Bakı İcra Hakimiyyəti sənətçiyə uduzdu

-

İyulun 17-də Ali Məhkəmə tanınmış sənətçi Şeyx Əbdül Mahmudbəyovun Bakı Şəhər İcra Hakimiyyətinin başçısı Haсıbala Abutalıbova qarşı iddiasına baxıb. Sənətçinin AzadlıqRadiosuna bildirdiyinə görə, məhkəmə, bundan əvvəlki instansiya məhkəmələrinin onun xeyrinə çıxardığı qərarları qüvvədə saxlayıb:

«2 il əvvəl «Qış Bulvarı» parkı tikilərkən, mənim evimə ciddi ziyan dəymişdi. Tələb etsəm də, Bakı şəhər İcra Hakimiyyəti mənə dəymiş ziyanı ödəmək istəmirdi. Bu işlərin başında Hacıbala Abutalıbov dururdu. Ona görə də onu məhkəməyə verdim. Nəsimi rayon Məhkəməsi mənim xeyrimə qərar çıxardı ki, mənə dəymiş ziyanı icra hakimiyyəti ödəməlidir. Hacıbala Abutalıbov bu qərardan apellyasiya şikayəti verdi, bu məhkəməni də uddum. Bu gün Ali Məhkəmə də əvvəlki qərarları qüvvədə saxladı. Mən fikirləşirdim ki, Hacıbala Abutalıbov məhkəmələrə təzyiq göstərər deyə onun xeyrinə qərar çıxaracaqlar. Bu belə olmadı, qərarlar ədalətli oldu».

Şeyx Əbdül Mahmudbəyov yaxın müddətdə qərarın icra olunacağını bildirdi.