-
"Oxu zalı"nda yeni imza
İntiqam Yaşar
DƏRVİŞ
Canı da bizdəndi, qanı da bizdən,
Bir dərviş yaşayar içərimizdə.
Xəlvətdə hamımız ona sığınnıq.
Yüz lağ eləsək də ona biz üzdə.
Bu dərviş atamız, babamız kimi,
Bizə yol göstərən, mayak adamdı.
Bu dərviş bizləri yuxu tutanda,
Bizə keşik çəkən, oyaq adamdı.
Dost - tanış yanında qaçarıq ondan,
Sanarıq bu bizə yamaq adamdı.
Onu yaxın deyə tanıtmamaqçün,
Sorsalar deyərik - “qıraq adamdı”
Bizdən incidiyi, küsdüyü olmaz,
Sanar bir damlayıq, o bir dənizdir.
Çünki, tutduğumuz işlərə rəğmən,
Xətrimiz yanında yenə əzizdi.
Canı da bizdəndi, qanı da bizdən,
Bir dərviş yaşayar içərimizdə.
Xəlvətdə hamımız ona sığınnıq.
Yüz lağ eləsək də ona biz üzdə.
KİMİYƏM
Özümdən çox-çox uzağam,
Özümdən çıxmış kimiyəm.
Bu bir günlük, bütöv ildə,
Lap bir qızmar qış kimiyəm.
Meyl etsəm də kef etməyə,
Güc yox qəmi dəf etməyə.
Öz-özümü məhv etməyə,
Mən ki, mənə tuş kimiyəm.
Savab göydə, günah göydə,
Özüm burda, tamah göydə,
Bu gün yerdə, sabah göydə,
Bircə damla yaş kimiyəm.
Bax, kiminsə qəsdindədi,
Əli xəncər dəstindədi.
Ölüm başım üstündədi,
Onunla göz-qaş kimiyəm.
GÜNAHLAR
Payızda saralmış yarpaqlar kimi,
Uçar küçələrdə, uçar günahlar.
Amma yüz axtarıb, yüz arayasan,
Heç tapa bilməzsən bircə günahkar.
Bu günah deyilən başıbəlalı,
Kimsə yaxın durmaz, kimsə oxşamaz.
Yetimlər evindən qaçmışa bənzər,
Alışar tinlərə, alışar az-az…
Yiyəli, yiyəsiz günahlara bax,
Küçələr çox sıxlıq, küçələr bazar…
Yiyəsi sağ olan günahlar susqun,
Yiyəsi ölmüşlər yiyəsin arar…
