-
Həyatı Türkiyə-Azərbaycan-Rusiya arasında keçmiş böyük türk şairi Nazim Hikmət ölənə qədər Türkiyəyə buraxılmadı. Bu günsə onun 114 yaşı münasibətilə İstanbulda Nazim Hikmət Mədəniyyət və İncəsənət evi Fondu açılıb. İstanbulda Şişli bələdiyyəsinin təsis etdiyi bu mərkəzdə şairin adına kitabxana, teatr və musiqi salonu, dostu Abidinin şərəfinə otaq var.
Mədəniyyət evinin direktoru Kıymet Coşkun APA-ya deyib ki, bu ev həm də azərbaycanlılara məxsusdur.
“Mən bütün qəlbimlə azərbaycanlı qardaşlarımı salamlayıram, onlar 1920-ci ildə Nazim Hikmətin ilk şeir kitabı çıxanda onu seviblər, onu 1950-ci illərdə də seviblər, onu ölənə qədər də seviblər.”
Türkiyənin ikinci prezidenti İsmet İnönünün nəvəsi Xeyri İnönü, Nazim Hikmətin ilk kitabının Azərbaycanda çıxdığını xatırladıb və deyib:
“Biz hamımız bununla fəxr edirik. Nazim Hikmətin yaradıcılığı bizim ölkələrimiz arasında ədəbiyyat, sənət, mədəniyyət körpüsü olub.”
