Parisdə “Şəki və onun tarixi hissəsi”nin UNESKO-nun Ümumdünya İrs Siyahısına daxil edilməsi məsələsi müzakirə olunub.
Mədəniyyət və Turizm nazirliyindən AzadlıqRadiosu-na verilən xəbərə görə, bu məsələni nazir müavini Sevda Məmmədəliyeva Parisdə UNESKO-nun Silahlı münaqişələr zamanı mədəni mülkiyyətin qorunması üzrə Hökumətlərarası Komitəsinin 11-ci sessiyasında iştirakla bağlı səfərdə qaldırıb.
Buna da bax: Şəkidə türk dünyasının paytaxtını seçəcəklər
Səfər çərçivəsində Sevda Məmmədəliyeva “Şəki və onun tarixi hissəsi”nin UNESKO-nun Ümumdünya İrs Siyahısına daxil edilməsi üçün Dünya İrs Komitəsinə üzv ölkələr ilə danışıqlar aparıb.
Görüş zamanı Sevda Məmmədəliyeva üzv ölkələrin diqqətinə çatdırıb ki, “Şəki və onun tarixi hissəsi”nin UNESKO-nun Ümumdünya İrs Siyahısına daxil edilməsi üçün Azərbaycan tərəfindən hazırlanan sənədlər toplusu peşəkarlar tərəfindən hazırlanıb və tələb olunan kriteriyaları özündə toplayır.
Buna da bax: Şəkini tanıdan sənət: yapışqansız, mismarsız şəbəkə...
Azərbaycan tərəfinə digər ölkələrin bu istiqamətdə təcrübəsini nəzərdən keçirmək və gələcəkdə ortaya çıxacaq sualları cavablamağa əvvəlcədən hazırlıq görməyi təmin etmək tövsiyə olunub.
Hazırda İçərişəhər memarlıq kompleksi və Qobustan dövlət tarixi-bədii qoruğu UNESKO-nun Ümumdünya İrs Siyahısında yer alır.