Yerevan meriyası ictimai nəqliyyatda hakimiyyəti tənqid edən satirik “Güvə” qəzetinin pulsuz paylanmasını qadağan edib.
Hakimiyyət hesab edir ki, qəzet vətəndaşlar arasında narazılıq doğura bilər.
Qəzetin baş redaktoru Marianna Grigoryan AzadlıqRadiosunun Ermənistan xidmətinə müsahibəsində hakimiyyətin bu addımını başa düşmədiyini deyib.
O deyir ki, bu, qəzetin işıq üzü görən ilk sayı idi, hələ ki, yayılmamışdı, amma nədənsə meriya hesab edir ki, nəşr camaat arasında narazılıq doğura bilər.
Qəzeti “Medialab” saytı nəşr etdirir. Bu sayt dəfələrlə kəskin siyasi karikaturalar dərc edib, bu cür sərgilər təşkil edib.
Ötən ilin avqustunda Yerevanın Maştotsa prospekti yaxınlığındakı meydanda belə bir sərginin açılmasından sonra, naməlum adamlar gecə vaxtı Marianna Grigoryanın maşınının şüşəsini sındıraraq prezident Serzh Sarkisian, parlamentin sədri Galust Saakyan, polis rəisi və digər hakimiyyət nümayəndələrinin karikaturalarını oğurlamışdılar.
Maşının yaxınlığında müşahidə kamerası olmasına baxmayaraq, hüquq-mühavizə orqanları hələ də şübhəliləri tapa bilməyib.
Grigoryan hesab edir ki, karikaturalar cəmiyətdəki problemləri göstərməkdə çoxsaylı yazılardan daha təsirli ola bilər.
Karikaturaçı Vage Nersisyan deyir ki, məqsədləri hətta ən çətin şeylər barədə yumorla danışmaqdır.” Qoy insanlar gülsün, nəyə görə də yox, qoy bu onlarda etiraz hissi oyatsın. Ola bilsin ki, qəhrəmanlar da buna baxıb dəyişsinlər”, deyə Vage bildirir.
Marianna Grigoryan deyir ki, meriyanın bu addımı söz azadlığının pozulmasıdır.
