldığını, mühakimə olunduğunu (cəzanın müddəti göstərilmir) və onların vətəndaşlıqdan məhrum edildiyini bildirib.
Mərkəzi Bank yenə uçot dərəcəsini endirdi
![AMB](https://gdb.rferl.org/01000000-0aff-0242-d6c2-08db26bddd0c_cx0_cy8_cw0_w250_r1_s.jpg)
Azərbaycan Mərkəzi Bankı (AMB) uçot dərəcəsini 0.25 faiz bənd azaldıb.
Qurumun İdarə Heyətinin mayın 1-də açıqlanan qərarı ilə uçot dərəcəsi 7.5 faizdən 7.25 faizə endirilib.
Mərkəzi Bankın yaydığı məlumatda bildirilir ki, bu qərar faktiki və proqnozlaşdırılan inflyasiyanın hədəflə (4±2%) müqayisəsi, inflyasiya gözləntilərinin stabilləşməsi, risk balansında baş verən dəyişikliklər nəzərə alınmaqla verilib.
Dövlət Statistika Komitəsinin bu ilin mart ayı üzrə yaydığı məlumata görə, Azərbaycanda illik inflyasiya 0.4 faiz olub.
AMB bundan əvvəlki bir neçə qərarında da uçot dərəcəsini endirib.
İqtisadi nəzəriyyəyə görə, uçot dərəcəsi ölkədəki iqtisadi vəziyyət və inflyasiya səviyyəsi nəzərə alınaraq təyin edilməlidir. Əgər inflyasiya yüksəlirsə, səlahiyyətli qurum uçot dərəcəsini yüksəldir, çünki bu şəkildə dövriyyədə olan pul kütləsini tənzimləmək - azaltmaq siyasəti həyata keçirir. Əksinə, inflyasiya endikcə, uçot dərəcəsi də endirilir.
Uçot dərəcəsi aşağı olarsa, kredit faizləri aşağı düşməlidir. Amma Azərbaycanda Mərkəzi Bank uçot dərəcəsini azaltsa da, kredit faizləri bir elə də düşmür. Müstəqil ekspertlər deyirlər ki, ölkədə iqtisadi institutlar zəif olduğu üçün Mərkəzi Bankın və onun faiz dərəcəsinin iqtisadiyyatda ciddi rol almasında problemlər var.
'Tərtər işi' haqda kitabın müəllifi evinə basqın olduğunu bildirir
![Abid Qafarov](https://gdb.rferl.org/09690000-0a00-0242-07c3-08da64e428f7_cx0_cy6_cw83_w250_r1_s.jpg)
İctimai fəal Abid Qafarova məxsus, Bakının Şüvəlan qəsəbəsindəki evə aprelin 29-da basqın olduğu deyilir.
Bu barədə A.Qafarovun özü məlumat verib.
Ötən il xarici ölkələrdən birinə köçən fəalın sözlərinə görə, evdə yaşayan yaşlı qayınana və qayınatasına mülki geyimli şəxslər təzyiq göstərib.
O hesab edir ki, bu hadisə müəllif olduğu "Andaluniya" adlı kitabla əlaqəlidir.
Onun sözlərinə görə, aprelin 27-də Azərbaycanda keçirilən sərgidə həmin kitabın 42 nüsxəni mülki geyimli şəxslər müsadirə edib. Həmin kitabda 2017-ci ildə baş verən Tərtər hadisələri təsvir edilib.
Onun bu dediklərinə, hələlik, hüquq-mühafizə orqanlarından münasibət öyrənmək mümkün olmayıb.
A.Qafarov özü 2022-ci il iyulun 13-də Yasamal rayon Məhkəməsinin qərarı ilə 1 il müddətinə azadlıqdan məhrum edilmişdi. O, çıxışlarında müharibə veteranlarına qarşı böhtan və təhqirdə günahlandırılırdı. Müdafiə tərəfinə görə, Qafarov internetdəki çıxışında veteranları təhqir etməyib, sadəcə ad çəkmədən öz hüquqları uğurunda mübarizə aparmadıqlarına görə onları qınayıb. Qafarov da özünü təqsirli bilmirdi və "Tərtər işi"ni araşdırdığına görə sifarişlə həbs olunduğunu bildirirdi. O, ötən il iyunun 1-də azadlığa çıxıb və sonra xaricə gedib.
"Tərtər işi" barədə...
2017-ci ildə Ermənistana casusluqda ittiham olunan bir qrup hərbi qulluqçu və mülki şəxs həbs edilmişdi. Onlar barəsində dövlətə xəyanət maddəsi ilə cinayət işi açılmışdı. Zərərçəkənlər və onların yaxınları həbs olunanların ağır işgəncələrə məruz qaldıqlarını bildirirlər. Müstəqil hüquq müdafiəçiləri bu işdə 10-dan çox şəxsin öldürüldüyünü deyirlər. İstintaq zamanı həyatını itirən şəxslərdən ölümündən sonra bəraət alanlar olub.
Cinayət işi yenilənəndən sonra...
2021-ci ilin dekabrında – "Tərtər işi" üzrə icraat yenilənəndən sonra toplam 452 nəfər zərərçəkmiş qismində tanınıb. İşgəncə verməyə görə cinayət məsuliyyətinə cəlb olunanlardan bütövlükdə üç qrup üzrə 13 nəfərin işi məhkəməyə göndərilib.
Dörd nəfərlik bir qrupun məhkəməsi ötən il noyabrın 29-da yekunlaşıb. Hökmə əsasən, Tərtərdəki N saylı hərbi hissənin komandiri olmuş polkovnik-leytenant Vüsal Ələsgərov, hərbi hissənin qərargah rəisi Rəşid Niftəliyev və müddətdən artıq xidmət etmiş (MAXE) hərbi qulluqçu Ramil Qarayevin hər birinə 5 il 6 ay həbs cəzası kəsilib. Onlar işgəncəvermə, vəzifə səlahiyyətlərini aşma, hərbçilərin qanunsuz həbsi kimi əməllərdə suçlu sayılıblar. Daha bir MAXE Rüstəm Ələsgərovun cəzası daha ağır – 9 il 6 ay olub.
Adı çəkilənlərin heç biri özünü təqsirli saymır.
Dörd və beş nəfərlik daha iki qrupun məhkəmələri davam edir.
Ələsgər Məmmədli hospitala aparılıb, qaytarılıb
![Ələsgər Məmmədli](https://gdb.rferl.org/037c0000-0aff-0242-9341-08da1bcb2880_w250_r1_s.jpg)
"Toplum" internet televiziyasının həbsdə olan təsisçisi Ələsgər Məmmədlinin aprelin 26-da Daxili İşlər Nazirliyinin (DİN) hospitalına köçürülsə də, saatlar sonra yenidən 1 saylı Bakı İstintaq Təcridxanasına qaytarıldığı bildirilir.
Bu barədə qardaşı Nəsimi Məmmədli məlumat verib. Onun sözlərinə görə, aprelin 24-də Xətai rayon Məhkəməsində istintaq orqanı Ə.Məmmədlinin hospitala yerləşdirilməsi məsələsini öz üzərinə götürüb: "Aprelin 26-da Ələsgəri DİN-in hospitalına köçürüblər. Deyiblər ki, müayinə olunacaq və, yəqin ki, orada qalacaq, çünki prosedur belədir. Hospitalda qardaşımın qan analizini götürsələr də, biopsiya prosedurunu həyata keçirməyiblər. Bir neçə saatdan sonra heç bir səbəb göstərmədən onu yenidən istintaq təcridxanasına qaytarıblar".
N.Məmmədli qeyd edib ki, Ə.Məmmədlinin səhhətində olan problemlər qalır: "Boğulmalar var, vəziyyəti heç də yaxşı deyil. Həm də narahatdır ki, qalxanabənzər vəzində şiş getdikcə böyüyür".
Vəkil Aqil Layıc da "Turan"a bildirib ki, müdafiə tərəfi məhkəməyə verilən ev dustaqlığı ilə bağlı vəsatəti Ə.Məmmədlinin hospitala köçürülməsi vədindən sonra geri götürüb: "Bir neçə gün gözləyəcəyik. Ələsgər bəy hospital köçürülməyəcəyi təqdirdə yenidən ev dustaqlığı üçün müraciət edəcəyik. Onun səhhətindəki problem müalicə tələb edir, o da həbs şəraitində mümkün deyil".
Bütün bu açıqlamalara, hələlik, DİN və başqa rəsmi tərəflərdən münasibət almaq mümkün olmayıb.
Ələsgər Məmmədli ilə bağlı vəsatət geri götürülüb, səbəb...
Aprelin 24-də Xətai rayon Məhkəməsində "Toplum" İnternet Televiziyasının həbsdə olan təsisçisi Ələsgər Məmmədlinin ev dustaqlığına buraxılması ilə bağlı müdafiə tərəfinin vəsatətinə baxılıb.
Bu barədə "Turan"a vəkil Aqil Layıc məlumat verib. Onun sözlərinə görə, Ə.Məmmədli prosesdə bildirib ki, bu, hüquqdan daha çox humanitar məsələdir: "Biz dəfələrlə Penitensiar Xidmətə, Ədliyyə Nazirliyinin Baş Tibb İdarəsinə müraciət etmişik ki, Ələsgər bəyin hospitalda müalicə almasına şərait yaradılsın. Hətta istintaqı aparan orqan - Daxili İşlər Nazirliyinə müraciət etmişik ki, nazirliyin hospitalında müalicə almasına şərait yaradılsın. Məhkəmədə də onu bildirdik".
A.Layıc qeyd edib ki, Ədliyyə Nazirliyinin Baş Tibb İdarəsinin məktubu var və həmin məktubda Ə.Məmmədlinin heç bir problemi olmadığı göstərilir: "Bu, yalandır. Ələsgər bəy həbs olunmazdan əvvəl müayinəyə getmişdi, çünki onun qalxanabənzər vəzində şiş getdikcə böyüyürdü. Bu məsələləri də biz məhkəmədə bildirdik".
Vəkilin sözlərinə görə, məhkəmədə istintaq orqanı bu məsələlərin həllini öz üzərinə götürüb və bu səbəbdən müdafiə tərəfi vəsatəti geri çəkib.
Hələlik, bu açıqlamaya Daxili İşlər Nazirliyi və başqa aidiyyəti qurumlardan münasibət almaq mümkün olmayıb.
Ələsgər Məmmədlinin səhhətinin ağırlaşmaqda olduğu deyilir
"Toplum" İnternet Televiziyasının təsisçisi, 1 saylı Bakı İstintaq Təcridxanasında saxlanan Ələsgər Məmmədlinin səhhətinin pisləşməkdə davam etdiyi bildirilir.
Bu barədə aprelin 8-də onunla görüşən qardaşı Nəsimi Məmmədli məlumat verib. Qardaşının sözlərinə görə, Ə.Məmmədli çox halsız olub, kəskin baş ağrısından əziyyət çəkdiyini söyləyib: "Bütün gecəni yata bilmədiyini bildirdi. Uzanıqlı halda nəfəs almağa çətinlik çəkir. Boğazındakı şişə görə boğulma hissi ona normal yatmaq imkanı vermir. Qalxanvarı vəzinin boyun hissəsində 23 millimetr ölçüdə düyün var. Qan təzyiqi 90-170 arasında yüksəlib".
N.Məmmədli deyib ki, bir həftə öncə qardaşından qan analizi götürülüb. Onun vurğulamasına görə, götürülmüş qan analizinin nəticəsində bəzi problemlər üzə çıxıb: "Amilaza analizi çox yüksək, 333 olub (norma 220-dən az olmalıdır), xolesterinin miqdarı 250 olub (norma 200-dən az olmalıdır). Bundan əlavə, mədəaltı vəzidə problem aşkara çıxıb. Həkimlər yenidən müalicə təyin ediblər və ona yeni dərmanlar veriləcək".
Müdafiə tərəfi hətta Ə.Məmmədlinin səhhəti ilə bağlı ev dustaqlığına buraxılması ilə bağlı məhkəməyə müraciət də edib. Amma martın 29-da Xətai rayon Məhkəməsi vəsatəti təmin etməyib.
Ə.Məmmədli bu il martın 8-də saxlanıb. Martın 9-da Xətai rayon Məhkəməsi onun barəsində 4 aylıq həbs-qətimkan tədbiri seçib. O, qrup halında qaçaqmalçılıqda ittiham olunur. Ə.Məmmədli ittihamı qəbul etmir.
Xatırlatma
Son aylar Azərbaycanda aralarında "Toplum” İnternet Televiziyasının əməkdaşı da olmaqla 20-ə yaxın jurnalist, ictimai fəal həbs edilib. Onların çoxu qaçaqmalçılıqda ittiham edilirlər.
Həmin şəxslər də ittiham ilə razılaşmır, onu peşə fəaliyyətləri ilə bağlı, siyasi hesab edirlər. Amma rəsmilər ölkədə siyasi həbslərin olması ilə bağlı deyilənləri əsassız sayırlar.
Blinken Azərbaycanda 'haqsız yerə' həbs olunanları azad etməyə çağırır
![Antoni Blinken və İlham Əliyev](https://gdb.rferl.org/08720000-0a00-0242-5aea-08da06a8f3cf_cx3_cy0_cw96_w250_r1_s.jpg)
Amerika Birləşmiş Ştatları (ABŞ) dövlət katibi Antoni Blinken aprelin 28-də Ermənistan baş naziri Nikol Paşinyan və Azərbaycan prezidenti İlham Əliyev ilə ayrı-ayrı telefonla danışıb.
Dövlət Departamentinin sözçüsü Metyu Millerin açıqladığı bəyanatlarda Blinkenin telefon söhbətləri zamanı Azərbaycan və Ermənistanın Almatı bəyannaməsinə (1991) əsasən iki ölkə arasında sərhədin delimitasiyası ilə bağlı razılığa gəlməsini alqışladığı bildirilir.
Nikol Paşinyana zəng
"Dövlət katibi Antoni Blinken Ermənistanın baş naziri Nikol Paşinyan ilə danışıb. ABŞ-ın Ermənistan və Azərbaycan arasında davamlı və ləyaqətli sülh sazişinə doğru irəliləyişə dəstəyini bir daha təsdiqləyib. Blinken qeyd edib ki, Birləşmiş Ştatlar Ermənistan və Azərbaycanın Almatı Bəyannaməsindən sərhədlərin delimitasiyası üçün əsas kimi istifadəsinə razılıq verməsini alqışlayır. O, ABŞ-ın Ermənistanın suverenliyini, ərazi bütövlüyünü, həmçinin baş nazir Paşinyanın ölkəsinin firavan, demokratik və müstəqil gələcəyi ilə bağlı baxışını dəstəkləmək üçün davamlı səylər göstərdiyini vurğulayıb".
İlham Əliyevə zəng
"Dövlət katibi prezident Əliyevin keçən həftə Ermənistan və Azərbaycanın 1991-ci il Almatı Bəyannaməsini sərhədlərin delimitasiyası üçün əsas kimi götürmək barədə razılığa gəldiyini elan etməsini yüksək qiymətləndirıb. Bunun davamlı, ləyaqətli sülhün bağlanması üçün hər iki tərəf üçün əhəmiyyətini vurğulayıb. O, prezident Əliyevi ermənistanlı həmkarı ilə tempi saxlamağa çağırıb", - Dövlət Departamenti bildirir.
Habelə bildirildiyinə görə, o, Azərbaycanın Qubad İbadoğlunun humanitar jest olaraq ev dustaqlığına buraxılmasını alqışlayıb və onun tezliklə tam azad olunmasına çağırıb: "Dövlət katibi Blinken bir daha Azərbaycanı insan hüquqları sahəsində beynəlxalq təəhhüd və öhdəliklərinə əməl etməyə, Azərbaycanda haqsız yerə həbs olunanları buraxmağa çağırıb".
Azərbaycan prezidenti Mətbuat xidmətinin telefon söhbəti ilə bağlı məlumatında isə bildirilir ki, "İlham Əliyev Azərbaycanın insan hüquqları sahəsində öhdəliklərinə sadiq olduğunu və demokratik islahatların davam etdirildiyini diqqətə çatdırıb".
Bir neçə gün öncə Azərbaycan Demokratiya və Rifah Partiyasının (ADR) sədri İbadoğlunun həbsi ev dustaqlığı ilə əvəz olunub. O, ötən il iyulun 23-də həbs edilmişdi. Cinayət Məcəlləsinin (CM) 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma) və həmin maddənin əlavə olaraq 3.1-ci (eyni əməllər mütəşəkkil dəstə tərəfindən törədildikdə) bəndi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb. Siyasətçi irəli sürülən bütün ittihamları "saxta" adlandırıb
Son aylar Azərbaycanda 20-yə qədər jurnalist, ictimai fəal qaçaqmalçılıq və başqa ittihamlarla həbs edilib. Onlar ittihamlar ilə razılaşmır, bunu peşə fəaliyyətləri və siyasi sifarişlə izah edirlər. Yerli hüquq-müdafiə təşkilatlarının hazırladığı siyahılara görə, hazırda Azərbaycanda 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olmuşdu. Bakı ərazilərinin 20 faizinə nəzarəti itirmişdi. Dörd il əvvəl 44 günlük İkinci Qarabağ müharibəsi və ötən il birgünlük əməliyyat nəticəsində Azərbaycan işğalda olan ərazilərə nəzarətini bərpa edib.
Ötən il Qarabağda aparılan birgünlük əməliyyatı Ermənistan "etnik təmizlənmə" adlandırmışdı. Həmin vaxtdan sonra da Qarabağdan erməni əhali köç edib.
Hər iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazı imzalanmayıb.
Prezident jurnalistlərin həbsini şərh etdi: 'O demək deyil ki, bizdə media azad deyil' [Video]
![Prezident İlham Əliyev Berlində Almaniya Kansleri Olaf Şolts ilə birgə mətbuat konfransında](https://gdb.rferl.org/01000000-0aff-0242-6757-08dc65f26976_cx0_cy9_cw0_w250_r1_s.jpg)
"Biz, istənilən ölkə kimi, öz media məkanımızı xarici neqativ təsirlərdən qorumalıyıq". Bunu Azərbaycan prezidenti İlham Əliyev aprelin 26-da Berlində Almaniya kansleri Olaf Şolts ilə birgə mətbuat konfransında deyib.
Mətbuat konfransında prezidentə jurnalist İmran Əliyevin həbs edilməsi, ailəsinin onun hüquqlarının pozulduğunu deməsi ilə bağlı sual verilib.
İ.Əliyev suala cavab olaraq bunları deyib: "Azərbaycanda heç bir senzura yoxdur. Azad internet fəaliyyət göstərir. Yüzlərlə media orqanı fəaliyyət göstərir. Ona görə Azərbaycanı medianın inkişafını əngəlləmək istiqamətində atılmış addımları ilə tənqid etmək ədalətsiz olardı. Əgər internet azaddırsa, hansı məhdudiyyətdən söhbət gedə bilər".
Prezidentin əlavə etməsinə görə, fərdi hadisələrə gəldikdə isə, hüquq-mühafizə orqanları bütün məsələləri araşdırırlar: "Bir müddət bundan əvvəl xaricdən qanunsuz maliyyələşən bəzi media orqanlarının nümayəndələri istintaq orqanları tərəfindən saxlanıb, bu da Azərbaycan qanunvericiliyinə tam uyğun şəkildə aparılıb. İstənilən ölkə öz qanunlarını müdafiə etməlidir və əgər qanunsuz xaricidən vəsait alan hansısa media nümayəndəsi istintaqa cəlb edilibsə, o demək deyil ki, bizdə media azad deyil. Sadəcə, hər kəs qanun çərçivəsində fəaliyyət göstərməlidir. Biz, istənilən ölkə kimi, öz media məkanımızı xarici neqativ təsirdən qorumalıyıq və hər kəs qanunlara əməl etməlidir".
Son aylar Azərbaycanda aralarında meclis.info saytının təsisçisi İmran Əliyev olmaqla 20-yə qədər jurnalist, ictimai fəal qaçaqmalçılıq və başqa ittihamlarla həbs edilib. Onlar ittihamlar ilə razılaşmır, bunu peşə fəaliyyətləri və siyasi sifarişlə izah edirlər.
Dünən, aprelin 25-də Avropa Parlamenti Azərbaycanla bağlı qətnamə qəbul edib. Qətnamədə vurğulanır ki, Azərbaycan hakimiyyəti son vaxtlarda vətəndaş cəmiyyətinə, fəallara və ölkədə hələ də qalan müstəqil mediaya qarşı repressiyaları gücləndirib.
Amma rəsmilər vurğulayırlar ki, ölkədə heç kim sırf peşə fəaliyyətinə görə, siyasi sifarişlə basqılara məruz qalmır.
Üstəlik, əvvəlki illərdə də Azərbaycanda jurnalistlərdən, bloqerlərdən həbs edilənlər olub.
Yerli hüquq-müdafiə təşkilatlarının hazırladığı siyahılara görə, hazırda Azərbaycanda 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.
Xatırlatma
Aprelin 25-də prezident İ.Əliyev Almaniyaya işgüzar səfərə gedib. O, orada "15-ci Petersberq İqlim Dialoqu" konfransında iştirak edib.
İmran Əliyevə ittihamın ağırlaşdırıldığı deyilir
![İmran Əliyev](https://gdb.rferl.org/01000000-0a00-0242-f2b8-08dc5fdaf5a5_cx6_cy11_cw64_w250_r1_s.jpg)
"Meclis.info" platformasının həbsdə olan rəhbəri İmran Əliyevə qarşı yeni ittiham irəli sürüldüyü deyilir.
Bu barədə “Turan”a onun yaxınları məlumat verib.
Onların sözlərinə görə, aprelin 26-da İ.Əliyevə qarşı Cinayət Məcəlləsinin (CM) 206.3.1-ci (qaçaqmalçılıq təkrar törədilməklə) maddəsi ilə ittiham sürülüb.
Bundan əvvəl ona CM-nin 206.3.2-ci (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsilə ittiham elan olunmuşdu.
Hələlik, bu məlumatı istintaq orqanı olan Daxili İşlər Nazirliyindən dəqiqləşdirmək mümkün olmayıb.
Elə bugün, aprelin 26-da Almaniyada səfərdə olan Azərbaycan prezidenti İlham Əliyevə Berlində kansler Olaf Şolts ilə birgə keçirdiyi mətbuat konfransında İmran Əliyevlə bağlı da sual verilmiş, ailəsinin ona təzyiqlər edildiyi ilə bağlı şikayət dilə gətirdiyi vurğulanmışdı.
Əliyev suala cavabında bəzi media nümayəndələrinin həbsinə toxunaraq bunun qanunvericiliyə uyğun aparıldığını demişdi:
“Sadəcə, hər kəs qanun çərçivəsində fəaliyyət göstərməlidir. Biz, istənilən ölkə kimi, öz media məkanımızı xarici neqativ təsirdən qorumalıyıq və hər kəs qanunlara əməl etməlidir".
İmran Əliyev aprelin 18-də həbs olunub. O, ittihamı qəbul etmədiyini bildirib.
Xatırlatma
Son aylar Azərbaycanda aralarında meclis.info saytının təsisçisi İmran Əliyev olmaqla 20-yə qədər jurnalist, ictimai fəal qaçaqmalçılıq və başqa ittihamlarla həbs edilib. Onlar ittihamlarla razılaşmır, bunu peşə fəaliyyətləri və siyasi sifarişlə izah edirlər.
Dünən, aprelin 25-də Avropa Parlamenti Azərbaycanla bağlı qətnamə qəbul edib. Qətnamədə vurğulanır ki, Azərbaycan hakimiyyəti son vaxtlarda vətəndaş cəmiyyətinə, fəallara və ölkədə hələ də qalan müstəqil mediaya qarşı repressiyaları gücləndirib.
Amma rəsmilər vurğulayırlar ki, ölkədə heç kim sırf peşə fəaliyyətinə görə, siyasi sifarişlə basqılara məruz qalmır.
İlham Əliyev Almaniyaya gedib
![İlham Əliyev](https://gdb.rferl.org/548cc053-a80e-4cf5-a2c4-b3493576eff2_w250_r1_s.jpg)
Aprelin 25-də prezident İlham Əliyev Almaniyaya səfər edib
Əliyev orada “15-ci Petersberq İqlim Dialoqu”nun Yüksək Səviyyəli Seqmentində iştirak edəcək.
Habelə bu səfər çərçivəsində onun Almaniya kansleri Olaf Şoltsla görüşü də gözlənilir.
Bu il noyabrın 11-də BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) Bakıda keçirilməlidir.
Almaniyada aprelin 25-i və 26-da gerçəkləşəcək Petersberq İqlim Dialoqunda həmin konfransın da gündəliyi nəzərdən keçirilə bilər.
Elnur Həsənovun aclıq aksiyasını dayandırdığı deyilir
![Elnur Həsənov](https://gdb.rferl.org/d5f93274-3ff0-438a-beb8-31796f0817b6_cx0_cy19_cw0_w250_r1_s.jpg)
Həbsdə olan AXCP üzvü Elnur Həsənovun aclıq aksiyasını dayandırdığı bildirilir.
Bu barədə partiyadan məlumat verilib.
Bildirildiyinə görə, E.Həsənov tələbi yerinə yetirildiyi və partiya rəhbərliyinin xahişlərini nəzərə alaraq aclığı dayandırmağa qərar verib.
Bu məlumatı, hələlik, Penitensiar Xidmətdən dəqiqləşdirmək mümkün olmayıb.
Yaxınları narahatdır
Yaxınları həbsdə aprelin 18-dən aclıq aksiyası keçirdiyi bildirilən AXCP üzvü Elnur Həsənovun səhhətindən narahatdırlar.
Ailə üzvlərinin sözlərinə görə, E.Həsənov dünən, aprelin 24-də onlara zəng vurub: "Heç bir dəqiqə belə danışa bilmədi. Səsi çox zəif gəlirdi, təzyiqi düşmüşdü. Bu gün isə, ümumiyyətlə, zəng vurmayıb. Ondan çox narahatıq".
Elnur Həsənovun həbsdə aclıq aksiyası keçirdiyi deyilir
Azərbaycan Xalq Cəbhəsi Partiyasının (AXCP) həbsdə olan fəalı Elnur Həsənovun artıq altı sutkadır 1 saylı Bakı İstintaq Təcridxanasında aclıq aksiyası keçirdiyi bildirilir.
Partiyadan deyiblər ki, aprelin 23-də Penitensiar Xidmətin Əməliyyat-Rejim İdarəsinin rəisi Fikrət Qafarov onunla görüşərək bir saatdan artıq müddətə söhbət edib, bütün problemlərini dinləyib, qeydlər götürüb və məsələni aidiyyəti orqanlara çatdıracağını söyləyib.
AXCP-dən verilən məlumata görə, E.Həsənov istintaq təcridxanasının tibb-sanitar hissəsində saxlanılır: "Bu gün müayinə zamanı məlum olub ki, onun arterial təzyiqi 80/60-a düşüb".
Həsənovun aprelin 18-də məhkəmədə çıxış etmək üçün hazırladığı qeydlərin götürülməsinə etiraz olaraq aclıq aksiyasına başladığı deyilir.
O, 2023-cü il noyabrın 28-də narkotik maddələrin qanunsuz dövriyyəsi ittihamı (234.4.3) ilə həbs edilib. Fəalın sözlərinə görə, həbsinin əsl səbəbi yol polisi rəhbərliyinin hərəkətlərini tənqid etməsidir.
E.Həsənov bundan əvvəl də inzibati qaydada həbs edilib. O, xırda xuliqanlıq və polisin qanuni tələbinə tabe olmamaqda günahlandırılaraq 30 sutka inzibati həbs almışdı. AXCP üzvü onda da ittihamı qurama sayırdı.
AXCP-nin hazırda 10-dan çox fəalı həbsdədir. Onlar müxtəlif ittihamlarla mühakimə edilsələr də, partiya onların siyasi sifarişlə şərləndiyini açıqlayıb. Amma rəsmilər ölkədə siyasi həbslərin olması ilə bağlı deyilənləri əsassız sayırlar.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.