Azərbaycan Xarici İşlər Nazirliyi Niderlandın (Hollandiya) Türkiyəyə qarşı hərəkəti ilə bağlı bəyanat yayaraq bunu qərəzli və ziddiyyətli adlandırıb.
Bəyanatda deyilir ki, bəzi Avropa təsisatları, xüsusilə Avropa parlamentindəki bir sıra dairələr, həmçinin Niderland hər bir fürsətdə əsassız şəkildə digər dövlətləri tənqid etməkdə, insan hüquqları mövzusunda “mentorluq” etməkdə və başqalarına irad tutmaqda “adətkarlıq” nümayiş etdirir.
XİN hesab edir ki,baş verənlər “diplomatik və konsulluq münasibətləri haqqında Vyana konvensiyası, insan hüquqları, sərbəst toplaşma və ifadə azadlığı kimi fundamental prinsiplərin kobud şəkildə”pozulmasıdır.
Bəyanatda qeyd olunur ki, bütün bunlar hazırda Avropada yayılmaqda olan islamafobiya, ksenofobiya və ayrı-seçkilik kimi neqativ meyllərin aradan qaldırılması, multikulturalizm, dözümlülük, dialoq və anlaşmanın təşviq edilməsinə xüsusi ehtiyacın olduğunu bir daha göstərir.
Martınq 11-də Niderland Türkiyənin iki nazirinin bu ölkədə keçirilən “referendum təbliğatı” mitinqində iştirakına imkan verməyib.
Bu ilin aprelində Türkiyədə Konstitusiyaya dəyişikliklərlə bağlı referendum keçiriləcək. Tənqidçilər bu dəyişikliklərin əleyhinədir, hesab edirlər ki, bu, siyasi hakimiyyətin bir nəfərin əlində cəmləşməsinə və nəticədə ölkədə avtoritar rejim yaranmasına gətirib çıxaracaq.