Həbsdəki jurnalist Əfqan Muxtarlının Şəkidəki İstintaq Təcridxanasına köçürüləcəyi (etap olunacağı) bildirilir.
Bu haqda siyasi fəal Samir Əsədli məlumat verib. O, bir qrup gənclə birgə bu gün, noyabrın 18-i jurnalistlə görüşməkdən ötrü Bakı İstintaq Təcridxanasında olub.
S.Əsədlinin bildirdiyinə görə, Əfqan Muxtarlının dostlarını onunla görüşə buraxmayıblar.
“Həmişəki kimi təcridxanada ənənəyə sadiq qaldılar, bizə görüş vermədilər. İndiyədək yalnız bir dəfə, ötən həftə Əfqanla görüşə bilmişik. Bizə bildirdilər ki, Əfqan Muxtarlı gələn həftənin ilk günü Şəkidəki təcridxanaya etap ediləcək. Gələn ay isə Balakən Rayon Məhkəməsində ona açılmış cinayət işi üzrə məhkəmə prosesi başlayacaq”.
S.Əsədli Ə. Muxtarlının əhvalının yüksək olduğunu bildirib.
Ə.Muxtarlının istintaqı artıq başa çatıb. Vəkilləri cinayət işi materialları ilə tanış olublar. Cinayət işi materialılarının məhkəməyə göndərilməsi gözlənilir.
Buna da bax: Avropa deputatları İlham Əliyevə məktub yazıblar
Gənclərin jurnalistlə görüşə bilməmələri ilə bağlı dediklərinə, hələlik, Penitensiar Xidmətdən münasibət almaq mümkün olmayıb. Gənclərin dediklərinə görə, onlar Əfqan Muxtarlı ilə görüşmələrindən ötrü onun ailəsindən də etibarnamə alıblar. Ancaq əksər hallarda jurnalistlə görüşə icazə ala bilmirlər.
XATIRLATMA
Oturum izni ilə Gürcüstanda yaşayan Ə.Muxtarlı mayın 29-u müəmmalı şəkildə Azərbaycanda həbs edilib. Dediyinə görə, Tbilisidə saxlanıb, ona işgəncə verilib, zorla sərhədə gətirilərək Azərbaycan tərəfinə təhvil verilib. Üstəlik, cibinə 10 min avro pul qoyulub.
Bakıdakı rəsmi qurumlar isə onun sərhədi keçərkən Azərbaycan ərazisində saxlanıldığını, bu zaman hüquq-mühafizə əməkdaşlarına müqavimət göstərdiyini bəyan ediblər.
Jurnalist Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etmədə ittiham olunur.
Bundan başqa, ona 318.1, 206.1 maddələr ilə - sərhədi qanunsuz keçmə və qaçaqmalçılığa görə də ittiham irəli sürülüb.
Ə.Muxtarlı ilə bağlı Gürcüstanda da istintaq aparılır. İş əvvəlcə bu ölkənin Daxili İşlər Nazirliyində olub, sonra prokurorluğa verilib. Gürcüstan baş naziri və daxili işlər naziri Ə.Muxtarlı olayında yerli hüquq-mühafizə orqanlarının iştirakını təkzib edib. Bununla belə, istintaq yekunlaşana qədər Daxili İşlər Nazirliyi və gömrükdə iki şəxs tutduğu vəzifədən uzaqlaşdırılıb.
Ə.Muxtarlı ilə bağlı açılmış cinayət işinin istintaqı bu yaxınlarda başa çatıb.
Buna da bax: Gözəl Bayramlı ilə Əfqan Muxtarlının istintaqı bitib
