Mərkəzi və Şərqi Avropada böyüklərin çoxu qadın və ailənin roluyla bağlı ənənəvi baxışları bölüşür. Bunu regionun 18 ölkəsində rəy sorğusu keçirmiş «Pew» araşdırma mərkəzi üzə çıxarıb. Bu faktın özəlliklə pravoslav xristianların yaşadığı 10 ölkədə özünü qabarıq göstərdiyi bildirilir.
Məsələn, həmin 10 ölkənin hamısında respondentlərin əksəriyyəti bu fikirlə razıdır ki, «qadının cəmiyyətə övlad vermək məsuliyyəti var». Ermənistanda 82%, Rumıniyada 81% Bolqarıstanda 77%, Rusiya və Belarusda isə hər 10 nəfərdən altısı – yəni hər birində 59% bu fikirdədir.
«QADIN ƏRİNƏ TABE OLMALIDIR»
Əsasən katoliklərin yaşadığı 8 ölkədə isə daha az respondent bu yanaşmanı bölüşür.
Pravoslav ölkələrində nikah və iş təcrübəsində də gender məsələsinə mühafizəkar yanaşırlar. Həmin ölkələrdə ortalama 42% deyir ki, qadın həmişə ərinə tabe olmalıdır. Pravoslavların üstünlük təşkil etmədiyi ölkələrdə 25% bu fikirdədir.
Pravoslav ölkələrində 44% respondent razılaşır ki, «iş yerləri azdırsa, kişilərin həmin işi əldə etməyə qadınlardan daha çox hüquqları var». Digər ölkələrdə 31% belə düşünür.
Maraqlıdır ki, ideal ailə məsələsində pravoslavlar digərlərindən az mühafizəkardırlar. Yəni, onların fikrincə, ideal nikah heç də kişinin işləyib pul qazandığı və qadının evə, uşaqlara baxdığı ailə deyil. Əksəriyyət kişiylə qadının bərabər işləyib ev məsuliyyətini də paylaşmasının tərəfdarıdır.
SOVET MİRASI?
«Pew» bildirir ki, sorğunun keçirildiyi ölkələrin çoxu keçmiş sovet respublikalarıdır və qadınların işçi qüvvəsi kimi qəbul olunması sovet erasına xasdır. Yəni, onda qadınlara böyük imkanlar yaradılmışdı. Amma bir məsələ də var ki, gender bərabərliyi praktikadan çox sözdəydi. Kişilərə qadınlardan çox üstünlük verilir, qadınlar daha azmaaşlı işlərdə çalışırdılar.
Ümumilikdə isə, Mərkəzi və Şərqi Avropada gender məsələsində qadınlar kişilərdən daha proqressiv düşünürlər. Gürcüstan, Serbiya və Moldovada qadının işə götürülməsində ciddi gender ayrıseçkiliyi qeydə alınmır.
Elə regionda rəyi soruşulan qadınlar da qadının ərinə tabe olmasını fikriylə kişilərdən az razılaşıblar. Amma ölkələrin çoxunda hər iki cinsin təmsilçiləri qadının cəmiyyətə uşaq vermək məsuliyyətinin olduğunu düşünürlər.