Rusiya idmançılarına dopinq verildiyi barədə sirləri faş edən Qriqori Rodçenkov Almaniya televiziyasının sənədli reportajında bildirib ki, Putin dövlət səviyyəsində təşkil edilmiş dopinqləmə sxemindən xəbərsiz ola bilməzdi.
Rusiya antidopinq laboratoriyasının keçmiş direktoru yanvarın 29-da ARD kanalında efirə verilmiş proqramda deyib ki, “bu sxemin bir ucu lap yuxarıdan, prezidentdən gəlirdi”.
O deyib ki, Federal Təhlükəsizlik Xidmətinə belə bir spesifik tapşırığı yalnız prezident verə bilərdi.
Rodçenkov bundan başqa deyib ki, dövlət tərəfindən həyata keçirilən dopinq proqramı artıq 2008-ci il Pekin və 2012-ci il London olimpiadaları zamanı mövcud olub.
Rodçenkov 2016-cı ildə Birləşmiş Ştatlara qaçandan bəri orada dövlət şahidi qismində mühafizə olunur.
O 2016-cı ilin mayıbndaThe New York Times qəzetinıə müsahibəsində demişdi ki, Soçi Olimpiadası vaxtı yaxşı işlənmiş dopinq sxemində onlarca Rusiya idmançısı iştirak edib.
Beynəlxalq Olimpiya Komitəsi (BOK) 2016-cı ilin avqustunda dövlət tərəfindən təşkil edilmiş dopinq sxeminə görə Rusiyanın Olimpiadada iştirakını qadağan edib.
Bu barədə hesabatı Dünya Antidopinq Agentliyinin adından Richard McLaren hazırlamışdı.
McLaren öz hesabatında Rodçenkovun bir çox iddialarını təsdiqləmiş,BOK-un idarə heyəti isə onu “etibarlı şahid” kimi tanıdığını bəyan etmişdi.
Rusiya prokurorluğu isə Rodçenkovu dopinq qalmaqalının başlıca baiskarı hesab edir.