Ermənistanın baş naziri Nikol Pashinian özünün Feysbuk səhifəsində canlı yayımda bildirib ki, Valeri Osipian ona görə daxili işlər naziri vəzifəsinə təyin edildi ki, o korrupsiyaçı deyil.
AzadlıqRadiosunun erməni xidməti yazır ki, bu təyinat ölkədəki sosial şəbəkələrdə birmənalı qarşılanmayıb, həmçinin bir sıra tanınmış yerli hüquq müdafiəçiləri bu qərarı tənqid ediblər.
“Ona görə Osipianın üzərində dayandım ki, o korrupsiyaçı deyil.Bu polis sistemində nadir haldır.O heç bir klanın üzvü deyil. Əvvəlki illərdə Ermənistanda polisin irəli getməsi üçün xüsusi prinsiplər vardı, “krışa”n olmalı idi. Yerevan polisinin rəis müavini Osipian karyerasına “küçədə qara işlərdən” başlayıb” Pashinian bildirib.
Pashinian deyib ki, şəxsən onun özü 2007-ci ildən 2018-ci ilədək keçirilən etiraz aksiyalarında dəfələrlə Osipianla qarşı-qarşıya gəlib.
Hətta son aksiyada əli yaralanıb, amma əsas odur ki, polis rəisi korrupsiyaçı, heç bir klana məxsus olmasın.
Buna da bax:Pashinian: “Mən nə rusiyayönlü, nə də amerikayönlüyəm...” (VIDEO)
Qeyd edək ki, baş nazir Pashinianın təklifi ilə Valeri Osipian mayın 10-da daxili işlər naziri, Artur Vanetsyan isə milli təhlükəsizlik xidmətinin sədri vəzifəsinə təyin edilib.
Artur Vanatesyan bunadək,bu xidmətin Yerevan şöbələrindən birinin rəhbəri olub.
Eduard Aqacanyan isə hökumət aparatının rəhbəri təyin olunub. O, Paşinyanın “Vətəndaş müqaviləsi” partiyası və parlamentdəki Yelk fraksiyasının üazvüdür.
Nikol Paşinyan mayın 11-də yeni hökumətin ilk iclasından sonra deyib ki, , fövqəladə hallar naziri David Tonoyan isə müdafiə naziri vəzifəsinə təyin ediləcək.
Tonoyan 2010-2016-cı illərdə müdafiə nazirinin birinci müavini olub.
Nikol Paşinyan mayın 8-də ölkə parlamentində ölkənin yeni baş naziri seçildi.
Qeyd edək ki, keçmiş prezident Serz Sargsyanın aprelin 17-də baş nazir seçilməsi ölkədə kütləvi etirazlara səbəb oldu və o buna tab gətirə bilməyib aprelin 23-də istefa verməli oldu.
Həmin etirazları Nikol Paşinyan təşkil etmişdi.
Paşinyan Sarkisyanı prezidentliyin ardınca baş nazir kimi hakimiyyətdə qalmağa cəhdində ittiham edirdi. Ermənistan 2015-ci ildə referendum keçirərək prezident üsul-idarəsindən parlament idarəçiliyinə keçib.
Buna da bax: Levon Ter-Petrosyan ‘çox təhlükəli vəziyyətdən’ yazır.
