Keçid linkləri

2024, 28 Mart, Cümə axşamı, Bakı vaxtı 20:42

«İranda ana dilinin təbliğinə görə həbs edirlər»


Səid Mətinpur. Foto: www.saidmatinpur.com
Səid Mətinpur. Foto: www.saidmatinpur.com
Beynəlxalq Ana dili günündə yada İran azərbaycanlısı Səid Mətinpur düşür. Ana dilində təhsilin olması üçün öz ölkəsində mücadilə aparan və 8 illik həbsə məhkum edilən Səid.
«Mən bilmirəm ki, dünyada ayrı bir ölkə, bir məmləkət varmı ki, orda dilini istəyən zindana düşə. Ana dilini təbliğ edən müəllim zindana düşə. Hər halda bu gün İranda, bizim Azərbaycanda ana dilini təbliğ edən, ana dilində danışan müəllim zindana düşür».
Səid Mətinpur bu çıxışını 2007-ci ildə İranın Zəncan şəhərində aksiyaların birində edib.
İran azərbaycanlılarının çoxu Səidi insan hüquqları fəalı, ana dili mübarizi kimi tanıyırlar. Həbsə atılmasını da tutduğu yolla bağlayırlar. Ona verilən rəsmi ittiham isə «milli təhlükəsizliyi pozmaq və xarici dövlətlərlə əlaqə qurmaq»dır.
İRANDA AZƏRBAYCANLILAR ÖZ DİLLƏRİNİ EVLƏRİNDƏ ÖYRƏNİRLƏR
Səidin həyat yoldaşı Ətiyə Tahiri AzadlıqRadiosuna deyir ki, o, 3 ildən çoxdur ki, həbsdədir və onlar Səidin cəzasının yarısından azad olunması üçün hüquq-mühafizə orqanlarına müraciət etməyi götür-qoy edirlər.
Ətiyə Tahiri deyir ki, Səid hər zaman məktəblərdə Azərbaycan dilinin tədris olunması üçün təbliğat aparıb:
- Səid ruznamələrdə, saytlarda, şəxsi blogunda yazırdı. İstəyirdi ki, türk uşaqları öz dillərində yazıb-oxumağı bilsinlər. Birinci dəfə də Ana dili günü ilə bağlı çıxış etdiyi üçün saxlandı, 10 gün zindana atıldı.
- İranda yaşayan azərbaycanlılar ana dilində oxuyub-yazmağı bəs harda öyrənirlər?
TÜRK DİLİNİ ÖYRƏNMƏYƏ MƏKTƏB YOXDUR
- Elə özləri evlərində öyrənirlər. Hər kəs özü öyrənir. Türk dilini öyrətməyə məktəb yoxdur. Fəqət hər kəs öz evində öyrənir. Hər kəs öz uşağına özü öyrədir, ya da özbaşına öyrənir.
Ətiyə Tahiri deyir ki, Elvin həbsxanasında saxlanan Səid Mətinpur ilə həftədə 20 dəqiqə görüşmək, şüşə arxasından danışmaq imkanı var.
Tehran Universitetinin fəlsəfə fakültəsi məzunu olan Səid Mətinpur, «Yarpaq» ve «Moc-i Bidari» (Oyanış Dalğası) qəzetləri və Azərbaycanda insan hüquqlarına həsr olunan «Haqq» bloqunun yazarı olub. Mətinpur həmçinin öz şəxsi bloqu və başqa qəzetlərdə Azərbaycanda dil və insan hüquqları haqqında çoxlu məqalələr yazıb. Beynəlxalq hüquq təşkilatları onu vicdan məhbusu sayıblar.
ANA DİLİ GÜNÜNDƏ HƏBSLƏR
İranda bu il fevralın 21-də Beynəlxalq Ana Dili Günündə təbrizli fəallar Salar Turi və Vəhid Həbib Çeşmə saxlanıb.
«Media forum » saytının məlumatına görə, ETTELAAT-ın Təbriz bölməsinin əməkdaşları Salar Turi və Vəhid Həbib Çeşməni fevralın 21-də səhər evlərində tutub bilinməz istiqamətə aparıblar. Hər iki fəalın evində axtarış aparılıb, onlara məxsus bir sıra əşyalar götürülüb.
Təbrizli fəalların konkret nədə günahlandırıldığı bilinməsə də, onların həbsinin 21 fevral Beynəlxalq Ana Dili Günündə Təbrizdə toplantılar keçirmək çağırışları ilə bağlı olduğu təxmin edilir.
XS
SM
MD
LG