Milli Şuranın sentyabrın 23-də keçirəcəyi mitinqdən öncə müxlif fəalların bir neçəsinin saxlanıldığı bildirilir. Hərçənd belə məumatları pois və digər rəsmi qurumlar təsdiq etmirlər.
Mitinqin Təşkilat Komitəsindən Azadlıq Radiosuna bildiriblər ki,saxlandığı güman edilən təqribən 4 fəalla onlar da əlaqə yarda bilmirlər.
Milli Şuraya daxil olan Azərbaycan Xalq Cəbhəsi Partiyasının funksionerləri olan bu şəxslərə hazırda telefon zəngi çatmır.
Bunlar AXCP fəalları Bəhruz Həsənli, Saqif Qurbanov, İlham Hüseyn və Emil Səlimovdur.
XATIRLATMA
Milli Şura sentyabrın 23-ü aksiya keçirmək niyyətindədir. Artıq şəhər rəhbərliyindən də razılıq məktubu alınıb.
Aksiyanın məqsədini Milli Şuraya daxil olan AXCP sədri Əli Kərimli açıqlamışdı. O, dünyanın müxtəlif mətbu orqanlarında Azərbaycanla bağlı dərc olunmuş araşdırmalara istinad edərək demişdi:
«Milli Şura Baş Prokurorluqdan korrupsiya yolu ilə ölkədən çıxarılmış milyardlarla dollarla bağlı cinayət işi başlamasını istəyib. Lakin indiyədək nə prokurorluq cinayət işi başlayıb, nə də dövlət başçısı İlham Əliyev bununla bağlı izahat verib».
Öz növbəsində rəsmi Bakı araşdırma yazısında qeyd edilənləri təkzib edir.
Azərbaycan prezidentinin mətbuat katibi Azər Qasımov bildirib ki, məqalədəki məlumatlar absurd xarakter daşıyır.
«Dünyada müəyyən dairələr və onların havadarları, eləcə də erməni lobbisinin maliyyələşdirdiyi ayrı-ayrı kütləvi informasiya vasitələrinin nümayəndələri Azərbaycana qarşı ağlasığmaz, iftira dolu, yalan məlumatlar yaymaqla məşğuldurlar. Özü də bu cür yazılar elə təqdim olunur ki, guya orada göstərilən faktlar dəlil-sübutlara və sənədlərə əsaslanır. Bu da bir növ məsələlərin mahiyyətinə dərindən bələd olmayan kütləvi oxucuya psixoloji təsir etmək məqsədi daşıyır», – o qeyd edib.
Rəsmilər bəyan ediblər ki, həmin məsələlərin nə Azərbaycan dövlət başçısına, nə də onun ailə üzvlərinə aidiyyəti var.